ކޮވިޑް-19 އަށް ޕޮޒިޓިވްވި ކަން 5 މިނިޓް ތެރޭގައި ދެނެގަނެވޭނެ ޕޯޓަބަލް ޓެސްޓެއް އެމެރިކާ އިން ތައާރަފުކޮށްފި
28 މާރިޗު 2020 | ހޮނިހިރު 07:43ވައިރަހަށް ނެގެޓިވްވިކަން 13 މިނެޓްގެ ތެރޭގައި ދެނެގަނެވޭނެ
އެބޮޓް ލެބޯޓްރީސް އިން ތައާރަފުކުރި ޕޯޓަބަލް ޓެސްޓެ
ކޮވިޑް-19 އަށް ޕޮޒިޓިވްވިކަން 5 މިނިޓް ތެރޭގައި ދެނެގަނެވޭނެ ޕޯޓަބަލް ޓެސްޓެއް އެމެރިކާ އިން ތައާރަފުކޮށްފިއެވެ.
އެމެރިކާގެ ލެބޯޓްރީއެއް ކަމަށްވާ އެބޮޓް ލެބޯޓްރީސް އިން ނެރުނު ބަޔާނެއްގައި ބުނީ އެ ޓެސްޓް ސިއްހީ ހިދުމަތްދޭ ތަންތަނަށް ވީހާ ވެސް އަވަހަކާއި ފޯރުކޮށްދޭނެ އިންތިޒާމު ހަމަޖެއްސުމަށް އެމެރިކާގެ ފުޑް އެންޑް ޑްރަގް އޮތޯރިޓީ އިން ހުއްދަ ދީފައިވާ ކަމަށެވެ. މި ތައާރަފުކުރި ޓެސްޓުން ވައިރަހަށް ޕޮޒިޓިވްވިކަން 5 މިނެޓްގައި ދެނެގަނެވޭއިރު ވައިރަހަށް ނެގެޓިވްވިކަން 13 މިނެޓްގެ ތެރޭގައި ދެނެގަނެވޭނެ ކަމަށް އަބޮޓް ލެބޯޓްރީސް އިން ބުނެއެވެ.
އެބޮޓްގެ ރައީސް އަދި ޗީފް އޮޕަރޭޓިންގ އޮފިސަރ ރޮބަޓް ފޯޑް ވިދާޅުވީ މި ޕޯޓަބަލް ޓެސްޓްގެ ސަބަބުން ކޮވިޑް-19 އާ ދެކޮޅަށް މި ކުރާ ހަނގުރާމައިގައި ފަސޭހަތަކެއް ލިބިގެންދާނެ ކަމަށާއި އަވަހަށް ޓެސްޓްގެ ނަތީޖާތައް ލިބުމުން، ފިޔަވަޅުތައް އަޅަން ވެސް ފަސޭހަވެގެންދާނެ ކަމަށެވެ.
ރޮބަޓް ފޯޑް ވިދާޅުވީ އެމެރިކާގެ ފުޑް އެންޑް ޑްރަގް އޮތޯރިޓީން މި ޓެސްޓް ކުރުމުގެ ފުރިހަމަ ހުއްދަ އަދި ދީފައިނުވާ ކަމަށެވެ. އެހެންނަމަވެސް މި ކުއްލި ހާލަތުގައި މި ޓެސްޓް ބޭނުންކުރުމަށް އެކި ލެބޯޓްރީތަކުންނާއި ސިއްހީ ފަރާތްތަކުން ހުއްދަ ދީފައިވާ ކަމަށެވެ.
މިފަދަ ޕޯޓަބަލް ޓެސްޓެއް ތައާރަފުކޮށްފައިވާއިރު ކޮވިޑް-19 އަށް ޗައިނާގައި ތައްޔާރު ކުރި ވެކްސިން ޓެސްޓް ކުރުމުގެ ގޮތުން އިންސާނުންނަށް ދޭން ވަނީ ފަށާފައެވެ.
ވެކްސިންދޭ އެންމެންވެސް 14 ދުވަހުގެ މުއްދަތައް ކަރަންޓީން ކުރާގޮތައް ހަމަޖެހިފައިވާ ކަމުގައި ވެސް ޗައިނާ ޑެއިލީން ބުނެފައިވެއެވެ.
