އިޒްރޭލުން ސީރިއާއާއި ގައްޒާއަށް ވައިގެ މަގުން މިސައިލް ޙަމަލާތަކެއް ދީފިއެވެ.
ސީރިއާގެ ދައުލަތުގެ މީޑިއާއާ ހަވާލާދީ ބައިނަލްއަޤުވާމީ މީޑިއާތަކުން ރިޕޯޓްކޮށްފައިވާ ގޮތުން އިސްރާއިލުން ހިސާރު ކޮށްގެން އުޅޭ "ގޯލަން ހައިޓްސް" އާއި ދިމިޝްޤާ ދިމާލުން ގޮވުންތަކެއްގެ އަޑުވަނީ އިވިފައެވެ. އެގޮތުން ގައްޒާއަށް ޙަމަލާދީފައިވަނީ އާދިއްތަ ދުވަހުގެ ހެނދުނުގެ ވަގުތެއްގައި ނަމަވެސް ސީރިއާއަށް ޙަމަލާދީފައިވަނީ އާދިއްތަ ދުވަހުގެ މެންދަމުގެ ވަގުތެއްގައިކަަމަށް ރިޕޯޓްތައް ބުނެއެވެ.
މިއީ ސީރިއާއާއި ގައްޒާގައި އުޅޭ ހަނގުރާމަވެރި ޖަމާއަތްތަކަށް އަމާޒުކޮށް އިޒްރޭލުން ދިން ޙަމަލާއެއް ކަމަށް އިޒްރޭލް ޑިފެންސް ފޯސް (އައިޑީއެފް) ގެ ތަރުޖަމާނާ ޙަވާލާދީ މީޑިއާތަކުން ރިޕޯޓް ކޮށްފައިވެއެވެ.
ނަމަވެސް އޭގެ ތެރެއިން ގިނަ މިސައިލްތައް ހުއްޓުވާލެވިފައިވާކަމަށް ސީރިއާގެ ދައުލަތުގެ މީޑިއާއިން ރިޕޯޓްކުރެއެވެ.
ދާހިލީ ހަނގުރާމައިގައި ގިނަ ދުވަސްތަކެއް ވެފައިވާ ސީރިއާއަށް އިޒްރޭލުން އެކި ފަހަރު މަތިން ގިނަ އަދަދެއްގެ މިސައިލް އަދި ބޮމުގެ ހަމަލާތައް މީގެ ކުރިންވެސް ދީފައިވާއިރު، އިސްރާއިލުން ބުނަނީ އެމީހުން ހަމަލާތައް ދެނީ ސީރިއާގައި ހަރަކާތްތެރިވާ ލެބަނޫންގެ ހިޒްބުއްލާ ޖަމާއަތުގެ މީހުންނަށް ކަމުގައެވެ.
