ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު އޮތްކަމަށް ވޯޓުދެއްވި ޕީޕީއެމްގެ ބައެއް މެމްބަރުން، ގުޅިފައިވާ ސިޔާސީ ޕާޓީތަކުން ކުރާ މަސައްކަތްތައް ކުރިއަށްގެންދިއުމަށް އެދިވަޑައިގެންފައިވާކަމަށް ދިއްގަރު ދާއިރާގެ މެމްބަރު އަހުމަދު ފާރިސް މައުމޫނު ވިދާޅުވެއްޖެ އެވެ.
ގުޅިފައިވާ ސިޔާސީ ޕާޓީތަކުން، މ. ކުނޫޒުގައި ބޭއްވި ޖަލްސާގައި ވާހަކަދައްކަވަމުން ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމަށް ހުށައެޅުމުގައި އިސްކޮށް ހަރަކާތްތެރިވެވަޑައިގެންނެވި ދިއްގަރު ދާއިރާގެ މެމްބަރު ފާރިސް މައުމޫނު ވިދާޅުވީ، މަސީހާއި އެއްކޮޅަށް ވޯޓުދެއްވި މެމްބަރުންނަށް އެއްވެސް ހިތްބުރަ ކަމެއް ނެތް ކަމަށެވެ. އަދި އެ ބެފުޅުންގެ މަޖުބޫރީ ހާލަތު އެނގިވަޑައިގަންނަވާ ކަމަށް ފާރިސް ވިދާޅުވި އެވެ.
ރައްޔިތުންގެ މަޖިލީހުގެ ތެރޭގައި ކުރި އިހުތިޖާޖާއި ގުޅޭގޮތުން ވާހަކަދައްކަވަމުން ފާރިސް ވިދާޅުވީ އިހުތިޖާޖްކުރީ ހަމައެކަނި ގުޅިފައިވާ ސިޔާސީ ޕާޓީތަކުގެ މެމްބަރުންގެ ހައްޤުގައި ނޫން ކަމަށެވެ. އަދި އިހުތިޖާޖްކުރީ ރައްޔިތުންގެ މަޖިލީހުގެ ހުރިހާ މެމްބަރުންގެ ހައްޤުގައި ކަމަށް ފާރިސް ވިދާޅުވި އެވެ. އޭނާ ވިދާޅުވީ ބައެއް މެމްބަރުންނަށް އިހުތިޖާޖްކުރަންޖެހުނީ ހުރިހާ މެމްބަރުންނަށް އިހުތިޖާޖްނުކުރެވޭތީ ކަމަށެވެ.
"އެކިގޮތްގޮތުން އަޅުގަނޑަށް މެސެޖު އެބަލިބޭ، އެ ވޯޓުގައި، އެ ރޯލް ކޯލްގައި ބައިވެރިވެވަޑައިގެންނެވި މެމްބަރުންގެ ތެރެއިން އެކި އެކި މެމްބަރުންގެ ފަރާތްޕުޅުން ތިޔަ މަސައްކަތް ކުރިއަށްގެންދާށޭ. ބައެއް ބޭފުޅުން ވިދާޅުވޭ ތިމަންނަ މި ވަގުތު މި ހުރީ، މާލެއިން ބޭރުގައޭ. މާލެ އައިސަ ބައްދަލުކުރާނަމޭ. ބައްދަލުކޮށް ތިމަންނަ ވަރަށް އަވަހަށް ގޮތެއް ނިންމާނަމޭ. މިކަމުން މިހާރު ސަލާމަތްވާންޖެހިއްޖޭ. ސަލާމަތްވާން މަޖުބޫރުވެއްޖޭ. ތިމަންނަމެންލައްވާ މިއަދުކުރި ކަންތައްތަކުން ތިމަންނަމެން ލަދުގަނެފިއޭ." ދިއްގަރު ދާއިރާގެ މެމްބަރު އަހުމަދު ފާރިސް މައުމޫނު ވިދާޅުވި އެވެ.
ފާރިސް ވިދާޅުވީ ވަކިވަކިން މެމްބަރުންނާ ސުވާލުކޮށްގެން ވޯޓަށް އަހަން ޖެހޭނީ އިލެކްޓްރިން ނިޒާމު އެއްގޮތަކަށް ވެސް ބޭނުން ނުކުރެވޭ ހާލަތަކަށް ގޮސްފި ނަމަ އެކަނި ކަމަށާއި އެފަދަ ހާލަތެއް މިހާރު ނެތް ކަމަށެވެ. ނަމަވެސް އެފަދަ ހާލަތެއް ނެތްކަމަށައި، ރޯލް ކޯލް ވޯޓު ނަގާފައިވަނީ މަޖިލީހުގެ ގަވައިދާއި ހިލާފަށް ކަމަށް ފާރިސް ވިދާޅުވި އެވެ.
އޭނާ ވިދަޅުވި ގޮތުގައި މެޝިން ބޭނުންކޮށްގެން ވޯޓު ނެގިނަމަ، އެ ވޯޓު ވަރަށް ބޮޑު ތަފާތަކުން ކާމިޔާބުކުރެވޭނެ ކަމަށެވެ. ސަބަބެއް ކަމަށް ވިދާޅުވީ، ރައްޔިތުންގެ މަޖިލީހުގެ ރައީސް މަސީހާ ދެކޮޅަށް ވޯޓު ދޭން ބޭނުންވާ މެމްބަރުންތަކެއް ސަރުކާރު ކޯލިޝަންގެ މެމްބަރުންގެ ތެރޭގައި ވެސް ތިބުމުން ކަމަށާއި އެ މެމްބަރުން ބޭނުންވީ ނަތީޖާ އަންނަ ގޮތަކަށް ވޯޓުދިނުމަށް ކަމަށްވާތީ ކަމަށެވެ.
