އެލްސަލްވަޑޯގައި މީހަކު ނުމަރާ 24 ގަޑިއިރު

ގޭންގްތަކުގެ ހަނގުރާމައިގެ ހާއްޔަކަށް ވެފައިވާ އެލްސަލްވަޑޯގައި އެއްވެސް މީހަކު ނުމަރާ 24 ގަޑިއިރު ފާއިތުވެއްޖެ ކަމަށް އެގައުމުގެ ފުލުހުން ބުނެފިއެވެ.

މިއީ އެގައުމުގައި ވަރަށް މަދުން ނޫނީ ނާންނަ ހާލަތެކެވެ. އދ. ގެ ހިސާބުތަކަށް ބަލާއިރު އެ ގައުމަކީ ދުނިޔޭގެ ނިސްބަތުން މީހުން މެރުން އެންމެ ގިނަ އެއްގައުމެވެ. މިދިޔަ ބުދަ ދުވަހާ ޖެހެންދެން މި އަހަރު ވެސް ކޮންމެ ދުވަހަކަށް އެވްރެޖްކޮށް 10 މީހުން މަރާފައި ވެއެވެ.

ގިނަ ހަމަނުޖެހުންތަކަކީ ސެންޓްރަލް އެމެރިކާގެ ތެރޭގައި އޮޕަރޭޓްކުރާ ގޭންގްތަކުގެ ސަބަބުން އުފެދޭ ހަމަނުޖެހުންތަކެވެ. ހަމަނުޖެހުން މަދުވާން މެދުވެރިވި ވަކި ސަބަބެއް ފުލުހުން ހާމައެއް ނުކުރެއެވެ. ނަމަވެސް ގޭންގްތަކުގެ މެދުގައި ހަމަލާ ބަދަލުކުރުން ހުއްޓާލުމުށް އޮތް އެއްބަސްވުން އަލުން އިޔާދަކުރި ކަމަށް ދެކެވޭ ވާހަކަތައް އިދާރާތަކުން ދޮގުކުރެއެވެ.

ކުށްކުރާ ގޭންގްތައް ފުރަތަމަ އުފެދިފައިވަނީ 1980ގެ ތެރޭގައި ލޮސްއެންޖެލިސްގައެވެ. އެއީ ސެލްވަޑޯގެ ކުޑަކުދިން އެގައުމުގެ އަނިޔާވެރި ދާޚިލީ ހަނގުރާމައިން ފިލުމަށް ގޮސްއުޅުމުގެ ތެރެއިންނެވެ. އޭގެ ފަހުން 1992 ވަނަ އަހަރު އެ ހަނގުރާމަ ނިމުމުން އެމީހުން އަނބުރާ ސެލްވަޑޯއަށް ގޮސްފައިވަނީ ގޭންގް މާރާމާރީގެ ސަގާފަތާ އެކުއެވެ.