ކުރީގެ ރައީސް އަބްދުﷲ ޔާމީން މިނިވަންކުރަން ކުރައްވާ މަސައްކަތްތަކަށް އިތުރު ވަގުތު ދިނުމަށް ބޭނުންވާތީ ޖުމްހޫރީ ޕާޓީގެ މެމްބަރުކަމުން ކުރީގެ ނައިބް ރައީސް ޑރ. މުހައްމަދު ޖަމީލު އިސްތިއުފާދެއްވައިފިއެވެ.
ޑރ.ޖަމީލް އިސްތިއުފާ ދެއްވީ އާދިއްތަ ދުވަހުގެ ވަގުތެއްގައެވެ. ރާއްޖެއެމްވީއަށް މައުލޫމާތު ދެއްވަމުން ޑރ.ޖަމީލް ވިދާޅުވީ ޖޭޕީންގެ މެމްބަރުކަމުން އިސްތިއުފާ ދެއްވީ ސިޔާސީ މަސައްކަތް ކުރުމުގެ ފުރުސަތު އެޕާޓީގައި ހުރެގެން ކުރުމަށް ހަނިވާތީ ކަމަށެވެ. ނަމަވެސް އިތުރު ތަފްސީލެއް ނުދެއްވައެވެ.
މީގެ އިތުރުން ޑރ. ޖަމީލް ވިދާޅުވީ ދެން މަސައްކަތް ކުރައްވާނީ ގާނޫނީ އެކި މަސައްކަތްތައް ކުރުމަށެވެ. އެގޮތުން މިހާރު ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ވަކީލުކަން ކުރެއްވުމަށް އިތުރު ވަގުތުދެއްވާނެ ކަމަށް ވިދާޅުވިއެވެ. އަދި ވިދާޅުވީ ޚާއްސަ އިސްކަމެއްދީގެން އެމަނިކާނު މިނިވަންކުރުމަށް ކުރަންޖެހޭ މަސައްކަތްތައް ކުރާނެ ކަމަށެވެ. ޑރ.ޖަމީލްއަކީ ރައީސް ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ބޭފުޅެކެވެ.
ރައީސް ޔާމީންގެ ދައުރުގައި އެންމެ ފުރަތަމަ ނައިބު ރައީސްކަން ކުރެއްވި ޑރ. ޖަމީލް އެ މަގާމުން ދުރުކުރެއްވުމުން ރައީސް ޔާމީންއަށް ވަރަށް ބޮޑަށް ފާޑުވިދާޅުވިއެވެ. ނަމަވެސް، ރައްޔިތުންގެ މަޖިލިސް އިންތިހާބުގައި އެމްޑީޕީއިން ހުރިހާ ގޮނޑިތަކަށް ވާދަކުރަން ނިންމި ހިސާބުން ޑރ. ޖަމީލް ވަނީ ކޯލިޝަން މަސައްކަތުން ވަރަށް ބޮޑަށް ފެޔަށް ޖެހިވަޑައިގެންފައެވެ. އަދި މިހާރުގެ ސަރުކާރަށް އެންމެ ބޮޑަށް ފާޑުވިދާޅުވާ އެއް ބޭފުޅަކީވެސް ޑރ. ޖަމީލެވެ.
މިދިޔަ ނޮވެމްބަރު މަހުގެ 28 ވަނަ ދުވަހު ކްރިމިނަލް ކޯޓުން ވަނީ ރައީސް ޔާމީންގެ މައްޗަށް މަނީ ލޯންޑަރިންގ ކުށް ސާބިތުވާކަމަށް ނިންމައި، 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާ ކުރުމަށް ހުކުމް ކޮށްފަ އެވެ. އަދި އެފައިސާ 6 މަސް ދުވަހުގެ ތެރޭގައި އިންލަންޑް ރެވެނިއު އޮތޯރިޓީ (މީރާ) އަށް ދެއްކުމަށް ވެސް ކޯޓުގެ ހުކުމުގައިވެއެވެ.
