ބޭލް އަނބުރާ ޓޮޓެންހަމަށް ބަދަލުވުން ނާދިރު: އޭޖެންޓް

ރެއާލް މެޑްރިޑަށް ކުޅެމުން އަންނަ ވޭލްސްގެ ފޯވާޑް ގެރެތު ބޭލް، ކުރީގެ ކްލަބު ޓޮޓެންހަމް ހޮޓްސްޕާސްއަށް ބަދަލުވުން ނާދިރު ކަމަށް އޭނާގެ އޭޖެންޓް ޖޮނަތަން ބާނެޓް ބުނެފި އެވެ.

ރިޕޯޓުތައް ބުނާ ގޮތުން ބޭލް ގެންދިޔުމަށް ޓޮޓެންހަމްގެ ކޯޗު ހޯސޭ މޮރީނިއޯ ބޭނުންވެއެވެ. އަދި މި ސީޒަން ނިމުމުން ބޭލްއަށް ޓޮޓެންހަމުން ބިޑްކުރާނެ ކަމަށްވެސް ވަނީ ރިޕޯޓުކޮށްފައެވެ.

ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް ވަނީ އެ ކްލަބާ އެކު ހަދާފައިވާ އެއްބަސްވުން 2016 ވަނަ އަހަރު، 2022 ގެ ނިޔަލަށް އާކޮށްފައެވެ.

މި ސީޒަން ފެށުމުގެ ކުރިން ރެއާލްގެ ވެރިން ބޭލް އާއި މެދު ހިތްހަމަނުޖެހި އޭނާ ވިއްކާލަން އުޅުނު ކަމަށް އަޑުފެތުރުނެވެ. ރެއާލްގެ ވެރިން ބޭލް އާއި މެދު ހިތްހަމަނުޖެހުނީ ވޭލްސްގެ ޔޫރޯ ކޮލިފިކޭޝަން މެޗަކަށްފަހު އޭނާ ދެއްކި ވާހަކަތަކާއި ގުޅިގެންނެވެ. އެއަށްފަހު ފްރީ ސީޒަން ބައެއް މެޗުތަކުގައި ބޭލް ހިމަނާފައެއްވެސް ނުވެއެވެ.

އެކަމަކު އޭގެ ފަހުން ރެއާލްގެ ކޯޗު ޒައިނުއްދީން ޒިދާން ވަނީ ބޭލްގެ ދިފާއުގައި ވާހަކަދައްކާފައެވެ. ޒިދާން ބުނީ އޭނާއާ ބޭލްއާ ދެމެދު އެއްވެސް މައްސަލައެއް ނެތް ކަމަށާއި، ބޭލްއަކީ އެޓީމަށް ވަރަށް މުހިންމު ކުޅުންތެރިއެއް ކަމަށެވެ.

ބޭލް ހޯދުމަށް ޓޮޓެންހަމުން މަސައްކަތް ކުރަމުންދާއިރު، ދާދި ފަހުން ބޭލްގެ އޭޖެންޓް ބުނީ އޭނާ އެނބުރި ޓޮޓެންހަމަށް ދިޔުމަކީ ވަރަށް ނާދިރު ކަމެއް ކަމަށެވެ. އެގޮތުން މިވަގުތު ބޭލް ރެއާލްގައި ހުރީ ހިތްހަމަޖެހިގެން ކަމަށާއި، އއެހެން ޓީމަކަށް ބަދަލުވުމާއި މެދު ގޮތެއް ނިންމާލީ ރެއާލްއާއެކު ހަދާފައިވާ އެއްބަސްވުން ހަމަވުމުން ކަމަށްވެސް ބުންޏެވެ.

ބޭލް ވަނީ ރެއާލްއަށް މިހާތަނަށް ކުޅުނު 246 މެޗުގައި 105 ލަނޑު ކާމިޔާބުކޮށް، އެ ކްލަބާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު، ކްލަބު ވޯލްޑް ކަޕް ތިން ފަހަރު، ސްޕެނިޝް ލީގު އެއް ފަހަރު، ސްޕެނިޝް ކަޕް އެއް ފަހަރު އަދި ސްޕެނިޝް ސުޕަ ކަޕް އެއް ފަހަރު ކާމިޔާބުކޮށްފައެވެ.