ރައީސް މައުމޫނަށް ސެކިއުރިޓީ ދިނުން ހުއްޓައެއް ނުލަން:އެމްއެންޑީއެފް
ޤަވާއިދުގެ ދަށުން އޮންނަ އުސޫލުން ދަނީ ސެކިއުރިޓީ ދެވެމުން
ރައީސް މައުމޫން: ސަރުކާރަށް ކުރާ ތާއީދު ވަނީ އަނބުރާ ގެންދަވާފައި
ކުރީގެ ރައީސުލް ޖުމްހޫރިއްޔާ އަދި ޕީޕީއެމްގެ ރައީސް، ރައީސް މައުމޫނަށް ދެމުން ގެންދިޔަ ސެކިއުރިޓީ ހުއްޓާލާފައި ނުވާނެ ކަމަށް އެމްއެންޑީއެފުން ބުނެފިއެވެ.
ރާއްޖެ އެމްވީއަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލް ކެޕްޓަން އިބްރާހީމް އާޒިމް އާދީއްތަ ދުވަހު ވިދާޅުވީ ރައީސް މައުމޫނަށް އެމްއެންޑީއެފުން ދެމުން ދިޔަ ސެކިއުރިޓީ ހުއްޓާލިކަމަށް ސޯޝަލް މީޑިއާގައި ދައްކަމުންދާ ވާހަކައަކީ ޙަޤީގަތެއް ނޫން ކަމަށާއި އެމަނިކުފާނަށް ދެމުން ގެންދިޔަ ސެކިއުރިޓީ ދިނުން ހުއްޓާލާފައި ނުވާ ކަމަށެވެ.
އާޒިމް ވިދާޅުވީ ކުރިއެކޭ އެއްގޮތައް ރައީސް މައުމޫނަށް ދެމުންދިޔަ ސެކިއުރިޓީ އެކަން ކުރުމަށް އޮންނަ ޤަވާއިދާއި އުސޫލުތަކާ އެއްގޮތައް މިހާރުވެސް ދެމުން ގެންދާ ކަމަށެވެ. ނަމަވެސް މިވަގުތު އިންޑިއާގައި ހުންނެވި ރައީސް މައުމޫނު އެޤައުމަށް ފުރާވަޑައިގަންނަވަން އުޅުއްވިއިރު އެމަނިކުފާނުގެ ހަށިފާރަވެރިންނަށް އެމަނިކުފާނާއެކު ދަތުރު ނުކުރެވޭނެ ކަމަށް އަންގާފައިވާކަން ރާއްޖެ އެމްވީއަށް ވަނީ މައުލޫމާތު ލިބިފައެވެ.
ރާއްޖެއެމްވީއަށް އެނގިފައިވާ ގޮތުގައި ރައީސް މައުމޫންގެ ހަށިފާރަވެރިންނަށް އެމަނިކުފާނާއެކު ދަތުރުނުކުރެވޭނެކަން އެމްއެންޑީއެފް އިން އަންގާފައިވަނީ އެއާޕޯޓްގެ ވީއައިޕީ ލޯންޖްއާ ހަމައިންނެވެ.
ހަށިފާރަވެރިންނަށް ރައީސް މައުމޫނާއި އެކު ދަތުރު ނުކުރެވޭނެ ސަބަބު އަންގާފައި ނުވިޔަސް ވީއައިޕީ ލޯންޖްއާ ހަމައިން އެމީހުންގެ އަތުގައި ހުރި ޓިކެޓާއި އެނޫން ވެސް ދަތުރަށް ބޭނުންވާނެ ލިޔުންތައް ވަނީ އަތުލާފައެވެ.
ހަށިފާރަވެރިންގެ އަތުން ޓިކެޓާއި ލިޔެކިޔުންތައް އަތުލުމަށް އެމީހުން ލަގެޖް ވެސް ވަނީ ޗެކިން ކުރުމަށް ފަހު އަލުން އަނބުރާ ނެރެފައި ކަމަށް ވެސް އެނގިފައި ވެއެވެ.
މީގެ ކުރިންވެސް ވަނީ އުސޫލުތަކަށް ގެނެވުނު ބަދަލަކާއި ގުޅިގެން ކަމަށް ބުނެ، ރައީސް މައުމޫންގެ ސެކިއުރިޓީގެ ގޮތުގައި އެމަނިކުފާނުގެ ކާރުކޮޅާ އެކު ދަތުރުކުރާ އެމްއެންޑީއެފްގެ ވެހިކަލް ވެސް ދަތުރުކުރުން ހުއްޓުވާލާފައެވެ.
