ރަޝިޔާ އާއި ޗައިނާއިން އީރާނާ ދެކޮޅަށް އައިއޭއީއޭ އިން ހުށަހަޅަން އުޅުނު ގަރާރު ފެއިލްކޮށްލައިފި

އީރާނުގެ ނިއުކްލިއާ މައްސަލަ އދ. ގެ ސަލާމަތީ މަޖިލީހަށް ހުށަހެޅުމަށް ބައިނަލްއަގުވާމީ އެޓޮމިކް އެނާޖީ އެޖެންސީ (އައިއޭއީއޭ) ގެ ބޯޑް އޮފް ގަވަރނާސް އިން ތައްޔާރުކުރި ގަރާރަކީ ޣައިރު ގާނޫނީ އެއްޗެއް ކަމަށް ބުނެ، ރަޝިޔާ އާއި ޗައިނާއިން އީރާނާ އެކު އެ ގަރާރު ބޭރުކޮށްލައިފި އެވެ. މި ގަރާރަކީ އީރާނުން އެ އެޖެންސީގެ ގަވާއިދުތަކަށް އަމަލުނުކުރާ ކަމަށް ބުނެ ހުށަހަޅާފައިވާ ގަރާރެކެވެ.

އެމެރިކާ، އިނގިރޭސިވިލާތް، ފަރަންސޭސިވިލާތް އަދި ޖަރުމަނުވިލާތުން ހުށަހެޅި މި ގަރާރަކީ އެއްވެސް އޮއްޓަރެއް ނެތް އެއްޗެއްގެ ގޮތުގައި ސިފަކޮށް، ތިން ގައުމުން ގުޅިގެން ނެރުނު ބަޔާނެއް އީރާނުގެ ފޮރިން މިނިސްޓްރީން ބުދަ ދުވަހު ވަނީ އާންމުކޮށްފަ އެވެ.

މި ބަޔާނުގައި ބުނެފައިވަނީ، 2015 ވަނަ އަހަރު އީރާނާއި ދުނިޔޭގެ ބާރުތަކާ ދެމެދު ވެވުނު ނިއުކްލިއާ އެއްބަސްވުން ނުވަތަ ޖޭސީޕީއޯއޭގެ ދަށުން "ސްނެޕްބެކް" މެކޭނިޒަމް އިއާދަކުރުމަކީ ގާނޫނީ ބިންގަލެއް ނެތް ކަމެއް ކަމަށެވެ. ސަބަބަކީ ޖޭސީޕީއޯއޭ އަށް ތާއީދުކޮށް މީގެ 10 އަހަރަށް ވުރެ ކުރިން އދ. ގެ ސަލާމަތީ މަޖިލީހުން ފާސްކުރި ގަރާރުގެ މުއްދަތު 2025 އޮކްޓޫބަރު 18 ގެ ނިޔަލަށް ހަމަވެފައިވާތީ ކަމަށް އެ ބަޔާނުގައި ފާހަގަކޮށްފައިވެ އެވެ.

"މި އާ ގަރާރަކީ މިކަން ހުށަހެޅި ގައުމުތަކުން އީރާނަށް އިތުރު ފިއްތުންތައް ކުރިމަތިކުރުވައި، އީރާނާއި އައިއޭއީއޭ އާ ދެމެދު އޮތް އެއްބާރުލުން ހީނަރުކުރުމަށް ކުރާ އިތުރު މަސައްކަތެއް،" ބަޔާނުގައި ބުނެފައިވެ އެވެ.

މީގެ އިތުރުން، އދ. ގެ ސަލާމަތީ މަޖިލީހަށް މި މައްސަލަ ރިފަރ ކުރުމަށް ނިންމި ނިންމުމަކީ ގާނޫނީ ހަމަތަކާ ޚިލާފު، މަސްރަހު އިތުރަށް ގޯސްކުރުމަށް ކުރާ ކަމެއް ކަމަށާއި، މިއީ ޑިޕްލޮމެސީގެ މަގުން ކަންކަން ހައްލުކުރުމަށް އެ ގައުމުތަކުން ބުނާ ބުނުމާ ފުށުއަރާ ކަމެއް ކަމަށް ވެސް ބަޔާނުގައިވެ އެވެ.

އެމެރިކާއިން އީރާނާ ދެކޮޅަށް ހިންގަމުންދާ އުދުވާނީ އަމަލުތަކުގެ ސަބަބުން ގައުމުގެ ހާލަތު ބަދަލުވެފައިވީ ނަމަވެސް، އީރާނުން އައިއޭއީއޭ އާއެކު ރަނގަޅު ފެންވަރެއްގެ އެއްބާރުލުމެއް ދެމުންދާކަން އީރާނާއި ޗައިނާ އަދި ރަޝިޔާއިން ވަނީ ތަކުރާރުކޮށްފަ އެވެ.

އެމެރިކާއިން މެދުނުކެނޑި އީރާނަށް ދެމުންދާ ހަމަލާތަކުގެ ސަބަބުން، އައިއޭއީއޭ އިން އެ ގައުމުގެ ނިއުކްލިއާ މަރުކަޒުތައް ބަލައި ފާސްކުރުމަށް ކުރާ މަސައްކަތްތަކަށް ހުރަސް އެޅިފައިވާ ކަމަށް ބަޔާނުގައިވެ އެވެ. އެހެންނަމަވެސް، އީރާނުން އެ އެޖެންސީއާއެކު ބިނާކުރުވަނިވި އަދި އިޚްލާސްތެރިކަމާއެކު މަސައްކަތްކުރުމުގެ ސިޔާސަތު ދަމަހައްޓަމުންދާކަން ވަނީ ފާހަގަކޮށްފަ އެވެ.

"މިހާރު އުފެދިފައިވާ ހާލަތުގެ އަސްލު ސަބަބަކީ އީރާނަށް ދެމުންދާ ހަމަލާތައް ކަމަށް ވީނަމަވެސް، މި ގަރާރުގައި އެ ހަމަލާތަކާ ގުޅޭގޮތުން އެއްވެސް ވާހަކައެއް ސަރީހަބަހުން ބަޔާންކޮށްފައެއް ނުވޭ،" ގުޅިފައިވާ ބަޔާނުގައި ބުނެފައިވެ އެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އުފެދިފައިވާ ޚިޔާލުތަފާތުވުންތައް ހައްލުކުރެވެން އޮތް ހަމައެކަނި މަގަކީ، އެ ގައުމަށް ކުރިމަތިކުރަމުން ގެންދާ ހަމަލާތަކާއި ބިރުދެއްކުންތައް ހުއްޓާލައި، ހަމައެކަނި މަޝްވަރާ އާއި ޑިޕްލޮމެސީގެ ޒަރީއާއިން މައްސަލަ ހައްލުކުރުން ކަމަށް އެ ބަޔާނުގައި ވަނީ ބުނެފަ އެވެ.