ހަލުވިކަމާއި އެކު ފެތުރެމުންދާ ކޮރޯނާވައިރަސް (ކޯވިޑް-19) ގެ ސަބަބުން, އަރަބި ގައުމުތަކުގެ އިސްވެރިންގެ މެދުގައި މި އަހަރު ބާއްވާން ހަމަޖެހިފައިވާ އަރަބި ލީގް ސަމިޓް، ފަސްކޮށްފިއެވެ.

ކުރިން ހަމަޖެހިފައިވާ ގޮތުން މި ފަހަރުގެ ސަމިޓް އޮންނާނީ މާޗް މަހުގެ 31 ގައެވެ. ސަމިޓް ފަސްކޮށްފައިވާކަން އިއުލާން ކޮށްފައިވަނީ އަރަބި ލީގްގެ ހެޑް އަހުމަދު އަބޫ އަލް ގެއިތްއެވެ. އޭނާ ވިދާޅުވީ، ދެ މަހެއްހާ ދުވަހަށް ފަސްކޮށްފައިވާ ކަމަށެވެ.

އަލްޖީރިޔާގައި ހުންނަވާ ވާހަކަ ދައްކަވަމުން އަހުމަދު އަބޫ ވިދާޅުވީ، މި އަހަރުގެ މެދުތެރޭގައި ސަމިޓް ބޭއްވުމުގެ މަސައްކަތް ކުރަމުންދާ ކަމަށެވެ. އަލުން ސަމިޓް ބާއްވާނެ ތާރީހު އިއުލާން ކުރަނީ މި ފަހަރު ސަމިޓް ބާއްވާ ގައުމު، އަލްޖީރިޔާ އަދި އަރަބް ލީގާއެކު މަޝްވަރާ ކުރުމަށް ފަހު އެވެ.

އަރަބި ގައުމުތަކުގެ ގުޅުން ބަދަހިކުރުމުގެ މަގްސަދުގައި 1945 ވަނަ އަހަރު މިސްރުގައި އުފެދުނު އަރަބި ލީގުގައި 22 ގައުމެއް ހިމެނޭއެވެ. އަރަބި ލީގުގެ މައިގަނޑު މަގްސަދަކީ މެމްބަރު ގައުމުތަކުގެ މެދުގައި ގުޅުން ބަދަހިކުރުމެވެ. އެންމެ ފަހުން އަރަބި ލީގް ސަމިޓް ބާއްވާފައިވަނީ ނިމިގެން ދިޔަ އަހަރު އޭޕްރީމް މައު ޓިއުނީޝިއާގައެވެ.

ކޮވިޑް-19 ފެތުރޭތީ އަރަބް ލީގް ސަމިޓް ފަސްކޮށްފައިވާއިރު، މި ވައިރަސް ވަނީ 45 ގައުމަކަށް ފެތުރިފައެވެ. އޭގެ ތެރޭގައި، އެމެރިކާ، އިނގިރޭސިވިލާތް، ސިންގަޕޫރް، ފްރާންސް، ރަޝިޔާ އަދި ސްޕޭންގެ އިތުރުން އަރަބި ބައެއް ގައުމުތައް ހިމެނެއެވެ. ޗައިނާގެ ވޫހާން ސިޓީން ފެތުރެން ފެށި ނުރައްކާތެރި ރޯގާގެ ސަބަބުން ތިންހާހެއްހާ މީހަކު ވަނީ މަރުވެފައެވެ.