ފަސް މެޗަށްފަހު ބޭލް އަލުން ރެއާލްގެ ސްކޮޑަށް!

ޖަނަވަރީ މަހު ފަޔަށް ލިބުނު އަނިޔާއިން ސަލާމަތްވެ، ބޭލް އަލުން އަނބުރާ ރެއާލްގެ ސްކޮޑުގައި ހިމެނިގެން އާދީއްތަ ދުވަހުގެ ރޭ އޮސަސޫނާ އާއި ދެކޮޅަށް ކުޅޭ މެޗުގައި ކުޅޭނެ ކަމަށް މީޑިއާ ރިޕޯޓުތައް ބުނެފިއެވެ.

ފަޔަށް ލިބުނު އަނިޔާގެ ސަބަބުން ބޭލްއަށް ވަނީ ރެއާލް ވަޔަލޮލިޑް، ރެއާލް ޒަރަގޯޒާ، އެތްލެޓިކޯ މެޑްރިޑް އަދި ރެއާލް ސޮސައިދާދް އާއި ދެކޮޅަށް މެޑްރިޑުން ނުކުތް މެޗުތައް ގެއްލިފައެވެ.

ރެއާލްގެ ފަރިތަކުރުންތަކުން ބޭލް ނުފެންނާތީ އެކަމާއިބެހޭ ގޮތުން ކޯޗު ޒިނެދިން ޒިދާން ބުނީ ބޭލްގެ ފަރިތަކުރުންތަކާއި މެދު ހިތްހަމަ ޖެހޭ ކަމަށާއި، އެންމެ ބޮޑު ހިތްހަމަ ޖެހުމަކީ އަނިޔާއިން ސަލާމަތްވެ ބޭލް އަލުން ކުޅުމުގެ ތެރެއަށް އައުން ކަމަށެވެ. ރެއާލްގައި މިވަގުތު އޮތް ސްކޮޑަކީ ވަރުގަދަ ސްކޮޑެއް ކަމުން ކޮންމެ މެޗަކަށް ސްކޮޑަށް ކުޅުންތެރިން ނެގުމަކީ ފަސޭހަ ކަމެއް ނޫން ކަމަށާއި އެއްފެންވަރަކަށް ކުޅޭ 30 ކުޅުންތެރިން ރެއާލްގައި ތިބޭއިރު މެޗަކަށް ނެގެނީ 25 ކުޅުންތެރިންގެ ސްކޮޑެއްކަމަށް ޒިދާން ބުންޏެވެ. އަދި ސްކޮޑުގައި ހިމެނެން ކޮންމެ ކުޅުންތެރިޔަކު އެކުރާ މަސައްކަތާއި ދޭތެރޭ ހިތްހަމަ ޖެހޭ ކަމަށް ބުނަމުން ޒިދާން ބުނީ ބޭލް ޕްރެކްޓިސްތަކުގައި ދައްކާ ޕާފޯމެންސްއާއި މެދު ހިތްހަމަ ޖެހޭ ކަމަށެވެ.

ބޭލް އަކީ ރެއާލްއަށް މުހިންމު ކުޅުންތެރިއެއް ކަމަށް ބުނަމުން ޒިދާން ބުނީ ބޭލް ރެއާލްގައި މަޑުކުރާނެ ކަމުގެ ފުރިހަމަ ޔަޤީންކަން އޭނާއަށް އެބައޮތް ކަމަށާއި، އޭނާ ރެއާލް ދޫކޮށް މި ޓްރާންސްފަރ މާކެޓް އަދި ކުރިޔަށް އޮތް ހޫނު މޫސުމުގެ ޓްރާންސްފަރ މާކެޓްގައި ނުދާނެ ކަމަށެވެ.

ބޭލް ވަނީ ރެއާލްއަށް މިހާތަނަށް ކުޅުނު 246 މެޗުގައި 105 ލަނޑު ކާމިޔާބުކޮށް، އެ ކްލަބާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުރޕަ ކަޕް ތިން ފަހަރު، ކްލަބު ވޯލްޑް ކަޕް ތިން ފަހަރު، ސްޕެނިޝް ލީގު އެއް ފަހަރު، ސްޕެނިޝް ކަޕް އެއް ފަހަރު އަދި ސްޕެނިޝް ސުޕަރ ކަޕް އެއް ފަހަރު ކާމިޔާބުކޮށްފައެވެ