ދ. ކުޑަހުވަދޫ ގައި ލައިސެންސް ނެތި ސައިކަލް ދުއްވަނިކޮށް އެކްސިޑެންޓެއް ހިނގައިފިއެވެ.

ފުލުހުން ބުނީ، ދ. ކުޑަހުވަދޫ މެރިން ޑްރައިވް މަގުން އިރުން ހުޅަނގަށް ދުއްވާފައި ދިޔަ ސައިކަލެއް ކޮންޓްރޯލް ނުވެގޮސް މަގުގައި ހުރި ކެފޭއެއްގެ ކުރިމަތީ ޕާކްކޮށްފައި ހުރި ތިން ސައިކަލެއްގައި ޖެހި އެކްސިޑެންޓްވެގެން އާދިއްތަ ދުވަހު ހެނދުނު 06:15 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

ފުލުހުން ބުނީ، އެ އެކްސިޑެންޓް ހިނގި ވަގުތު ދުއްވާފައި ދިޔަ ސައިކަލް ގައި ދެ މީހުން ތިބި ކަމަށެވެ. އަދި އެކްސިޑެންޓްގައި އެތަނުން އެއް ސައިކަލް ދުއްވަން އިން އުމުރުން 18 އަހަރުގެ މީހާގެ ގައިގެ އެކި ތަންތަން މަށައިގެން ގޮސްފައިވާ ކަމަށެވެ. ފުލުހުން ބުނީ، ސައިކަލުގެ ފަހަތުގައި އިން 18 އަހަރުގެ މީހާގެ ކަނާތުފައިގެ ކުޑަ ހުޅުން ދުޅަވެ، ބޮލުގެ މަތިން ކުޑަ ތަންކޮޅެއް ފަޅައިގެން ގޮސް، ގައިގެ އެކިތަންތަން މަށައިގެން ގޮސްފައިވާ ކަަމަށެވެ.

އެ އެކްސިޑެންޓްގައި ދުއްވާފައި ދިޔަ ސައިކަލަށާއި، ޕާކް ކޮށްފައިހުރި ސައިކަލްތަކަށް އެކިވަރުގެ ގެއްލުން ލިބިފައިވާ ކަމަށް ފުލުހުންގެ އިދާރާ އިން ބުންޏެވެ. ފުލުހުން ބުނީ، އެކްސިޑެންޓްގައި ސައިކަލް ދުއްވަން އިން މީހާ އަތުގައި ލައިސެންސް ނެތް ކަމަށެވެ. މި މައްސަލަ ފުލުހުން ދަނީ ތަހުޤީޤު ކުރަމުންނެވެ.