ދުނިޔޭގެ ބާޒާރުގައި ސާފު ނުކުރާ ތެޔޮ ފީފާއެއްގެ އަގު 70 ޑޮލަރަށް އަރައިފިއެވެ.

މިއީ 2014 ވަނަ އަހަރުން ފެށިގެން މިއަދާހަމައަށް އައިރު ތެޔޮ ފީފާއެއްގެ އަގު އެންމެ މައްޗަށް އުފުލިގެން ދިޔަ ފުރަތަމަ ފަހަރެވެ.

އިނގިރޭސިވިލާތުގައި ތެޔޮ ފީފާއަކުން 26 ސެންޓް ބޮޑުވުމާ ގުޅިގެން ފީފާއެއްގެ އަގު ވަނީ 70.37 ޑޮލަރަށް އަރާފައެވެ. އަދި އެމެރިކާގައި ތެޔޮ ފީފާއަކުން 18 ސެންޓް ބޮޑުވުމާ ގުޅިގެން ފީފާއެއްގެ އަގު ވަނީ 64.89 ޑޮލަރަށް އަރާފައެވެ.

ތެޔޮ އުފައްދާ މިންވަރު އޮގަނައިޒޭޝަން އޮފް ދި ޕެޓްރޯލިއަމް އެކްސްޕޯޓިން ކަންޓްރީސް (އޯޕެކް) އަދި ރަޝިއާ އިން ވަނީ 2017 ވަނަ އަހަރުގެ ޖެނުއަރީ މަހު ދަށްކޮށްފައެވެ. އެކަމާ ގުޅިގެން ތެލުގެ ޑިމާންޑް މަތިވެ މިދިޔަ އަހަރުގެ ޑިސެމްބަރު މަހު ވެސް ތެލުގެ އަގުވަނީ 15 ޕަސެންޓް މަތިވެފައެވެ.

މިގޮތަށް އޯޕެކް އާއި ރަޝިއާ އިން އަމަލުކުރީ ތެލުގެ އަގު މަތިކުރުމަށް ކަމަށް ރިޕޯޓުތައް ބުނެއެވެ.

މިއަހަރުގެ ފަހު ކުއާޓަރުގައި ތެލުގެ އަގު އިތުރަށް ބޮޑުވެގެންދާނެ ކަމަށް ތެލުގެ އަގުތައް ދިރާސާކުރާ ފަރާތްތަކުން ލަފާކުރެއެވެ.

.