ލެސޯތޯގެ ބޮޑުވަޒީރު ތޯމަސް ތަބާނޭގެ މައްޗަށް ކުރެވޭ ޤަސްތުގައި މީހަކު މަރާލުމުގެ ކުށުގެ ދަޢުވާގެ އަޑުއެހުމަށް ހާޒިރުވެވަޑައިގަންނަވަން އުޒުރުވެރިވެވަޑައިގެންފިއެވެ.

އުމުރުން 80 އަހަރުގެ ތަބާނޭގެ މައްޗަށް އުފުލާފައިވަނީ، އޭނާގެ އަނބިމީހާ މަރާލުމުގެ ކުށުގެ ދަޢުވާއެވެ. ކޯޓަށް ހާޒިރުވެވަޑައިނުގެން ސަބަބު އޮޅުންފިލުވައިދެމުން އޭނާގެ ޕްރައިވެޓް ސެކްރެޓަރީ ބުނީ، ތަބާނޭ ހުންނެވީ ދެކުނު އެފްރިކާގައި ކަމަށެވެ. ތަބާނޭ ދެކުނު އެފްރިކާއަށް ވަޑައިގެންނެވީ ޑޮކްޓަރަށް ދެއްކެވުމަށެވެ.

ތަބާނޭގެ މައްޗަށް ކޮށްފައިވާ ދަޢުވާގެ ތަފުޞީލަށް ބަލާލާއިރު، އޭނާގެ މައްޗަށް ތުހުމަތުކުރެވެނީ 2017 ވަނަ އަހަރުގެ ތެރޭގައި އޭނާގެ އަންހެނުން ލިޕޮލޭލޫ ތަބާނޭއަށް ބަޑިން ޙަމަލާދީ މަރާލި ކަމަށެވެ. ލިޕޮލޭލޫ މަރާލާފައިވަނީ ކާރުކޮޅު ތެރޭގައި އިންނަވަނިކޮށެވެ. ބޮޑުވަޒީރު ތަބާނޭގެ އިތުރުން، އޭނާގެ މިހާރުގެ އަންހެނުން ކަމުގައިވާ މައިސަޔާ ތަބާނޭގެ މައްޗަށް ވަނީ ލިޕޮލޭލޫ މަރާލަން އަމުރުކުރިކަމުގެ ދަޢުވާ އުފުލާފައެވެ.

ތަބާނޭ ހާޒިރުނުވީ ނަމަވެސް، އޭނާއަށް ހާޒިރުވެވޭ އެހެން ތާރީޚެއް ކަނޑައެޅުމަށް ފަހު، އަލުން ކޯޓު އަޑުއެހުމެއް ތާވަލުކުރާނެ ކަމަށް ލެސޯތޯގެ ޑެޕިއުޓީ ޕޮލިސް ކޮމިޝަނަރު ޕަސޭކާ މޮކޭޓޭއާ ޙަވާލާދީ އަލްޖަޒީރާގައި ވެއެވެ.

ގިނަ ދުވަސްތަކެއް ވަންދެން ލެސޯތޯގެ ބޮޑުވަޒީރުގެ މަޤާމު ފުރުއްވާފައިވާ ތަބާނޭ ވަނީ އަންނަ ޖުލައި މަހުގެ ތެރޭގައި މަޤާމުން އިސްތިޢުފާދެއްވާނެ ކަމަށް ވިދާޅުވެފައެވެ. ދަޢުވާތަކަށް ޖަވާބުދާރިވެވަޑައިގަތުމަށް ކޯޓަށް ހާޒިރުވާނެ ކަމުގެ ޔަޤީންކަން ތަބާނޭ ވަނީ މީގެ ކުރިން ދެއްވާފައެވެ. އަދި އޭރުގެ އަންހެނުން މަރާލުމުގައި އެއްވެސް ބައިވެރިވުމެއް ނޯންނާނެ ކަމަށްވެސް ތަބާނޭ ވަނީ ތަކުރާރުކޮށް ވިދާޅުވެފައެވެ.