މަހިބަދޫ ލޯންޗުތަކުގައި ރޯކޮށްލުން އެއީ ޓެރަރިސްޓް ހަމަލާއެއް ކަމަށް ބެލުމުގެ ފުރުސަތު އެބައޮތް: ފުލުހުން
ގަސްތުގައި ރާވާއިގެން ހިންގި އަމަލެއް
ހަ އުޅަނދެއްގައި ވަނީ ރޯކޮށްލާފައި
އދ. މަހިބަދޫ ބަނދަރުގައި އަޅާފައި އޮތް ހަ އުޅަނދެއްގައި ރޯކޮށްލީ ގަސްތުގައި ކަމަށް ފުލުހުން ބުނެފިއެވެ.
ބުދަ ދުވަހު އެމްއެންޑީއެފްއާ ފުލުހުން ގުޅިގެން ބޭއްވި ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، މިހާތަނަށް ހޯދި ހޯދުންތަކުން އެނގުނީ މަހިބަދޫ ފަޅުގައި އަޅާފައިވާ ލޯންޗުތަކުގައި ރޯކޮށްލީ ގަސްތުގައިަކަމަށެވެ.
އޭނާ ވިދާޅުވީ، އަލިފާނުގެ ހާދިސާ ތަހްގީގުކުރުމަށް ހެނދުނުން ފެށިގެން ފުލުހުންގެ ކްރިމިނަލް އިންވެސްޓިގޭޝަން ޑިޕާޓްމެންޓުން އެ ރަށުގައި ހަރަކާތްތެރިވަމުން އަންނަ ކަމަށެވެ. އަދި މިހާތާނަށް އެ ހާދިސާގައި އެއްވެސް މީހަކަށް އަނިވެފައިނުވާ ކަމަށް ސީޕީ ވިދާޅުވި އެވެ.
އެއީ ޓެރަރިޒަމްގެ ހަމަލާއެއްގެ ގޮތުގައި ވިދާޅުނުވަނީ ކީއްވެތޯ ނޫސްވެރިޔަކު ސުވާލުކުރުމުން ހަމީދު ވިދާޅުވީ އެ ކަމަކީ ވަކި ބާވަތެއްގެ ހަމަލާއެއްކަމަށް ބުނަން އަދި އަވަސް ކަމަށެވެ. ނަމަވެސް މިހާތަނަށް ތަހުޤީޤްގައި އެއްކުރެވިފައިވާ މައުލޫމާތުތަކުން އެއީ ޓެރަރިޒަމްގެ ހަމަލާއެއްކަމަށް ބެލުމުގެ ފުރުސަތުތައް އެބައޮތްކަމަށާއި، ވަކި ގޮތެއް ނިންމާނީ އެއްކޮށް ތަހުޤީޤް ނިމުންކަމަށް ހަމީދު ވިދާޅުވި އެވެ.
އެ ޕްރެސްކޮންފަރެންސްގައި ވާހަކަދައްކަވަމުން ޗީފް އޮފް ޑިފެންސް އަބްދުﷲ ޝަމާލް ވިދާޅުވީ، އެފަދަ ކަންތައްތައް އެއްވެސް ކަހަލަ ފުރުސަތެއް ފުލުހުން އަދި އެމްއެންޑީއެފުން ނުދޭނެ ކަމަށެވެ.
މަހިނބަދޫ ގައި އަލިފާނުގެ ހާދިސާ އެމްއެންޑީއެފް އަށް ލިބިފައިވަނީ ބުދަ ދުވަހުގެ ފަތިހު 05:45 ހާއިރުއެވެ.
މިޙާދިސާގައި މަހިބަދޫ ފަޅުތެރޭގައި އަޅާފައިވާ ފަސް ލޯންޗަކާއި، ދެ ޑިންގީއެއްގައި އަލިފާން ރޯވިކަމަށް އެމްއެންޑީއެފުން މަޢުލޫމާތުދެއެވެ. ރޯވެފައިވަނީ ޕޮލިސް ލޯންޗަކާއި، އެއަތޮޅު ކައުންސިލް ލޯންޗާ،އި ސީ އެމްބިޔުލެންސް ލޯންޗް އަދި އެޗްއެމްއެޗް އައި ޓްރެވަލްސް ކިޔާ ދެ ލޯންޗެއްގެ އިތުރުން ދެ ޑިންގީއެއްގައި ކަމަށް އެމްއެންޑީއެފުން ބުނެއެވެ.
