އެޗް1އެން1 ވައިރަސްގެ ވާހަކަ ކުރިން ހާމަނުކުރީ، އެއީ އެހާ މުހިންމުކަމަކަށް ނުފެންނާތީ: އެޗްޕީއޭ

ހަލުވިކަމާއެކު ފެތުރެމުންދާ، އެޗް1އެން1 ވައިރަސަށް ޕޮޒިޓިވް ކޭސްތަކެއް ފެނުނު ވާހަކަ ކުރިން ހާމަކޮށް، އެކަން އާންމު ރައްޔިތުންގެ ސަމާލުކަމަށް ނުގެނެވުނީ، އެއީ އެވަގުތަށް އެހާ މުހިންމު ކަމަކަށް ނުފެނުމުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

އެޗްޕީއޭއިން ހާމަކުރި މައުލޫމާތުތަކަށް ބަލާއިރު، ޖެނުއަރީ މަހުގައިވެސް އެޗް1އެން1 ވައިރަސަށް ޕޮޒިޓިވް ކޭސްތަކެއް ފެނިފައިވެއެވެ. އަދި ފެބުރުއަރީ މަހު ފެނުނު ކޭސްތަކުގެ އަދަދު ވަރަށް ބޮޑުތައް އިތުރުވެގެންގޮސްފައިވެއެވެ. މާރިޗު މަހު އެޗް1އެން1 ވައިރަސަށް ޕޮޒިޓިވް ކޭސްތަކުގެ އަދަދު އިންތިހާއަށް އިތުރުވެގެންދިޔައިރުވެސް، ކަމާބެހޭ އިދަރާތަކުން އެކަން އޮތީ ސިއްރުކޮށްފަ އެވެ.

އެ މައުލޫމަތު ސިއްރުކޮށްފަ ބެހެއްޓުމަށްފަހު، އެޗް1އެން1 ވައިރަސަށް ޕޮޒިޓިވް ކޭސްތަކެއް ފެނިފައިވާ ކަމަށް އެޗްޕީއޭއިން ހާމަކުރީ އާދިއްތަ ދުވަހުގެ ރޭ ދަންވަރުގެ ވަގުތެއްގައެއެވެ.

އެކަން ސިއްރުކުރީ ކީއްވެތޯ ހޯމަ ދުވަހުގެ ރޭ ބޭއްވި ޕްރެސް ކޮންފަރެންސެއްގައި ރާއްޖެޓީވީން ކުރި ސުވާލަކަށް ޖަވާބުދެއްވަމުން، ހެލްތު މިނިސްޓްރީގެ ޑިރެކްޓަ ޖެނެރަލް ޑރ. ޝީޒާ އަލީ ވިދާޅުވީ، އެޗް1އެން1 ވައިރަސަށް ޕޮޒިޓިވް ކޭސްތަކެއް ފެނުނުކަން ހާމަނުކުރިނަމަވެސް، ހުމާއި ރޯގާއި ގުޅިގެން ފިޔަވަޅުތަކެއް އެޅިކަމަށެވެ. އަދި ނިމުނު ހުކުރު ދުވަހު ހުމާއި ރޯގާއިން ރައްކާތެރިވުމަށް އިލްތިމާސްކޮށް ބަޔާނެއްވެސް ނެރުނު ކަމަށެވެ.

ޑރ. ޝީޒާ ވިދާޅުވީ، އެޗް1އެން1 ވައިރަސަށް ޕޮޒިޓިވް ކޭސްތަކެއް ފެނުނުކަން ހާމަކުރަން މުހިންމު ކަމަށް އެ ވަގުތު ނުފެނުނީ، ދުނިޔޭގެ އެހެން ޤައުމުތަކުގައިވެސް އުޅޭ ބައްޔަކަށްވާތީ ކަމަށެވެ. އަދި ރާއްޖެއިން ދޭތެރެ ދޭތެރެއިން އެ ބަލި ފެންނާތީ ކަމަށެވެ.

"އަޅުގަނޑުމެން މައުލުމާތު ވަކިން ހިފަހައްޓައިގެން ތިބީކީ ނޫން އިނގޭތޯ. އަޅުގަނޑުމެން ތިޔަ ވިދާޅުވާހެން ކޭސްތައް އިތުރުވާކަމަށް ފާހަގަކުރެވިގެން، ކަމާއިކަންފަށާ އެޗް1އެން1 އިތުރުވިއޭ ނުބުނިކަމުގައިވިޔަ، ހުމާއި އަރިދަފުސް ރޯގާ ރާއްޖޭގައި އާދަޔާ ހިލާފަށް ގިނަވަމުން އަންނަ ކަމަށް، އަޅުގަނޑުމެން ވާނީ ނޫސްބަޔާނާ އެއްޗެހި ނެރިފަ. އެޗް1އެން1 އައި ގުޅިގެން ދަންނަވަން އެއީ މުހިންމު ކަމެއްކަމަށް އަޅުގަނޑުމެންނަށް އެވަގުތު ނުފެނުނީ." ޑރ. ޝީޒާ ވިދާޅުވި އެވެ.

އެޗްޕީއޭއިން އެންމެފަހުން އާންމުކުރި މައުލޫމާތުތައް ބުނާގޮތުން އެޗް1އެން1 ވައިރަސަށް 51 މީހަކު ޕޮޒިޓިވް ވެފައިވެއެވެ. އަދި މަރުވި މީހެއްގެ ގައިންވެސް އެޗް1އެން1 ވައިރަސް ފެނިފައިވެއެވެ.