ޑަބްލިއުއެޗްއޯގެ ތައުރީފު ރޮނާލްޑޯ، މެސީ އަދި ޕޮގްބާއަށް

މިހާރު ދުނިޔޭގައި ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓުބޯޅަ އަޑިއަޅައިލާފައިވާ މިދަނޑިވަޅު ޕޯޗުގަލްގެ ކްރިސްޓިއާނޯ ރޮނާލްޑޯ، އާޖެންޓީނާގެ ލިއޮނެލް މެސީ އަދި ފްރާންސްގެ ޕައުލް ޕޮގްބާ ސަޕޯޓަރުންނަށް ހިތްވަރު ދިނުމުން އެކަމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯގެ) ޑިރެކްޓާ ޖެނެރަލް ޓެޑްރޯސް އަދަނަމް ތައުރީފުކޮށްފިއެވެ.

އަދަނަމް ވަނީ މީގެ ކުރިން ރޮނާލްޑޯ، މެސީ އަދި ޕޮގްބާގެ އިތުރުން ކުޅިވަރު އާއިލާއާއި ބައްދަލުކޮށްފައެވެ. އެ ބައްދަލުވުމުގައި އަދަނަމް ވަނީ ކުޅިވަރު ކުޅުންތެރިން އެ ކުޅުންތެރިންގެ ސަޕޯޓަރުން ކޮވިޑް-19 އިން ހޭލުންތެރި ކުރުމަށް އެދިފައެވެ.

އަދަނަމްގެ މި އެދުމަށް ރޮނާލްޑޯ، މެސީ އަދި ޕޮގްބާވަނީ ބޯލަނބައި އެ ކުޅުންތެރިންގެ ސޯޝަލް މީޑިއާ އެކައުންޓްތައް މެދުވެރިކޮށް އާންމުން ހޭލުންތެރިކޮށްފައެވެ.

ރޮނާލްޑޯ އޭނާގެ ޓުވިޓާގައި ބުނީ މިއީ ދަތި ހާލަތެއް ކަމަށާއި، މި ހާލަތުން އަރައިގަތުމަށް ހުރިހާ އެންމެން އެކުވެ މަސައްކަތް ކުރަން ޖެހޭކަމަށެވެ. މިއަދު މިވާހަކަ ދައްކަނީ ފުޓުބޯޅަ ކުޅުންތެރިޔެއްގެ ހައިސިއްޔަތުން ނޫން ކަމަށާއި ނަމަވެސް، ދަރިޔެއް، ބައްޕައެއް، އަދި އިންސާނެއްގެ ހައިސިއްޔަތުން މިވާހަކަ ދައްކަން މިއަދު މަޖުބޫރު ކަމަށް ބުނަމުން ރޮނާލްޑޯ ބުނީ މިވަގުތު އެންމެންނަށް ވެސް ރަނގަޅުވާނީ ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ދޭ އިރުޝާދާއި އެއްގޮތައް އަމަލުކޮށްގެން ކަމަށެވެ.

ރޮނާލްޑޯ އިތުރަށް ބުނީ އިންސާނުންގެ ފުރާނައަކީ އެހެން ހުރިހާ އެއްޗަކަށްވުރެ އަގު ބޮޑު އެއްޗެއް ކަމަށާއި، ކޮރޯނާވައިރަސް (ކޮވިޑް-19) ގައި ފުރާނަ ދޫކޮށްދިޔަ ހުރިހާ އެންމެންއަށް ތައުޒިޔާ ކިޔާ ކަމަށެވެ. އަދި ކޮރޯނާވައިރަސް (ކޮވިޑް-19) އިން އަރައިގަތުމަށް އެންމެން އެކުވެ މަސައްކަތްކުރުމަށް ރޮނާލްޑޯ ވަނީ ގޮވައިލައިފައެވެ.

މީގެ އިތުރުން މެސީ އަދި ޕޮގްބާވެސް ވަނީ ސޯޝަލް މީޑިއާގައި ޑަބްލިއުއެޗްއޯގެ ލަފާގެ މަތިން އަމަލުކުރުމަށާއި، މި ދުވަސްވަރު ސިއްހަތައް އިތުރަށް ސަމާލުވުމަށް ގޮވާލައިފައެވެ.

ކޮވިޑް-19 ގެ ސަބަބުން ދުނިޔޭގެ ފުޓުބޯޅަ ހުއްޓުމަކަށް އައިސްފައިވާއިރު، މި ވައިރަސް ޖެހުނު މީހުންގެ އަދަދު މިހާރު ވަނީ 174،134 އަށް އަރައިފައެވެ. އަދި މި ބަލީގައި 6،684 މީހުން ވަނީ މަރުވެފައެވެ.