އެމެރިކާގެ ރައީސް ޑޮނަލްޑް ޓްރަމްޕް ކޮވިޑް-19 އަށް ޓެސްޓް ކުރެއްވި އިރު އޭގެ ނަތީޖާ ނެގެޓިވް ކަމަށް އެމެރިކާގެ ރިޔާސީ ގަނޑުވަރު ވައިޓްހައުސް އިން ހާމަކޮށްފިއެވެ.
ޓްރަމްޕް ވައިރަސްއަށް ޓެސްޓްކުރީ، ދާދި ފަހުން ޓްރަމްޕްއާ ބައްދަލުކުރެއްވި ބްރެޒިލްގެ ރައީސް ޖައި ބޮލްސޮނާރޯގެ ސެކްރެޓަރީއަށް ކޮވިޑް-19 ޖެހިފައިވާކަން ޓެސްޓްތަކުން ޔަޤީންވުމާއި ގުޅިގެންނެއެވެ. މީގެއިތުރުން މިވައިރަސް އަށް ޕޮޒިޓިވްވި އެހެން މީހުންނާވެސް ޓްރަމްޕް ދާދި ފަހުން ބައްދަލުކުރައްވާފައިވާކަމަށް ރިޕޯޓުތައް ބުނެއެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވީ ބައްޔަށް ޓެސްޓު ކުރެއްވީ އެކަން ކުރައްވަން ފެނިވަޑައިގަތުމުން ކަމަށެވެ.
ޓްރަމްޕްގެ ޑޮކްޓަރު ޝޯން ކޮންލީ ވިދާޅުވީ ޓްރަމްޕް ކަރަންޓީން ވުމުގެ ބޭނުމެއް ނެތް ކަމަށާއި ޕޮޒިޓިވްވީ މީހުންނާ ޓްރަމްޕް މާ ބޮޑަށް ކައިރިވެފައިނުވާ ކަމަށެވެ.
ކޮވިޑް-19ގެ މައްސަލައިގައި ފާޑުކިޔުންތައް އަމާޒުވަމުން ދިޔައިރުވެސް ޓްރަމްޕް އެކި ބޭފުޅުންނާ ދިޔައީ ސަލާމްވެސް ކުރައްވަމުންނެވެ.
އޮސްޓްރޭލިއާގެ ހޯމް މިނިސްޓަރު ޕީޓަރ ޑަޓަންވެސް ވަނީ ކޮރޯނާއަށް ޕޮޒިޓިވްވެފައެވެ. ޕީޓަރ ވިދާޅުވީ އޭނާ ޕޮޒިޓިވްވީ ޓްރަމްޕްގެ ދަރިކަނބަލުން އިވޭންކާ ޓްރަމްޕާ ބައްދަލުކުރެއްވިތާ ތިން ދުވަސް ފަހުން ކަމަށެވެ. އެކަމާ ގުޅިގެން އިވާންކާވެސް މިހާރު ހުންނެވީ އަމިއްލައަށް އެކަހެރިވެގެންނެވެ.
