ޖީ – 20 ސަމިޓްގައި ބައިވެރިވެ ވަޑައިގަތުމަށް ރައީސް ޓްރަމްޕް ހުންނަވާނެ ކޮޓަރިއެއް ހޮޓަލަކުން ހަމައެއް ނުޖެހުނު!

ޖަރުމަނު ވިލާތުގެ ހެމްބަގްގައި ކުރިއަށްދާ ޖީ- 20 ސަމިޓްގައި ބައިވެރިވެ ވަޑައިގަތުމަށް އެމެރިކާގެ ރައީސް އެ ސިޓީއަށް ވަޑައިގެންނެވި އިރު ހުންނަވާނެ ކޮޓަރިއެއް ހޮޓަލަކުން ނުލިބުނު ކަމަށް ޚަބަރުތައް ބުނެފިއެވެ.

ބަޒްފީޑްގައި ރިޕޯޓު ކޮށްފައިވާ ގޮތުގައި ރައީސް ޓްރަމްޕްއާއި ވަފުދުގެ ބޭފުޅުން ތިއްބަވާނެ ކޮޓަރި ހަމަޖައްސަން ދަތުރުފުޅުގެ އިންތިޒާމްތައް ކުރާ ފަރާތުން ފަހު ވަގުތު އުޅުނު އިރު، ހެމްބަރގްގެ ބޮޑެތި ހުރިހާ ހޮޓާތަކެއް ހުރީ ފުރިފައެވެ.

ފޯސީޒަން ހޮޓަލުންވެސް ރައީސް ޓްރަމްޕްއާއި ވަފުދުގެ ބޭފުޅުން ތިއްބެވޭނެ އިންތިޒާމް ހަމަޖައްސައި ދެވެން ނެތް ކަމަށް ބުނި ކަމަށް ޖަރުމަނުގެ ނޫހެއްގައި ރިޕޯޓުކޮށްފައިވެއެވެ.

ކޮޓަރި ހަމަޖައްސަން ފޯ ސީޒަންސްގައި އެދުނު އިރު އެ ހޮޓާވެސް ވަނީ މުޅިން ބުކް ވެފައެވެ.

ބަޒްފީޑުން ރިޕޯޓު ކޮށްފައިވާ ގޮތުގައި މުޅި ފޯ ސީޒަން ހޮޓާ ބުކް ކުރައްވާފައިވަނީ ސައުދީ ރަސްގެފާނު ސަލްމާންއާއި އޭނާގެ އަރިހުގައި އުޅުއްވާ ބޮޑު ވަފުދު ބޭފުޅުން ތިއްބެވުމަށެވެ.

ފޯ ސީޒަންސްގެ އިތުރުން ހެމްބަގްގެ އިތުރު ދެ ހޮޓަލެއްވެސް ސަލްމާން ރަސްގެފާނުގެ ބޭނުންފުޅަށްވަނީ ބުކް ކޮށްފައެވެ.

ރަޝިއާގެ ރައީސް ޕޫޓިން ހުންނަވަނީ، ޕާކް ހަޔަޓް ގައެވެ. ވެރިންނަށް މެހުމާނު ދާރީ އަދާކުރައްވާ، ޖަރުމަނުގެ ޗާންސެލަރ އެންޖެލާ މާކެލް ހުންނަވަނީ އެޓްލާންޓިކް ކެމްޕިންސްކީ ގައެވެ. އިންޑިއާގެ އާއި ކެނެޑާގެ ވެރިންވެސް ތިއްބަވަނީ އެ ހޮޓަލުގައެވެ.

ރައީސް ޓްރަމްޕް ހުންނަވާނެ އެކަށީގެންވާ ކޮޓަރިއެއް ލިބިވަޑައި ނުގަތުމުން، ހުންނެވުމުގެ އިންތިޒާމް ހަމަޖައްސައި ދިނީ ހެމްބަގް ސަރުކާރުގެ ސެނެޓް ހައުސް އިންނެވެ. އަރިހުގައި ވަޑައިގަންނެވި ވަފުދުގެ ބޭފުޅުން ތިއްބަވާ ގޮތައް ހަމަޖެއްސީ އެ ތަނުގައި ހުންނަ އެމެރިކާގެ ކޮންސިއުލޭޓްގައެވެ.

ޖީ-ޓުވެންޓީ ސަމިޓްގައި ބައިވެރިވެ ވަޑައިގަތުމަށް ރައީސް ޓްރަމްޕް ހެމްބަރގް އަށް ވަޑައިގަތީ ބުރާސްފަތި ދުވަހުއެވެ.