ކޮވިޑް-19: އިޓަލީގައި ވައިރަސް ޖެހުނު މީހުންގެ އަދަދު 10،000 ށް ވުރެ މަތިވެ ޔޫރަޕް ނުތަނަވަސްކަމެއްގެ ތެރޭގައި
11 މާރިޗު 2020 | ބުދަ 06:53އިޓަލީގައި މިވައިރަސް 10,149 މީހުންނަށް ވަނީ ޖެހިފައި
އިޓަލީގައި ކޮރޯނާވައިރަސް ފެތުރޭތީ ވަނީ ލޮކްޑައުންކޮށްފައި
އިޓަލީގައި ކޮވިޑް-19 އަށް ޕޮޒިޓިވް މީހުންގެ އަދަދު 10،000 ށް ވުރެ މައްޗަށް އަރައިފި އެވެ.
އެންމެފަހުގެ ތަފާސްހިސާބުތަކުން ދައްކާގޮތުގައި އިޓަލީގައި މިވައިރަސް 10,149 މީހުންނަށް ވަނީ ޖެހިފަ އެވެ. އެއާއެކު އިޓަލީ ވެގެންގޮސްފައިމިވަނީ ޗައިނާއަށް ފަހު އެންމެ ގިނަ މީހުން މިވައިރަސް އަށް ޕޮޒިޓިވްވި ގައުމަށެވެ. އިޓަލީގައި އިއްޔެ އެކަނިވެސް މިވައިރަސް ޖެހިގެން 168 މީހުން ވަނީ މަރުވެފަ އެވެ.
މިހާތަނަށް އެގައުމުން މިވައިރަސް ޖެހިގެން 631 މީހުން ވަނީ މަރުވެފައެވެ. އިޓަލީގައި ކޮރޯނާވައިރަސް ފެތުރުން ހުއްޓުވުމުގެ ގޮތުން އެގައުމުގެ ސަރުކާރުން ވަނީ މުޅި ގައުމު ލޮކްޑައުންކޮށް ހަރުކަށި ފިޔަވަޅުތައް އަޅާފަ އެވެ. އެ ފިޔަވަޅުތަކުގެ ތެރޭގައި އާއްމު ތަންތަނުގައި މީހުން އެއްވެ އުޅުން މަނާ ކުރުމާއި މުޅި ގައުމުގައި ހުރިހާ ކުޅިވަރު އިވެންޓުތައް މެދުކަނޑާލުމާއި އަންނަ މަހުގެ ތިނެކާ ޖެހެންދެން ސްކޫލުތަކާއި ޔުނިވާސިޓީތައް ބަންދު ކުރުން ހިމެނެ އެވެ. އަދި އެގައުމަށް ކުރާ ދަތުރުތަކާއި ގައުމުން ބޭރަށް ކުރާ ދަތުރުތަކުގެ އިތުރުން ގައުމުގެ އެތެރޭގެ ދަތުރުފަތުރު ވެސް ވަނީ ވަރަށް ބޮޑަށް ކޮންޓްރޯލްކޮށްފަ އެވެ.
އިޓަލީގައި ވައިރަސް އެންމެ ބޮޑަށް ފެތުރިފައި ވަނީ ގައުމުގެ އުތުރުގައި އޮންނަ ލޮމްބާޑީ ރީޖަންގަ އެވެ. އެގޮތުން މުޅި ގައުމުން ވައިރަސް ޖެހިގެން މަރުވި މީހުންގެ ތެރެއިން 74 ޕަސެންޓު މީހުން މަރުވެފައި ވަނީ އެސަރަހައްދުގަ އެވެ. ނަމަވެސް އެ ވައިރަސް ވަނީ މިހާރު މުޅި ގައުމަށް ފެތުރިފަ އެވެ. އަދި އިޓަލީގެ އުތުރާ ބަލާއިރު ތަރައްގީވެފައިވާ މިންވަރު ކުޑަ ސަރަހައްދުތަކަށް ވައިރަސް ފެތުރިއްޖެ ނަމަ، އެ ސަރަހައްދުތަކުގެ ސިއްހީ ނިޒާމު އަޑިއަޅާލާމަރުވާ މީހުންގެ އަދަދު މިހާރަށް ވުރެ އިތުރުވުމަކީ އެކަށީގެންވާ ކަމެއް ކަމަށް މާހިރުން ބުނެއެވެ.
އަނެއްކޮޅުން އިޓަލީގައި މިވައިރަސް ހަލުވިކަމާއެކު ފެތުރެމުންދާތީ ޔޫރަޕަށް ވަނީ ނުތަނަވަސްކަން ވެރިވެފައެވެ. ޔޫރަޕްގައިވާ ކޮރޯނާވައިރަސް ފެތުރޭ މައި ތަނަކީ އިޓަލީކަމަށް ދުނިޔޭގެ ސިއްޙަތު ޖަމްއިއްޔާ ޑަބްލިޔޫއެޗްއޯ އިންވެސްވަނީ ބުނެފަ އެވެ. އެމެރިކާއާއި ދުނިޔޭގެ ގިނަ ގައުމުތަކުން ވަނީ އިޓަލީން މީހުން އެގައުމުތަކަށް އައުން މަނާކޮށްފަ އެވެ. އަދި ބައެއް ގައުމުތަކުން ވަނީ އެގައުމުތަކުގެ ރައްޔިތުން ވެސް އިޓަލީއަށް ދަތުރު ނުކުރުމަށް އިލްތިމާސްކޮށްފަ އެވެ.
