އެއްފަހަރާ 100 މީހުންނަށް އައިސީޔޫގައި ފަރުވާ ދެވޭނެ އިންތިޒާމުތައް ދަނީ ހަމަޖައްސަމުން: އަމީން
އަމިއްލަ ހޮސްޕިޓަލުތަކުގެ ވަސީލަތްތަކުގެ ބޭނުންވެސް ހިފާނެ
ހެލްތް މިނިސްޓަރު އަބްދުﷲ އަމީން
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އާ ގުޅިގެން ކުއްލި ހާލަތުގައި އެއްފަހަރާ 100 ފަރާތަށް އައިސީޔޫގައި ފަރުވާދެވޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އަމީން ވިދާޅުވީ، ރާއްޖޭގައި މިހާރު އޮތް ހާލަތަށް އަންނަ ބަދަލާއެކު އިތުރު ވަސީލަތްތައް ގާއިމު ކުރަންޖެހޭއިރު އެކަމަށްވެސް ތައްޔާރުވަމުން އަންނަ ކަމަށެވެ. އެގޮތުން، އަމިއްލަ ހޮސްޕިޓަލްތަކުގައި ހުރި ވަސީލަތްތައް ވެސް މީހުންނަށް ފަރުވާ ދިނުމަށް ގާއިމުކުރެވޭނެ ކަމަށާއި މިހާރުވެސް އެކަމަށްޓަކާ އިންތިޒާމުތައް ހަމަޖެހިފައިވާ ކަމަށް އަމީން ވިދާޅުވި އެވެ.
އަމީން ވިދާޅުވީ، ރާއްޖޭގެ ހާލަތު އިތުރަށް ގޯސްވެ، ހާލަތު ބަދަލުވެދާނެކަމަށް ބަލައި، އެހާލަތަށް ވެސް ތައްޔާރުވަމުންދާ ކަމަށެވެ. އެގޮތުން، އެއްފަހަރާ 100 ފަރާތަށް އައިސީޔޫގައި ފަރުވާދެވޭނެ އިންތިޒާމުތަކެއް ވަރަށް އަވަހަށް ގާއިމު ކުރެވިގެންދާނެ ކަމަށާއި އެކަމަށްޓަކާ ސަރުކާރުގެ ތެރޭގައި މަސައްކަތްތަކެއް ކުރެވެމުންދާ ކަމަށްވެސް އަމީން ވިދާޅުވިއެވެ.
މީގެއިތުރުން އަމީން ވިދާޅުވީ، އައިސީޔޫ އަށް ދާން ނުޖެހޭ ހާލަތުގައި ތިބި ބަލި މީހުންނަށް ވެސް ފަރުވާދެވޭނެ އިންތިޒާމު މިހާރު ހަމަޖައްސާފައިވާ ކަމަށެވެ. އަދި މިހާރު ހުރި އިންތިޒާމުތަކުން ފަރުވާގެ ކަންކަން ކަށަވަރުކުރެވޭނެ ކަމަށް ގަބޫލުކުރައްވާ ކަމަށްވެސް އަމީން ވިދާޅުވި އެވެ.
މިހާތަނަށް ރާއްޖެއިން ވަނީ 13 މީހަކު ކޮވިޑް-19 އަށް ޕޮޒިޓިވް ވެފަ އެވެ. އޭގެ ތެރެއިން ދެ މީހަކު ރަނގަޅުވެފައިވާކަން ހުކުރު ދުވަހުގެ ރޭ ވަނީ ހާމަކޮށްފަ އެވެ. މި ބަލިން ރަނގަޅުވެފައިވާ ދެ މީހުންނަކީ ދަރުމަވަންތަ އައިސީޔޫގައި ފަރުވާ ދެވުނު، އއ. ސޭންޑީސް ބަތަލާ ރިސޯޓުން ބައްޔަށް ޕޮޒިޓިވްވި އިޓަލީގެ ދެމަފިރިން ނެވެ.
މީގެއިތުރުން ވެސް ކޮވިޑް-19 އަށް ޕޮޒިޓިވްވި ގިނަ މީހުންގެ ހާލަތު ވަރަށް ރަނގަޅުކަމަށްވެސް ނޭޝަނަލް އެމަޖެންސީ އޮޕަރޭޝަން ސެންޓަރުން ބުނެއެވެ.
