އަތު ލިޔުމުން ލިޔެފައިވާ ބީޓްލްސް ލަވައެއްގެ ލިރިކްސް 910،000 ޑޮލަރަށް ވިކިއްޖެ

މަޝްހޫރު އިނގިރޭސި ބޭންޑު، ދަ ބީޓްލްސް ގެ ހިޓް ލަވަ "ހޭ ޖޫޑް" ގެ އަތު ލިޔުމުން ލިޔެފައިވާ ލިރިކްސް ކަރުދާހެއް 910،000 ޑޮލަރަށް ވިކިއްޖެ އެވެ.

ޖޫލިއަން އޯކްޝަންސް އިން ނީލަން ކިޔާފައިވާ މި ކަރުދާހުގައި ވަނީ، ބީޓްލްސް ގެ ގިޓަރިސްޓް އަދި ލަވަކިޔުންތެރިޔާ ޕޯލް މެކަރޓްނީގެ އަތު ލިޔުމެވެ. މިއީ 1968 ވަނަ އަހަރު ބޭއްވި ރެކޯޑިންގ ސެޝަނެއްގައި އެ ބޭންޑުން ބޭނުންކުރި ލިރިކްސް ކަރުދާހެކެވެ.

އެ ބޭންޑު ރޫޅުނުތާ 50 އަހަރު ފުރުމާ ގުޅިގެން ބޭއްވި ނީލަމުގައި 250 އަށް ވުރެ ގިނަ އައިޓަމް ވަނީ ނީލަން ކިޔާފައެވެ. އޭގެ ތެރޭގައި އެ ބޭންޑުން އުތުރު އެމެރިކާގައި ބޭނުންކުރި ބޭންޑު ލޯގޯ ޖެހި ޑްރަމް ހެޑަކާއި، ބޭންޑުގެ މެންބަރު ޖޯން ލެނަން އަދި ޔޯކޯ އޯނޯ ގެ ކުރެހުމަކާއި، ބެރުޖެހުންތެރިޔާ ރިންގޯ ސްޓަރ ބޭނުންކުރި އަޅިކެނޑިއެއް ވެސް ވަނީ ބޮޑު އަގުގައި ވިކިފައެވެ.

ހޭ ޖޫޑް ލަވައަކީ ބީޓްލްސް ގެ އެންމެ މަގުބޫލު އަދި އެންމެ މަޝްހޫރު ލަވަތަކުގެ ތެރޭގައި ހިމެނޭ ލަވައެކެވެ. އެ ލަވަ ވަނީ ޕްލެޓިނަމް ރޭޓިންގ ވެސް ހޯދާފައެވެ. އަދި މިއީ މިއުޒިކާއި މުނިފޫހިފިލުވުމުގެ ޚަބަރުތައް ގެނެސްދޭ ބިލްބޯޑް މަޖައްލާ ގެ "އޯލް ޓައިމް ހޮޓް 100 ސޯންގްސް" ލިސްޓުގައި ހިމެނޭ ލަވައެކެވެ.