ކޮވިޑަށް ފަރުވާ ދިނުމަށް ބޭނުންކުރާ އެންޓި މެލޭރިއާ ޑްރަގް އިންޑިޔާއިން ދޫކުރާ ގައުމުތަކުގެ ތެރޭގައި ރާއްޖެ

ދުނިޔޭގެ އެކި ކަންކޮޅުތަކުގައި ހަލުވި މިނުގައި ފެތުރެމުންދާ ކޮވިޑް-19 ޖެހޭ މީހުންނަށް ފަރުވާދިނުމަށް ބޭނުންކުރާ އެންޓި މެލޭރިއާ ޑްރަގް ނުވަތަ ހައިޑްރޮސިކްލޮރޯކުއިން އުފައްދަމުންދާ އަވަށްޓެރި އިންޑިޔާއިން އެ ޑްރަގް އެކްސްޕޯޓްކުރާ ގައުމުގެ ތަކުގެ ތެރޭގައި ރާއްޖެ ހިމަނައިފި އެވެ.

ކޮވިޑް-19 ފެތުރެމުންދާތީ އިންޑިޔާގައި އުފައްދާ އެންޓި މެލޭރިޔާ ޑްރަގް އެކްސްޕޯޓްކުރުން ވަނީ މެދުކަނޑާލާފައެވެ. ކޮވިޑް-19 އިންޑިޔާގައިވެސް އަންނަނީ ފެތުރެމުންނެވެ. އެހެންނަމަވެސް އިންޑިޔާއިން މިވަނީ މި ޑްރަގް އެކްސްޕޯޓްކުރާނެ 13 ގައުމެއް ހިމެނޭ ލިސްޓެއް އާންމުކޮށްފަ އެވެ. މިލިސްޓުގެ ކުރީގައި އުޅެނީ ސަރަހައްދީ ގައުމުތަކަށްވާއިރު މި ލިސްޓުގައި ރާއްޖެވެސް ހިމެނެއެވެ. ސަރަހައްދީ ގައުމުތަކުގެ ތެރެއިން މި ޑްރަގް ދޫކުރުމަށް އިންޑިޔާއިން ނިންމާފައިވަނީ ނޭޕާލް، ބޫޓާން ،އަފްޣާނިސްތާން ، ދިވެހިރާއްޖެ އަދި ބަންގްލަދޭޝް އެވެ.

ރާއްޖެއިން އެކަމަށް އެދުމުން މި ޑްރަގް ދޫކުރާ ގައުމުތަކުގެ ލިސްޓުގައި ރާއްޖެ ހިމެނުމުން ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވީޓެއްގައި ވަނީ އިންޑިޔާއަށް ޝުކުރު އަދާކުރައްވާފަ އެވެ.

އަދި ޑިފެންސް މިނިސްޓަރ މާރިޔާ އަހުމަދު ދީދީ ކުރެއްވި ޓްވީޓެއްގައިވެސް ވަނީ ލިސްޓުގައި ރާއްޖެ ހިމެނުމުން އެކަމަށް އިންޑިޔާއަށް ޝުކުރު އަދާކުރައްވާފަ އެވެ.

ރާއްޖޭންވެސް ކޮވިޑް-19 ފެނިފައިވާއިރު ފަރުވާއެއްގެ ގޮތުގައި ރާއްޖޭގައި ވެސް ބައެއް ހާލަތުގައި އެންޓި މެލޭރިއާ ޑްރަގް ބޭނުންކުރާނެ ކަމަށް ކޮވިޑް-19 އާ ދެކޮޅަށް ސަރުކާރުން ކުރާ މަސައްކަތުގެ އެންމެ އިސް ޓީމު ކަމަށް ވާ ޓެކްނިކަލް އެޑްވައިޒަރީ ގުރޫޕް (ޓެގް)ގެ ލީޑަރު ޑރ. އަލީ ލަތީފް ވަނީ ވިދާޅުވެފަ އެވެ. އެންޓި މެލޭރިއާ ޑްރަގް ނުވަތަ ހައިޑްރޮސިކްލޮރޯކުއިން މިހާރުވެސް ބައެއް ގައުމުތަކުގައި ކޮވިޑް-19 އަށް ފަރުވާދޭން އަންނަނީ ބޭނުންކުރަމުންނެވެ.

ރާއްޖޭގައި މިހާތަނަށް 19 މީހަކަށް ކޮވިޑް-19 ޖެހިފައިވާއިރު މިހާތަނަށް 13 މީހަކު ވަނީ ރަނގަޅުކުރެވިފަ އެވެ. އަދި މިހާރު 4 މީހަކަށް ރާއްޖޭގައި ފަރުވާދެމުން އަންނައިރު މިއެންމެންނަކީވެސް ދިވެހިންނެވެ.