ކޮވިޑް-19: އެހެން ގައުމަކުން ފުރާ ޔޮޓާއި ސަފާރީ ފަދަ އުޅަނދު ރާއްޖެ އައުން މަނާކުރަން ނިންމައިފި
19 މާރިޗު 2020 | ބުރާސްފަތި 16:48މިއީ ރައްކާތެރިކަމަށް އެޅި ފިޔަވަޅެއް
ބަނދަރުކޮށްފައިވާ ސަފާރީއެއް
އެހެން ގައުމުތަކުން ފުރާ ޔޮޓާއި ސަފާރީ ފަދަ އުޅަނދު ރާއްޖެ އައުމާއި ރާއްޖޭގެ އެއްވެސް ރަށެއްގައި ބަނދަރުކުރުން މަނާކޮށްފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ އެހެން ގައުމަކުން ފުރާ ޔޮޓާއި ސަފާރީ ފަދަ އުޅަނދު ރާއްޖެ އައުމާއި ރާއްޖޭގެ އެއްވެސް ރަށެއްގައި ބަނދަރުކުރުން މަނާކުރީ ރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތާއި ރައްކައުތެރިކަމަށްޓަކައި ކަމަށެވެ.
އެޗްޕީއޭއިން ބުނީ އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން އަޅަންޖެހޭ ޚާއްސަ ފިޔަވަޅުތައް އެޅުމަށް މަގުފަހިކުރުމުގެ ގޮތުން، މިމަހުގެ 19 ވަނަ ދުވަހުގެ ރޭ 12:00 އިން ފެށިގެން ޔޮޓާއި ސަފާރީ ފަދަ އުޅަނދު ބަނދަރުކުރުން އެއީ މަނާކަމެއް ކަމަށެވެ.
އެޗްޕީއޭއިން ބުނީ އެހެން ގައުމަކުން ފުރާ، ޔޮޓާއި ސަފާރީ ފަދަ އުޅަނދުތައް ރާއްޖެއައުމާއި، ރާއްޖޭގެ އެއްވެސް ރަށެއްގައި ބަނދަރުކުރުކުރުން މަނާކުރެވޭއިރު، އެ ފިޔަވަޅަށް ފުރިހަމައަށް އަމަލުކުރުމަށް، އެންމެހައި އިދާރާތަކުން އެއްގޮތަށް އަމަލުކުރުމަށް އެދޭ ކަމަށެވެ.
މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އަމަލުކުރުމަށް ވެސް އެޗްޕީއޭއިން ވަނީ އިލްތިމާސްކޮށްފައެވެ.
