ޖީ 20 ސަމިޓް:ޕެރިސް އެއްބަސްވުން ދެމެހެއްުޓުމަށް އެމެރިކާ ފިޔަވާ ހުރިހާ ގައުމުން އެއްބަސްވެއްޖެ

އިގްތިސާދީގޮތުން އެންމެ ކުރިއަރާފައިވާ 20 ގައުމު ނުވަތަ ޖީ 20 ގައި ހިމެނޭ ގައުމުތަކުގެ ތެރެއިން 19 ގައުމަކުން ޕެރިސް އެއްބަސްވުން ތަންފީޒުކުރާނެ ކަމުގެ ވައުދު އާ ކޮށްފިއެވެ.

ޖަރުމަނުގައި މިހާރު ކުރިޔަށްދާ ޖީ 20ގެ ބައްދަލުވުމުގައި 19 ގައުމުން ވައުދު އާކޮށްފައި މިވަނީ އެމެރިކާއިން އެ އެއްބަސްވުމަށް އަމަލު ނުކުރާނެ ކަމަށް ނިންމާފައިވަނިކޮށެވެ.

ހެމްބަރގްގައި ކުރިޔަށްދާ ސަމިޓްގައި މި މައްސަލަ ކުރިޔަށް ނުގެންދެވި މަރުތަޅު އެޅުވިފައިވަނިކޮށް ސަމިޓްގެ އެންމެ ފަހު ދުވަހު ވަނީ އެއްބަސްވުމަކަށް އާދެވިފައެވެ.

ރައީސް ޓްރަމްޕް ވަނީ ގައުމުތަކުގެ މި އެއްބަސްވުމަށް ބެއްލެވުމެއްނެތި، އެއްބަސްވުމުން ނުކުތުމަށް ނިންމަވާފައެވެ.

ސަމިޓްގައި ނެރެފައިވާ ގުޅިފައިވާ ބަޔާނެއްގައި ބުނެފައިވަނީ ޕެރިސް އެގްރީމަންޓުން އެމެރިކާ ނުކުތުމަށް ނިންމާފައިވާކަމަށެވެ.

ނަމަވެސް ޖީ 20 ގައި ދެން ހިމެނޭ ނަވާރަ ގައުމުންވަނީ އެ އެއްބަސްވުމަކީ "ބަދަލުނުކުރެވޭނެ" އެއްބަސް ވުމެއްކަމަށް އެއްބަސްވެފައެވެ.

ޕެރިސް އެގްރީމަންޓަކީ ދުނިޔޭގެ ހޫނުމިން މައްޗަށްދާ އެވްރެޖް މިންވަރު ދެ ޑިގްރީ ސެލްސިއަސްއަށްވުރެ ދަށުގައި ބެހެއްޓުމަށް ދުނިޔޭގެ ގައުމުތަކުން 2015 ވަނަ އަހަރު ވީ އެއްބަސްވުމެކެވެ. މިއީ ދުނިޔޭގެ ހުރިހާ ގައުމަކުން މިފަދަ އެއްބަސްވުމެއްވި ފުރަތަމަ ފަހަރެވެ.

ދުނިޔޭގެ ހޫނުމިން މައްޗަށްދާ އެވްރެޖް މިންވަރު ކުޑަކުރުމަށް ދުނިޔޭގެ ގައުމުތަކުން ވަނީ ކާބަން ބޭރުކުރާ މިންވަރު މަދުކުރުމަށް އެއްބަސްވެފައެވެ.