ޔުވެންޓަސްގައި ރޮނާލްޑޯ ހުރީ އުފަލުން: މެދީރާގެ ރައީސް
"ރޮނާލްޑޯ ޔުވެންޓަސްގައި އަދި ދެ ތިން އަހަރު މަޑު ކުރާނެ"
ކްރިސްޓިިއާނޯ ރޮނާލްޑޯ
އިޓަލީގެ ޔުވެންޓަސްއަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ، ޔުވެންޓަސްގައި ހުރީ އުފަލުން ކަމަށް އޭނާގެ އުފަން ރަށް މެދީރާގެ ރައީސް ރުއި އަލްވޭސް ވިދާޅުވެއްޖެއެވެ.
އަލްވޭސް މިހެން ވިދާޅުވިއިރު ރޮނާލްޑޯގެ ކުރީގެ ކްލަބު ރެއާލް މެޑްރިޑުން އޭނާއަށް އަލުން ބިޑުކުރަން އުޅޭކަމުގެ އަޑުތައް ވަނީ ގަދަވެފައެވެ.
އަލްވޭސް ވިދާޅުވީ ރޮނާލްޑޯ ޔުވެންޓަސްގައި ހުރީ އުފަލުން ކަމަށާއި އޭނާ ޔުވެންޓަސްގައި އަދި ދެތިން އަހަރު ހޭދަކުރާނެ ކަމަށެވެ. އަލްވޭސް އިތުރަށް ވިދާޅުވީ އޭނާ ބޭނުންވަނީ ރޮނާލްޑޯ ޔުވެންޓަސް އާއެކު ބަލޮންޑޯ އެވޯޑާއި ޔުއެފާ ޗެމްޕިއަންސް ލީގު އުފުލާލުން ކަމަށާއި، ރޮނާލްޑޯގެ ޓާގެޓަކީވެސް އެއީ ކަމަށެވެ.
އަލްވޭސް ވަނީ ލޮކްޑައުންގެ މުއްދަތުގައި ރޮނާލްޑޯއަށް މެދީރާ ނެޝަނަލް ސްޓޭޑިއަމްގައި ފަރިތަކުރުންތައް ކުރިއަށް ގެންދިޔުމުގެ ހުއްދަ ދީފައެވެ. މިކަމާއި ބެހޭ ގޮތުން އަލްވޭސް ވިދާޅުވީ ރޮނާލްޑޯއަށް މި ހުއްދަ ދިނީ އޭނާ އަކީ ދުނިޔޭގައި މިވަގުތު ހުރި އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ކުޅުންތެރިޔަކަށްވުމާއި، ރޮނާލްޑޯ އުމުރު މަތިވުމާއެކު އެއް ލެވަލްއެއްގައި ހުރުމަށް ރޮނާލްޑޯ ބޭނުންވާތީ ކަމަށެވެ.
މީގެ ކުރިން ހުއްދައާ ނުލައި މެދީރާ ނެޝަނަލް ސްޓޭޑިއަމްގައި ފަރިތަކުރުންތައް ކުރިއަށް ގެންދިޔުމުން ރޮނާލްޑޯއަށް ވަނީ ނަސޭހަތް ދީފައެވެ.
ޔުވެންޓަސްގައި ރޮނާލްޑޯ ހުރީ އުފަލުން ކަމަށް ރުއި އަލްވޭސް ވިދާޅުވިއިރު، ރިޕޯޓުތައް ބުނާ ގޮތުން ރޮނާލްޑޯ އަލުން އެނބުރި ރެއާލްއަށް ބަދަލުވާން ބޭނުންވާ ކަމަށް އޭނާގެ އޭޖެންޓް ކައިރީގައި ވަނީ ބުނެފައެވެ. މީގެ އިތުރުން ސީޒަންގެ ކުރީ ކޮޅު ރޮނާލްޑޯ އާއި ޔުވެންޓަސްގެ ކޯޗު މައުރީޒިއޯ ސާރީއާ ދެމެދު ހިތްހަމަ ނުޖެހުންތަކެއް އުޅުނު ކަމަށް ރިޕޯޓުތައް ވަނީ ބުނެފައެވެ. އެކަމަކު ސާރީ ވަނީ ފަހުން ރޮނާލްޑޯއާ އޭނާއާ ދެމެދު އެއްވެސް މައްސަލައެއް ނެތް ކަމަށް ބުނެފައެވެ.
ރޮނާލްޑޯ ރެއާލަށް ބަދަލުވާން އުޅޭކަމުގެ އަޑުތައް ގަދަވެފައިވަނިކޮށް، ރޮނާލްޑޯ ވަނީ ރެއާލްގެ ދަނޑުގައި ބާސެލޯނާއާ ދެކޮޅަށް ރެއާލް ކުޅުނު މެޗު ބަލަން ސްޕެއިނަށް ގޮސްފައެވެ. އަދި އެ މެޗުގެ ހާފް ޓައިމްގައި ރޮނާލްޑޯ ވަނީ ރެއާލްގެ ކުޅުންތެރިންނާއި ބައްދަލުކޮށްފައެވެ.
