ފްރާންސްގެ އޮލިމްޕިކް ޑީ މާސޭ އަށް ޑިމިޓްރީ ޕަޔެޓް ވިއްކާލުމަށް ވެސްޓްހަމް ޔުނައިޓެޑުން އެއްބަސްވެއްޖެއެވެ.
ވެސްޓްހަމްގެ ކުރީގައި މޮޅު ކުޅުމެއް ދައްކަމުން އަންނަ ޕަޔެޓް 25 މިލިއަން ޕައުންޑަށް މާސޭ އަށް ވިއްކާލުމަށް އެ ކްލަބުން އެއްބަސްވެފައިވާއިރު، އެ ކްލަބުން ވަނީ އެކަން ހާމަކޮށް ރަސްމީ ޓުވީޓާ އެކައުންޓުން ޓޫވީޓްވެސްކޮށްފައެވެ.
މީގެއިތުރުން ޕަޔެޓްވެސް ވަނީ އޭނާގެ ރަސްމީ ޓުވިޓާގައި "ބެކް ޓު ހޯމް" ޖެހުމަށްފަހު ޓުވީޓްކޮށްފައެވެ. ބެލެވޭ ގޮތުގައި އޭނާ އެހެން ޓުވީޓްކޮށްފައިވަނީ އެނބުރި ފްރާންސް އަށް ގޮސް އޭނާ ކުރިން ކުޅުނު ކްލަބަށް ކުޅޭތީއެވެ.
ނިމިގެންދިޔަ ޔޫރޯ ފުޓުބޯޅަ މުބާރާތުގައި މޮޅު ކުޅުމެއް ފްރާންސްއަށް ދައްކާފައިވާ ޕަޔެޓް ހޯދުމަށް ގިނަ ކްލަބްތަކުން ވަނީ މަސައްކަތްކޮށްފައެވެ. އޭގެ ތެރޭގައި ސްޕެއިން އަދި އިޓަލީގެ ކްލަބްތައްވެސް ހިމެނެއެވެ.
މާސޭއަށް މީގެކުރިންވެސް ކުޅެފައިވާ ޕަޔެޓް އެ ކްލަބް ދޫކޮށްލުމަށްފަހު ވެސްޓްހަމްއާ ގުޅުނީ 2015 ވަނަ އަހަރެވެ. އެގޮތުން އޭނާ ވަނީ އެ ކްލަބަށް ވޭތުވެ ދިޔަ ދެ ސީޒަނުގައި ކުޅުނު 60 މެޗުގައި 15 ލަނޑު ކާމިޔާބުކޮށްފައެވެ.
މިދިޔަ ސީޒަނުގައި ޕްރިމިއާ ލީގުގެ ޓީމް އޮފް ދަ އިޔާގައި ހިމެނުނު ޕަޔެޓް ވަނީ ވެސްޓްހަމްގެ އެންމެ މޮޅު ކުޅުންތެރިޔާގެ މަގާމުވެސް މިދިޔަ ސީޒަނުގައި ހޯދާފައެވެ.
