ދިއްދޫގައި ފެތުންތެރިން ތަމްރީނުކުރުމުގެ ޕްރޮގްރާމް ފަށައިފި

ސްވިމިންގ އެސޯސިއޭޝަނާއި، ހއ. ދިއްދޫ ފެތުންތެރިން އިސްނަގައިގެން ދިއްދޫގައި ސްވިމަރސް ޑިވެލޮޕްމަންޓް ޕްރޮގްރާމް އެއް ފަށައިފިއެވެ.

ސްވިމިންގ އެސޯސިއޭޝަނުން ބުނީ މިއީ މާލެ ފިޔަވާ ރާއްޖޭގެ އެހެން ރަށެއްގައި ފެތުންތެރިން ތަމްރީނު ޕްރޮގްރާމްއެއް ހިންގާ ފުރަތަމަ ފަހަރު ކަމަށެވެ.

ޖުމްލަ 14 ކޯޗުންގެ އެހީތެރިކަމާއިއެކު ފެށި މި ޕްރޮގްރާމްގައި މިހާތަނަށް 40 ފެތުންތެރިންވަނީ ބައިވެރިވެފައެވެ. ސްވިމަރސް ޑިވެލޮޕްމަންޓް ޕްރޮގްރާމަކީ، ފެތުން ކުރިއެރުވުމަށް ބިގިނަރ ލެވެލް އިން ފެށިގެން، ސްކޮޑް ލެވެލް އަށް ފެތުންތެރިން ގެންދިޔުމަށް އަމާޒުކޮށްގެން ހިންގޭ ޕްރޮގްރާމެކެވެ.

ސްވިމިންގ އެސޯސިއޭޝަނުން ބުނީ މި ޕްރޮގްރާމް ހިންގަނީ ހއ.ދިއްދޫ ކައުންސިލާއި، ހއ.އަތޮޅު ކައުންސިލް އަދި ސްކޫލްތަކުގެ ވަރަށް ބޮޑު އެހީތެރިކަމާއިއެކުގައި ކަމަށެވެ. މި ޕްރޮގްރާމްގެ ފަރިތަކުރުންތައް ކުރިއަށް ގެންދިޔުމަށް ހަމަޖެހިފައިވަނީ ހއ.ދިއްދޫގައި ސަރުކާރުން އަޅުއްވައިދެއްވި ފްލޯޓިންގ ސްވިމިންގ ޕްލެޓްފޯރމް ސަރަޙައްދުގައެވެ.

ސްވިމިންގ އެސޯސިއޭޝަނުން އިތުރަށް ބުނީ މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓާއި ސްވިމިންގ އެސޯސިއޭޝަނާއި ގުޅިގެން ދިވެހިރާއްޖޭގެ އެކި ކަންކޮޅުތަކުގައި ސްވިމިންގ ޕްލެޓްފޯރމްތައް ގާއިމްކޮށްފައިވާ އަދި، މިހާރުވެސް ކުރަމުންދާ ރަށްރަށަށް އަމާޒުކޮށްގެން ބީ.އެމް.އެލްގެ އެހީތެރިކަމާއިއެކު ދިވެހިރާއްޖޭގެ އެކި ކަންކޮޅުތަކުގައި ސްވިމަރސް ޑިވެލޮޕްމަންޓް ޕްރޮގްރާމްތައް ފެއްޓުމަށް ހަމަޖެހިފައިވާ ކަމަށެވެ.