"ސަންޗޯ ހުރީ އުފަލުން، އެހެން ޓީމަކަށް ބަދަލެއް ނުވާނެ"

ބޮރޫޝިއާ ޑޯޓްމަންޑަށް ކުޅެމުން އަންނަ ޖޭޑަން ސަންޗޯ ޑޯޓްމަންޑާއިއެކު ހުރީ އުފަލުން ކަމަށާއި އޭނާ އެހެން ޓީމަކަށް ބަދަލު ނުވާނެ ކަމަށް ޑޯޓްމަންޑްގެ ޗީފް އެގްޒެކެޓިވް ހެންސް ޖޮވިކިން ވައްޓްޒްކާ ބުނެފިއެވެ.

19 އަހަރުގެ ސަންޗޯ ވަނީ މި ސީޒަނުގައި ޑޯޓްމަންޑަށް 14 ލަނޑު ޖަހައިދީ 14 ލަނޑު ޖަހައިދިނުމަށް އެހީވެދީފައެވެ.

ޑޯޓްމަންޑްގެ ޗީފް އެގްޒެކިޓިވް ޖޮވިކިން ބުނީ ސަންޗޯ ޑޯޓްމަންޑުގައި ހުރީ އުފަލުން ކަމަށާއި، އޭނާ ކްލަބު ދޫކޮށް އެހެން ކްލަބަކަށް ނުދާނެކަމަށެވެ. ނަމަވެސް ޓްރާންސްފަރ މަރކެޓްގައި ވާނެ ގޮތެއް އޭނާ އަށް ނޭނގޭ ކަމަށާއި ޓްރާންސްފަރ މަރކެޓްގައި ކޮންމެ ގޮތެއް ވެސް ވެދާނެ ކަމަށެވެ. އެކަމަކު ޑޯޓްމަންޑާއި ސަންޗޯ އާއި އޭނާގެ އެޖެންޓާއި އޮންނަނީ ވަރަށް ގާތް ގުޅުމެއް ކަމަށްވެސް ޖޮވިކިން ބުންޏެވެ.

ޖޮވިކިން އިތުރަށް ބުނީ އޭނާ ސިޓީގެ ޔޫތު ޓީމު ދޫކޮށް ޑޯޓްމަންޑާއި ގުޅުނީ ސިޓީގެ ސީނިއަރ ޓީމުން ބޮޑު ހުށަހެޅުމެއް ސަންޗޯ އަށް ހުށަހަޅައިފައިވަނިކޮށް ކަމަށާއި، އޭނާ ދެކޭ ގޮތުގައި ސަންޗޯ އަކީ ފައިސާއަށް ކްލަބު ބަދަލުކުރާނެ ކުޅުންތެރިއެއް ނޫން ކަމަށާއި، ސަންޗޯ ނިންމާނީ އޭނާއަށް އެންމެ ރަނގަޅު ގޮތް ކަމަށެވެ.

މީގެ އިތުރުން، ޖޮވިކިން ބުނީ ޑޯޓްމަންޑަކީ ފައިސާ ހުރި ތަނަވަސް ކްލަބެއް ކަމަށާއި ނަމަވެސް ޑޯޓްމަންޑުން ބޭނުން ވަނީ ޒުވާން ކުޅުންތެރިންތަކެއް ނެރެ ގިނަ ތަށިތަކެއް ކާމިޔާބު ކުރުމަށް ކަމަށެވެ. އަދި މިހާރު ޑޯޓްމަންޑުގައި އޮތް ސްކޮޑާއި މެދު ހިތްހަމަ ޖެހޭ ކަމަށްވެސް ޖޮވިކިން ބުންޏެވެ.

ސަންޗޯ ވިދާލީ 2017 ވަނަ އަހަރު އިންޑިއާގައި ބޭއްވި 17 އަހަރުން ދަށުގެ ވޯލްޑްކަޕްގައެވެ. އެގޮތުން އެ އަހަރު ވޯލްޑްކަޕް ކާމިޔާބުކުރި އިންގްލޭންޑް ޓީމުން އެންމެ ފާހަގަކޮށްލެވޭ ކުޅުންތެރިޔަކީ ސަންޗޯއެވެ. އޭރު ސިޓީގެ ޒުވާން ޓީމަށް ކުޅެމުން އައި ސަންޗޯ އަށް އެ މުބާރާތައް ފަހު ޔޫރަޕުގެ ގިނަ ކްލަބުތަކަކުން ފާރަލިއެވެ. އޭގެ ތެރޭގައި ސިޓީ ވެސް ހިމެނެއެވެ. ނަމަވެސް ލިބުނު ބޮޑެތި ހުށަހެޅުންތަކަށް ނޫނެކޭ ބުނެ ސަންޗޯ ބަދަލުވީ ޖަރުމަނުގެ ކްލަބު ޑޯޓްމަންޑާ އެވެ.

ޑޯޓްމަންޑާއެކު ސަންޗޯ ވަނީ މިދިޔަ ދެ ސީޒަނުގައި ވެސް މޮޅު ކުޅުމެއް ދައްކާފައެވެ.