ފިންސްބަރީ ގެ ހަމަލާ: ހަމަލާދިން ސަރަޙައްދަށް ބޮޑުވަޒީރު ޒިޔާރަތްކުރައްވައިފި

ނޯތު ލަންޑަންގެ މިސްކިތަކުން ފޭބި މީހުންނަށް އަމާޒުކޮށް ދިން ހަމަލާއަކީ މި ފަހުން ދިން އެހެނިހެން ހަމަލާތަކެކޭ އެއްގޮތަށް ހިތްދަތިކަން ގެނުވި ހަމަލާއެއްކަމަށް އިނގިރޭސި ބޮޑުވަޒީރު ތެރީސާ މޭ ވިދާޅުވެއްޖެއެވެ.

އެކަމަނާ މިހެން ވިދާޅުވީ ނޯތު ލަންޑަނުގެ ދެ މިސްކިތެއްގެ ކައިރީގައި އޮންނަ ހިނގާފައި އުޅޭ ސަރަހައްދަށް ބާރު ސްޕީޑުގައި ދުއްވާފާއިދިއަ ވޭނެއް ވަދެ ހިނގި ހާދިސާގައި އެކަކު މަރުވެ އިތުރު 10 މީހުން ޒަޚަމް ކޮށްލި ހާދިސާއަށްފަހުއެވެ.

އެ ސަރަޙައްދުގައި ތިބި މީހުން ވަނީ، ވޭން ދުއްވަން އިން އުމުރުން 48 އަހަރުގެ މީހާ ހިފަހައްޓާފައެވެ. އޭގެ ފަހުން ފިންސްބަރީ ޕާކްގެ ފުލުހުން ވަނީ އޭނާ ހައްޔަރުކޮށްފައެވެ.

އާދީއްތަ ދުވަހުގެ ރޭ މެންދަމު ހިނގި މި ހާދިސާ އިނގިރޭސި ވިލާތުގެ ކައުންޓަރ ޓެރެރިޒަމް ކޮމާންޑުން ގެންދަނީ ތަހުގީގުކުރަމުންނެވެ.

މަންޒަރު ދުށް މީހުން ބުނީ ސެވެން ސިސްޓަރސް މަގުން މި ވޭން ދުއްވާފައި ދިޔައީ ނަމާދުން ފައިބައިގެން ނުކުތް މީހުންނާ ދިމާލަށް ކަމަށެވެ.

ޒަޚަމްވި މީހުންގެ ތެރެއިން އަށް މީހަކު ހޮސްޕިޓަލަށް ގެންގޮސްފައިވާއިރު އަނެއް ދެ މީހުންނަށް ފަރުވާ ދީފައިވަނީ ހާދިސާ ހިނގި ސަރަހައްދުގައެވެ.

ވޭން ދުއްވަން އިން މީހާ ވެސް ހޮސްޕިޓަލަށް ގެންދިޔަ ކަމަށް ފުލުހުން ވަނީ ބުނެފައެވެ.

ބޮޑުވަޒީރު ވިދާޅުވީ ޑަރްއިވަރ މަސައްކަތް ކޮށްފައިވަނީ އެކަނި ކަމަށާއި އަދި އަށް މިނެޓްގެ ތެރޭގައި އެ ހަމަލާއަކީ ޓެރެރިސްޓް ހަމަލާއެއްކަމަށް ފުލުހުން ކަނޑައަޅާފައިވާކަމަށެވެ.

ބޮޑުވަޒީރު މޭ މި ވާހަކަފުޅު ވިދާޅުވެފައިވަނީ އެކަމަނާ ރިޔާސަތު ބެލެހެއްޓެވި ކުއްލިހާލަތްތަކާ ބެހޭ ކޯބްރާ ކޮމިޓީގެ ބައްދަލުވުމަކަށްފަހުއެވެ.

ޑައުނިންގ ސްޓްރީޓްގެ ބޭރުގައި މި ބަޔާން ދެއްވުމަށްފަހު އެ ކަމަނާ ވަނީ ހާދިސާ ހިނގި ސަރަހައްދަށް ވަޑައިގެން ދީނީ ލީޑަރުންނާ ބައްދަލު ކުރައްވާފައެވެ.