އީރާނުން ދިން ބަދަލު ހިފުމުގެ ހަމަލާގައި އެމެރިކާގެ ގިނަ އަދަދެއްގެ ފައިޓަރ ޖެޓް ތަކަށް ގެއްލުން ލިބިއްޖެ

އުރުދުންގައި އެމެރިކާއިން ހިންގާ ސަލްތީ އެއަރ ބޭސް ނުވަތަ އަލް-އަޒްރަޤް ބޭސްއަށް އީރާނުން ދިން ބަދަލުހިފުމުގެ ހަމަލާތަކުގައި، އެމެރިކާ އަސްކަރިއްޔާގެ ގިނަ އަދަދެއްގެ މަތިންދާބޯޓުތަކަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެފި އެވެ.

ސީ.ބީ.އެސްގެ ރިޕޯޓަރަކު ބުދަ ދުވަހު އެކްސްގައި ކުރި ޕޯސްޓެއްގައި ބުނެފައިވަނީ، އީރާނުގެ ހަމަލާތަކުގައި އެމެރިކާގެ އޭ-10 ތަންޑަރބޯލްޓް (ވޯރޓްހޮގްގެ ނަމުންވެސް ނަންދެވިފައިވާ) މަތިންދާބޯޓެއްގެ ފިޔަގަނޑު ވަކިވެގެން ގޮސްފައިވާ ކަމަށެވެ. މީގެ އިތުރުން، އެމެރިކާގެ އެފް-15 މަރުކާގެ އަށް ފައިޓަރ ޖެޓަކަށްވެސް އެކިވަރުގެ ގެއްލުންތައް ލިބިފައިވާ ކަމަށް އެ ރިޕޯޓުގައިވެ އެވެ.

އީރާނުގެ ހަމަލާތަކުން ދިފާއުވުމަށްޓަކައި އުރުދުންގައި ތިބި އެމެރިކާގެ ސިފައިން 30 އަށްވުރެ ގިނަ ޕެޓްރިއަޓް މިސައިލް ފޮނުވާލާފައިވާ ކަމަށް އެ ރިޕޯޓުގައި ފާހަގަކޮށްފައިވެ އެވެ. މިއީ އީރާނާއެކު ކުރަމުންދާ ހަނގުރާމައިގެ ސަބަބުން އެމެރިކާގެ ހަތިޔާރުގެ ސްޓޮކް މަދުވެ، ހަމަލާތައް ހުއްޓުވުމަށް ބޭނުންކުރާ އިންޓަރސެޕްޓަރ މިސައިލްތައް ހުސްވަމުންދާ ކަމަށް މީގެ ކުރިން ފެތުރިފައިވާ ރިޕޯޓްތަކަށް ލިބުނު އިތުރު ބާރެކެވެ.

އުރުދުންގެ ވެރިރަށް އައްމާނާ ގާތްގަނޑަކަށް 100 ކިލޯމީޓަރު ދުރުގައި އޮންނަ މުވައްފަޤު ސަލްތީ އެއަރ ބޭސްއަކީ އެމެރިކާގެ ސިފައިން ބޭނުންކުރާ މުހިންމު މަރުކަޒެކެވެ. އިސްލާމީ ޖުމްހޫރިއްޔާ އީރާނަށް އަމާޒުކޮށް އެމެރިކާއިން ދެމުންދާ ނުރައްކާތެރި ހަމަލާތަކުގެ ބަދަލުހިފުމުގެ ގޮތުން، އީރާނުން ތަކުރާރުކޮށް މި މަރުކަޒަށް ހަމަލާދީފައިވެ އެވެ.

ބުދަ ދުވަހުގެ ކުރީކޮޅު، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފައިވަނީ، އެމެރިކާއިން އީރާނުގެ ވިޔަފާރި އަދި ތެޔޮ އުޅަނދުތަކަށް ދިން ހަމަލާތަކާ ގުޅިގެން، އެ ޖަމާއަތުގެ އެއަރޯސްޕޭސް ފޯސްއިން މުވައްފަޤު ސަލްތީ އެއަރ ބޭސްއަށް ގިނަ އަދަދެއްގެ މިސައިލް ހަމަލާތަކެއް ދީފައިވާ ކަމަށެވެ.

މަތިންދާބޯޓުތައް މަރާމާތުކުރާ ހެންގަރުތަކާއި، ބޯޓުތައް ތައްޔާރުކުރާ ވަސީލަތްތަކުގެ އިތުރުން އެފް-35، އެފް-16 އަދި އެފް-15 މަރުކާގެ ހަނގުރާމަމަތީ ބޯޓުތައް ބަހައްޓާފައި ހުރި ހިޔާވަހިތަކަށް އަމާޒުކޮށް ދިން މި ހަމަލާތަކުގައި، ދުޝްމަނުންނަށް "ބޮޑެތި ގެއްލުންތަކެއް" ލިބިފައިވާ ކަމަށްވެސް އެ ފަރާތުން ބުނެފައިވެ އެވެ.

އައި.އާރު.ޖީ.ސީ އިން ނެރުނު ބަޔާނެއްގައި ބުނެފައިވަނީ، ހުރްމުޒް ކަނޑުއޮޅީގައި އައި.އާރު.ޖީ.ސީގެ ވަރުގަދަ ކަނޑުގެ ސިފައިންނާ ކުރިމަތިލާން ޖެހުމުން، ދުޝްމަނުން ނުކުޅެދުންތެރިކަމާއި ބަލިކަށިކަމުގެ ތެރެއިން މާޔޫސީ ފިޔަވަޅުތަކެއް އެޅި ކަމަށާއި، ނަމަވެސް ވަގުތުން އެކަމަށް ވަރުގަދަ ރައްދު ހަމަލާއެއް ދީފައިވާ ކަމަށެވެ.

އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ޣައިރު ގާނޫނީ އުދުވާނީ ހަނގުރާމައެއް ފަށާފައިވަނީ ފެބްރުއަރީ މަހުގެ 28 ވަނަ ދުވަހު އެވެ.

އޭގެ ސާޅީސް ދުވަސް ފަހުން، އޭޕްރިލް މަހުގެ 8 ވަނަ ދުވަހު، އީރާނުގެ ސާބިތުކަމާއި، ކާމިޔާބު ބަދަލުހިފުމުގެ އޮޕަރޭޝަންތަކުގެ އިތުރުން ހުރްމުޒް ކަނޑުއޮޅީގެ މައްޗަށް އޮތް ވަރުގަދަ ބާރުވެރިކަމުގެ ސަބަބުން، ހަނގުރާމަ ހުއްޓާލުމުގެ އެއްބަސްވުމަކަށް އައުމަށް ދުޝްމަނުންނަށް މަޖުބޫރުވި އެވެ.

ނަމަވެސް، ހަނގުރާމަ ނިންމުމަށްޓަކައި ޖޫން 17 ގައި ސޮއިކުރި އިސްލާމްއާބާދު މެމޮރެންޑަމް އޮފް އަންޑަރސްޓޭންޑިންގ (އެމް.އޯ.ޔޫ) އާ ޚިލާފަށް، ޖުލައި މަހުގެ ތެރޭގައި އެމެރިކާއިން ވަނީ އީރާނަށް ނުރައްކާތެރި ވައިގެ ހަމަލާތަކެއް ދީ، އެ ގައުމުގެ ކަނޑުގެ ސަރަހައްދު ބަންދުކޮށްފަ އެވެ.

މީގެ ރައްދުގައި، އީރާނުގެ ހަތިޔާރު އެޅި ފައުޖުތަކުން ވަނީ ހުޅަނގު އޭޝިއާގައި ހުރި އެމެރިކާގެ އިސްތިރާތީޖީ މަރުކަޒުތަކަށް ވަރުގަދަ ހަމަލާތަކެއް ދީ، ހުރްމުޒް ކަނޑުއޮޅިން ދަތުރުފަތުރު ކުރުން ހުރިހާ ފަރާތްތަކަށް ބަންދުކޮށްފައިވާކަން އިޢުލާނުކޮށްފަ އެވެ.