ކޮވިޑް-19: ދީނީ ނަސޭހަތް ދިނުން ވަގުތީގޮތުން ހުއްޓާލަން އަންގައިފި
މީޑިއާގެ ވަސީލަތް މެދުވެރިކޮށް ދީނީ ނަސޭހަތް ދިނުމަށް އިލްތިމާސް ކޮށްފައިވޭ
އިސްލާމިކް މިނިސްޓްރީން ބޭއްވި ދީނީ ނަސޭހަތް ދިނުމުގެ ޕްރޮގްރާމެއްގެ ތެރެއިން
ކޮވިޑް-19 ރާއްޖެއިން ފެނުމާއި ގުޅިގެން، މިސްކިތްތަކުގައި ދީނީ ނަސޭހަތް ދިނުމުގެ ޕްރޮގްރާމް ވަގުތީގޮތުން ހުއްޓާލުމަށް އިސްލާމިކް މިނިސްޓްރީން ރާއްޖޭގެ ހުރިހާ މިސްކިތްތަކަށް އަންގައިފި އެވެ.
ހޯމަ ދުވަހު އިސްލާމިކް މިނިސްޓްރީން ނެރުނު ބަޔާނެއްގައި ވަނީ، ކޮވިޑް-19 އިތުރަށް އެ ވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ސަލާމަތީ ފިޔަވަޅެއްގެ ގޮތުން، ހޯމަ ދުވަހުން ފެނިގެން މިސްކިތްތަކުގައި ދީނީ ނަސޭހަތް ދިނުމުގެ ޕްރޮގްރާމްތައް ވަގުތީ ގޮތުން ހުއްޓާލުމަށް އަންގާފައެވެ. އަދި އެގޮތުން މިވަގުތު މިސްކިތްތަކާއި އާންމު ތަންތަނުގައި ދަރުސް ދިނުމުގެ ހުއްދަދީފައިވާ ހުރިހާ ފަރާތްތަކުންވެސް މިނިސްޓްރީއިން އަންގަންދެން، ދަރުސް ދިނުމުގެ ޕްރޮގްރާމްތައް ހުއްޓާލުމަށް އިސްލާމިކް މިނިސްޓްރީން ވަނީ އެދިފައެވެ.
އިސްލާމިކް މިނިސްޓްރީން ވަނީ، އާއްމުން އެއްވެ އުޅޭ ތަންތަނުގައި ދަރުސް ދިނުމުގެ ބަދަލުގައި މި ދަނޑިވަޅުގައި މާލެއާއި އަތޮޅުތެރޭގައި ތިއްބެވި ދީނީ އިލްމުވެރިން މެދުވެރިކޮށް މީޑިއާގެ ވަސީލަތްތަކުން އާންމުންނަށް ދީނީ މަޢުލޫމާތު ފޯރުކޮށްދިނުމަށް އިލްތިމާސްކޮށްފައެވެ.
މިސްކިތުގައި ދަރުން ދިނުން ހުއްޓާލުމަށް އިސްލާމިކް މިނިސްޓްރީން އިލްތިމާސް ކޮށްފައިވާއިރު، ކޮރޯނާވައިރަސްގެ އަލާމާތްތައް ހުރި މީހުން މިސްކިތުގެ ޖަމާއަތަށް ނުދިޔުމަށް މިނިސްޓްރީން ވަނީ މީގެ ކުރިން އިލްތިމާސް ކޮށްފައެވެ.
