ކުޅުންތެރިންގެ މުސާރަ ކުޑަކުރަން ވެސްޓް ހޭމުން ނިންމައިފި

މިހާރު ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދިމާވާނެ މާލީ ދަތިތަކުން އަރައިގަތުމަށް، ކުޅުންތެރިންގެ މުސާރަ ކުޑަކުރަން އިނގިރޭސި ޕްރިމިއާ ލީގުގައި ވާދަކުރަމުން އަންނަ ވެސްޓް ހޭމް ޔުނައިޓެޑުން ނިންމައިފި އެވެ.

ކުޅުންތެރިންގެ މުސާރަ ކުޑަކުރަން ވެސްޓް ހޭމުން ނިންމިއިރު، އެޓީމަކީ ޕްރިމިއާ ލީގުން ކުޅުންތެރިންގެ މުސާރަ ކުޑަކުރި ދެވަނަ ޓީމެވެ. މީގެ ކުރިން ސައުތެމްޓަނުން ވަނީ ކުޅުންތެރިންގެ އިތުރަށް އެޓީމުގެ ކޯޗާއި އޮފިޝަލުންގެ އިތުރުން ބޯޑް މެމްބަރުންގެވެސް މުސާރަވެސް ކުޑަކޮށްފައެވެ.

ވެސްޓް ހޭމްގެ ކުޅުންތެރިންގެ މުސާރަ ކުޑަކުރިއިރު، އެޓީމުގެ ކޯޗު ޑޭވިދް މޮޔެސް އާއި ވައިސް ޗެއާމަން ކެރެން ބްރެޑީ ވަނީ މުސާރައިން 30 އިންސައްތަ އުނިކުރަން ނިންމާފައެވެ. އަދި އެޓީމުގެ ޖޮއިންޓް ޗެއާމަނުން ކަމަށްވާ ޑޭވިޑް ގޯލްޑް އާއި ޑޭވިޑް ސުލިވަން ވަނީ ޓީމުގެ ހިއްސާދާރުންނާ ގުޅިގެން އިތުރު 30 މިލިއަން ޔޫރޯ ބަޖެޓަށް ލާފައެވެ. މި ފައިސާއަކީ ކޮވިޑް-19 އާ ގުޅިގެން ކްލަބަށް ދިމާވާނެ މާލީ ގޮންޖެހުންތަކުން އަރައިގަތުމަށްޓަކައި ކްލަބަށް ހަދިޔާކުރި ފައިސާއެވެ. ވެސްޓް ހޭމްގެ ޖޮއިންޓް ޗެއާމަނުން ކަމަށްވާ ޑޭވިޑް ގޯލްޑް އާއި ޑޭވިޑް ސުލިވަން، މި ފާއިތުވީ 10 އަހަރުވެސް އެ ކްލަބުގެ މުސާރަ ނުނަގާ ކަމަށް ވަނީ ރިޕޯޓުކޮށްފައެވެ.

ވެސްޓް ހޭމްއިން އެޓީމުގެ ކުޅުންތެރިންގެ މުސާރަ ކުޑަކުރިއިރު، ޕްރިމިއާ ލީގުގެ ކުޅުންތެރިންގެ މުސާރަ ކުޑަކުރަން ފްރޮފެޝަނަލް ފުޓްބޯލާސް އެސޯސިއޭޝަން (ޕީއެފްއޭ) އިން މީގެ ކުރިން ވަނީ ދެކޮޅު ހަދާފައެވެ. އެކަމަކު ވަރަށް އަވަހަށް ޕްރިމިއާ ލީގު ކްލަބުތަކުން ކުޅުންތެރިންގެ މުސާރައިން 30 އިންސައްތަ އުނިކުރާނެ ކަމަށް ރިޕޯޓުތައް ބުނެއެވެ.