ކ. މާލެ
|
10 އޭޕްރިލް 2020 | ހުކުރު 15:23
ސާފު ނުކުރާ ތެޔޮ އުފައްދާ ކާރުހާނާއެއް
ސާފު ނުކުރާ ތެޔޮ އުފައްދާ ކާރުހާނާއެއް
ރޮއިޓަރސް
ތެޔޮ އުފެއްދުން މަދުކުރުން
ތެޔޮ އުފައްދާ މިންވަރު މަދުކުރަން ރަޝިއާ އާއެކު އޯޕެކުން އެއްބަސްވުމަކަށް އާދެވިއްޖެ
 
ކޮރޯނާވައިރަސް އާ ގުޅިގެން ދުނިޔޭގެ ބާޒާރުގައި ތެލުގެ އަގާއި ޑިމާންޑު ވަނީ ދަށަށް ގޮސްފައި
 
މިހެން އެއްބަސްވެފައި ވަނީ ތެޔޮ އުފައްދާ މިންވަރު މަދުކުރުމަށް އެމެރިކާއިން ބާރުއަޅާފައި ވަނިކޮށް
 
ޖުލައި މަހާ ހަމައަށް ދުވާލެއްގެ މައްޗަށް އުފައްދާ މިންވަރު 10 މިލިއަން ފީފާ މަދުކުރަން އެއްބަސްވި

ދުނިޔޭ ގެ ބާޒާރު ގައި ތެލަށް އޮތް ޑިމާންޑު ދަށްވުމާއި ގުޅިގެން، ތެޔޮ އުފައްދާ މިންވަރު މަދުކުރަން އޯޕެކް އާއި ރަޝިއާ އިން އެއްބަސްވުމަކަށް އައިސްފި އެވެ.

އޯޕެކް އާއި ރަޝިއާ އިން އެއްބަސްވެފައިވާ ވަނީ ޖޫން މަހުގެ ނިޔަލަށް، ދުވާލެއްގެ މައްޗަށް އުފައްދާ ތެޔޮ ފީފާ ގެ އަދަދު 10 މިލިއަން ފީފާ އިން މަދުކުރުމަށެވެ. މިއީ ތެޔޮ އުފައްދާ ގައުމުތަކުން، ދުވާލެއްގެ މައްޗަށް އުފައްދާ ތެޔޮ ފީފާގެ އަދަދު މިހާ ބޮޑު އަދަދަކަށް މަދުކުރަން ނިންމި ފުރަތަމަ ފަހަރެވެ.

މިއީ ޖުމްލަ ތެޔޮ އުފައްދާ ނިސްބަތަށް ބަލާއިރު، 10 އިންސައްތައިގެ ދަށް ވުމެކެވެ. ނަމަވެސް، މިއީ ޑިމާންޑު ދަށަށް ގޮސްފައިވާ އަދަދާ އަޅާ ބަލާއިރު، އެކަށީގެންވާ އަދަދެއް ނޫން ކަމަށް މާހިރުން ވަނީ ބުނެފަ އެވެ. ކޮރޯނާވައިރަސް ބަލިމަޑުކަމާއި ގުޅިގެން، ދުނިޔޭގެ ބާޒާރު ގައި ތެލަށް އޮތް ޑިމާންޑު ވަނީ ބޮޑު ތަނުން ދަށަށް ގޮސްފަ އެވެ. އަދި މިއީ، ތެލުގެ އަގުތައް މަތިކުރަން މެދުވެރިއަކަށް ވެދާނެ ނިންމުމަކާއި މެދު، މާހިރުން ވަނީ ސުވާލު އުފައްދާފަ އެވެ.

މި އެއްބަސްވުމަށް އާދެވިފައި ވަނީ، ވީޑިއޯ ކޮންފަރެންސް މެދުވެރިކޮށް ބޭއްވި ބައްދަލުވުމަކަށް ފަހުގަ އެވެ. މި ބައްދަލުވުމު ގައި އޯޕެކް ގެ ގައުމުތަކަށް ނިސްބަތްވާ ގައުމުތަކުގެ ތެލާ ބެހޭ ވަޒީރުންނާއި، އޯޕެކް ނޫން ތެޔޮ އުފައްދާ ގައުމުތަކުގެ ވަޒީރުން ބައިވެރިވެވަޑައިގެންނެވި އެވެ.

މި ބައްދަލުވުން ފެއްޓެވުމުގެ ގޮތުން ވާހަކަ ދެއްކެވި އޯޕެކް ގެ ސެކެޓްރީ ޖެނެރަލް މުހައްމަދު ސަނޫސީ ބަރކިންދޯ ވަނީ ތެލުގެ އަގު ދަށަށް ދިއުމާއި، ޑިމާންޑު ދަށް ވަމުންދާ މައްސަލައި ގައި ކަންބޮޑުވުން ފާޅުކުރައްވާފަ އެވެ. ތެޔޮ އުފައްދާ ގައުމު ތަކުގެ މި ވަގުތުގެ ހާލަތު ބަރކިންދޯ ސިފަކުރެއްވީ، "ލޭ މަނާ ނުވެ، ލޭ ބޭރުވަމުންދާ" ސިނާއަތެއްގަ ގޮތުގަ އެވެ.

މާހިރުން ކޮށްފައިވާ އަންދާޒާ ތަކަށް ރިއާޔަތް ކުރައްވާ ބަރކިންދޯ ވިދާޅުވީ، ދުވާލެއްގެ މައްޗަށް އުފައްދާ ތެޔޮ ފީފާ ގެ އަދަދު ގެ ތެރެއިން 12 މިލިއަން މަދުކުރަން ޖެހޭ ކަމަށެވެ. އަދި މިހާރު އުފައްދާ މިންވަރަށް ތެޔޮ އުފައްދާ ނަމަ، ޑިމާންޑަށް ވުރެ އިތުރަށް ދުވާލެއްގެ މައްޗަށް 14.7 މިލިއަން ތެޔޮ ފީފާ އުފެއްދޭނެ ކަމަށް ވިދާޅުވި އެވެ.

މިހާރު އެއްބަސްވެފައިވާ ގޮތުން ނަމަ، ޖުލައި މަހަށް ފަހު ދުވާލެއްގެ މައްޗަށް އުފައްދާ ތެޔޮ ފީފާ ގެ އަދަދު 8 މިލިއަން ދަށްކުރަން ޖެހެ އެވެ. އަދި އަންނަ އަހަރުގެ ޖެނުއަރީ މަހުން ފެށިގެން 2022 ވަނަ އަހަރުގެ އެޕްރިލް މަހާ ހަމައަށް ދުވާލެއްގެ މައްޗަށް އުފައްދާ ތެޔޮ ފީފާގެ އަދަދު 6 މިލިއަން ދަށްކުރަން ޖެހެ އެވެ.

މި ބައްދަލުވުމުގައި ބައިވެރިވި ގައުމުތަކުގެ ތެރެއިން މެކްސިކޯ އިން ވަނީ އެއްބަސްވުމު ގެ މުއްދަތާ ދޭތެރޭ ސުވާލު އުފައްދާފަ އެވެ. މެކްސިކޯއަކީ އޯޕެކްގެ މެމްބަރު ގައުމެއް ނޫނެވެ.

ތެޔޮ އުފައްދާ މިންވަރު މަދުކުރަން ނުޖެހޭ ގައުމުތަކުގެ ތެރޭގައި އީރާން، ލީބިއާ އަދި ވެނެޒުއޭލާ ހިމެނެ އެވެ. އެ ގައުމުތަައް އިސްތިސްނާ ވެފައި ވަނީ ދަތިކުރުމުގެ ފިޔަވަޅުތައް އަޅާފައި ވުމާއި، ދާހިލީ ހަމަނުޖެހުންތަކާއި ގުޅިގެން ތެޔޮ އުފައްދާ މިންވަރު ދަށްވެފައި ވުމުގެ ސަބަބުންނެވެ.

އޯޕެކް އާއި ރަޝިއާ އިން އެއްބަސްވުމަކަށް އާދެވިފައި ވަނީ، ތެޔޮ އުފައްދާ މިންވަރު މަދުކުރަން ބާރުއަޅާ އެމެރިކާގެ ރައީސް ޑޮނަލްޑް ޓްރަމްޕް ވާހަކަ ދައްކަވާފައިވާ ދަނޑިވަޅެއްގަ އެވެ. އެގޮތުން ބުރާސްފަތި ދުވަހުގެ ވަގުތެއްގައި ރަޝިއާގެ ރައީސް ވްލަޑަމިރް ޕޫޓިން އަދި ސައުދީ ރަސްގެފާނު ސަލްމާން އާ ފޯނުން މަޝްވަރާކުރެއްވި ކަމަށް ވިދާޅުވި އެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ސިމާހާ ނަސީމް
0%
0%
0%
0%
0%
0%
ކޮމެންޓް