ވައިރަސް ޖެހިގެން ސްޕެއިނުގައި، 24 ގަޑިއިރު ތެރޭ 800 މަރު

ހަލުވިކަމާއި އެކު ކޮވިޑް-19 ފެތުރެމުންދާ ސްޕެއިން ފާއިތުވި 24 ގަޑިއިރު ތެރޭގައި މަރުވި މީހުންގެ އަދަދު 800 އަށް ވުރެ މައްޗަށް އަރައިފައިވާ ކަމަށް ސްޕެއިން ސަރުކާރުން ހާމަކޮށްފި އެވެ.

މި އަދަދާއި އެކު ސްޕެއިން ގައި ކޮވިޑް-19 ޖެހިގެން 5,690 މީހަކު ވަނީ މަރުވެފައެވެ. މިހާރު އެންމެ ހަލުވިމިނެއްގައި ބަލި ފެތުރެމުންދާ އިޓަލީގައި މަރުވި މީހުންގެ އަދަދަކީ 9،183 އެވެ.

ފާއިތުވި 24 ގަޑިއިރު ތެރޭގައި ސްޕެއިންއިން 8000 ޕޮޒިޓިވް ކޭސްއެެއް ވަނީ ރިޕޯޓްކޮށްފައެވެ. ހެލްތް މިނިސްޓްރީން ބުނީ، 72،248 މީހަކަށް ބަލި ޖެހިފައިވާ ކަމަށާއި، 40،630 މީހުން ހޮސްޕިޓަލުގައި އެޑްމިޓް ކުރަން ޖެހޭ ކަމަށެވެ. 4،575 މީހަކަށް ގެންދަނީ އިންޓެންސިވް ކެއަރގައި ފަރުވާދެމުންނެވެ. 12،285 މީހަކު ވަނީ ބަލިން ރަނގަޅުވެފައެވެ.

ބަލީގައި މަރުވާ މީހުންގެ އަދަދު ގިނަވުމާއި ގުޅިގެން މޯޗަރީތައް ފުރި، އޮފިޝަލުން ދަނީ މެޑްރިޑް އެއާޕޯޓް ސަރަހައްދުގައި ހުރި އިމާރާތެއް، ދެވަނަ މޯޗަރީއެއްގެ ގޮތުގައި ބޭނުން ކުރުމުގެ މަސައްކަތް ކުރަމުންނެވެ.