މާލެ ލޮކްޑައުންކޮށްފައިވާ ހާލަތުގައި ހިދުމަތް ދިނުމަށް މޯލްޑިވްސް ޕޮލިސް ސާރވިސް އިން ގާއިމުކުރި ކޯލް ސެންޓަރުގެ ހިދުމަތް ފުޅާކުރުމުގެ މަސައްކަތް ކުރަމުންދާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.

އެކަމާއި ގުޅިގެން ސީޕީ ކުރެއްވި ޓްވީޓެއްގައި ވިދާޅުވެފައިވަނީ ވިޔަފާރިތަކުންނާއި އާންމު ރައްޔިތުންގެ ފަރާތުން އެހީތެރިކަމަށް އެދި ކޯލް ސެންޓަރަށް އަންނަ ކޯލްތަކަށް އެއްފަހަރާ ޖަވާބު ދެވޭ އަދަދާއި ހިދުމަތުގެ ފެންވަރު ރަނގަޅު ކުރުމަށް މަސައްކަތް ކުރަމުން އަންނަ ކަމަށެވެ. އަދި އެ ހިދުމަތަށް ފަސޭހައިން އެދެވޭނެ އޮންލައިންޕޯޓަލްއެއް ތައާރަފުކޮށްފައިވާ ކަމަށާއި އެ ޕޯޓަލް މެދުވެރިކޮށް ޚިދުމަތް ހޯދުމަށް ސީޕީ ވަނީ އެދިވަޑައިގަންފައެވެ.

ސީޕީ މިގޮތަށް ޓްވީޓްކުރައްވާފައި މިވަނީ އެހީތެރިކަމަށް އެދި ފުލުހުންގެ ކޯލް ސެންޓަރުގެ ނަމްބަރަށް ނުގުޅޭ ކަމުގެ ޝަކުވާތައް އާންމުން ކުރަމުންދަނިކޮށެވެ. މީގެއިތުރުން ސީޕީ ވަނީ މިހާތަނަށް ކޯލް ސެންޓަރަށް ލިބިފައިވާ ކޯލުތަކާއި ޖަވާބު ދެވިފައިވާ އަދި ޖަވާބު ނުދެވިވާ ކޯލުތަކުގެ މައުލޫމާތުވެސް ހާމަކުރައްވާފައެވެ.

ޖުމްލަ ލިބުނު ކޯލްގެ އަދަދު: 2682

ޖަވާބު ދެވުނު ކޯލްގެ އަދަދު: 1464

ވެއިޓިންގ ކޯލްގެ އަދަދު: 25

ފުލުހުންގެ ކޯލް ސެންޓަރަށް އައި ކޯލުތަކުގެ ތެރެއިން ޖަވާބު ދެވިފައިވަނީ 54 އިންސައްތަ ކޯލުތަކަށެވެ.

ލޮކްޑައުން ހާލަތުގައި އާންމުން ބޭރަށް ނިކުތުން ވަނީ މަނާކޮށްފައެވެ. ޒަރޫރީ ބޭނުމެއްގައި ބޭރަށް ނިކުތުމުގެ ކުރިން ރިޕޯޓް ކުރުމަށް ފުލުހުންގެ ހޮޓްލައިނެއް ވެސް ވަނީ ގާއިމުކޮށްފައެވެ.

ފުލުހުން ބުނީ ޒަރޫރީ ބޭނުމެއްގައި ބޭރަށް ދިޔުމުގެ ކުރިން 3034444 އަށް ގުޅައި ރަޖިސްޓަރ ކުރަން ޖެހޭނެ ކަމަށެވެ.