ސްޕެނިޝް ލަލީގާ: ޑިޕޯޓިވޯއާ ދެކޮޅަށް ރޮނާލްޑޯ، ބޭލް އަދި ރާމޮސްއަށް ނުކުޅެވޭނެ
26 އެޕްރީލު 2017 | ބުދަ 18:07ބާސާ އެއްވަނައިގައި އޮތީ އެއް މެޗު އިތުރަށް ކުޅެގެން
ރޮނާލްޑޯ، ބޭލް އަދި ރާމޮސް ފޮޓޯއަކަށް ހުއްޓިލައިގެން
ސްޕެނިޝް ލަލީގާގައި ޑިޕޯޓިވޯ ލަކަރޫނާއާ ދެކޮޅަށް ރެއާލް މެޑްރިޑް ކުޅޭ މެޗުގައި ކްރިސްޓިއާނޯ ރޮނާލްޑޯ، ގެރެތު ބޭލް އަދި ސާޖިއޯ ރާމޮސްއަށް ނުކުޅެވޭނެކަން ކަށަވަރުވެއްޖެއެވެ.
ބުދަ ދުވަހުގެ ރޭ ކުޅޭ މި މެޗަށް ރެއާލް އިން ނަގާފައިވަނީ 19 ކުޅުންތެރިންގެ ސްކޮޑެކެވެ. ބޭލްއަށް ލިބުނު އަނިޔާއިން އަދިވެސް ސަލާމަތްނުވާތީ އޭނާ ސްކޮޑަށް ނަގާފައިނުވާއިރު، ރާމޮސް ސްކޮޑަށް ނުނެގީ އެލްކްލެސިކޯގައި ދެއްކި ރަތްކާޑާއެކު، ސަސްޕެންޝަންގައި ހުރުމުގެ ސަބަބުންނެވެ.
އަނިޔާއިން ސަލާމަތްވެ ބޭލްއަށް ކުޅުމުގެ ތެރެއަށް އަލުން އާދެވޭނެ ދުވަހެއް ކަށަވަރުނުވާއިރު، ރާމޮސްއަށް ސަސްޕެންޝަނުން ސަލާމަތްވެ ކުޅެވޭނީ އަންނަ ހޮނިހިރު ދުވަހު އަމިއްލަ ދަނޑުގައި ވެލެންސިއާއާ ދެކޮޅަށް ރެއާލް ކުޅޭ މެޗުގައެވެ.
ޑިޕޯޓިވޯ މެޗުން ރޮނާލްޑޯ ބާކީ ކުރި ސަބަބެއް ކަށަވަރުނުވާއިރު، އޭނާ ވަނީ ޔުއެފާ ޗެމްޕިއަންސް ލީގުގައި ރެއާލް ސެމީއަށް ގެންދިއުމަށް މުހިންމު ދައުރެއް އަދާކޮށްފައެވެ. އެގޮތުން ބަޔާންއާ ދެކޮޅަށް ކުޅުނު ކުއާޓާ ފައިނަލް ދެ ލެގުގައި ރެއާލް މޮޅުކޮށްދީފައިވަނީ ރޮނާލްޑޯއެވެ.
ސްޕެނިޝް ލީގުގައި ބާސާއާ ދެކޮޅަށް ރެއާލް އެންމެ ފަހުން ކުޅުނު މެޗުން 2-3 ގެ ނަތީޖާއިން ބަލިވެފައިވާއިރު، ރެއާލް އާއި ބާސާ ވަނީ ޕޮއިންޓްގެ ގޮތުން ހަމަހަމަ ވެފައެވެ. އެހެންނަމަވެސް ލަނޑުގެ ތަފާތުން އެއްވަނައިގައި އޮތީ ބާސާއެވެ. ބާސާ އެއްވަނައިގައި އޮތީ އެއް މެޗު އިތުރަށް ކުޅެގެންނެވެ.
