މަޝްޙޫރު ސައިންޓިސްޓް، އެލްބަރޓް އެއިންސްޓެއިން، އޭނާގެ "އުފާވެރިކަމުގެ ސިއްރުގެ ފަލްސަފާ"ގެ ޚުލާސާއެއް ލިޔެފައިވާ ނޯޓެއް ދޮޅު މިލިއަން ޑޮލަރަށް ވުރެ އަގުބޮޑުކޮށް ނީލަން ކިޔައިފިއެވެ.
ގުދުސްގައި ކުރިއަށް ދިޔަ ނީލަމުގައި އެއިންސްޓެއިންގެ އަތުލިޔުމުން ލިޔެފައިވާ މި ނޯޓްކޮޅު ނީލަންކިޔާފައި ވަނީ 1.56 މިލިއަން ޑޮލަރަށެވެ. މިއީ މި ނޯޓު ވިކޭނެ ކަމަށް ލަފާކުރެވުނު އަގަށް ވުރެ ވަރަށް ބޮޑަށް އިތުރު އަދަދެކެވެ. ނީލަން ކިއުމަށް މި ނޯޓު ހުށަހެޅުނު އިރު ލަފާކުރެވިފައި އޮތީ، މި ނޯޓު އެންމެ އަގުބޮޑުކޮށް ވެސް ވިއްކާލެވޭނީ 5000 ނުވަތަ 8000 ޑޮލަރަށް ކަމަށެވެ.
ނީލަންކީ ފަރާތުން ބުނީ މި ނޯޓު ގަނެފައިވަނީ ޔޫރަޕުގެ މީހެއް ކަމަށާ، ނަމަވެސް އެއީ ކާކުކަން ހާމަ ނުކުރުމަށް އެފަރާތުން އެދިފައިވާ ކަމަށެވެ. އެފަރާތުން އިތުރަށް ބުނެފައިވަނީ، ކުރިއަރަމުންދާ މިއަދުގެ ދުނިޔޭގައި ވެސް ސައިންސާއި ތާރީޚަށް ޝަޢުޤުހުރި ފަރާތްތައް ތިބި ކަމަށްޓަކާ އުފާކުރާ ކަމަށެވެ.
ޓޯކިޔޯގެ އިމްޕީރިއަލް ހޮޓެލްގެ ލެޓަރހެޑް ކަރުދާހެއްގައި ޖަރުމަނުބަހުން ލިޔެފައިވާ މި ނޯޓުގައި އެއިންސްޓެއިން ލިޔެފައިވަނީ "ކާމިޔާބުގެ ފަހަތުން ދުވާ، ހަމަނުޖެހުން ބޮޑު ދިރިއުޅުމަކަށް ވުރެ، މަޑުމައިތިރި، ހަމަހިމޭން ދިރިއުޅުމަކުން ލިބޭ އުފާ އިތުރު" ކަމަށެވެ.
މީގެ އިތުރުން ހަމަ އެދުވަސްވަރު އެއިންސްޓެއިން ލިޔެފައިވާ މިފަދަ އިތުރު ނޯޓެއް ވެސް ވަނީ 240،000 ޑޮލަރަށް ވިކިފައެވެ.
