2000 ގެ ކުރީ ކޮޅުގައި ޗައިނާގައި ހަލުވިކަމާއެކު ފެތުރުނު ސާސް ރޯގާއަށްވުރެ ޗައިނާގައި މިހާރު ފެތުރެމުންދާ ނޮވެލް ކޮރޯނާވައިރަސްގައި މަރުވި މީހުންގެ އަދަދު އިތުރުވެފައިވާ ކަމަށް ޗައިނާގެ މީޑިއާތަކުން ރިޕޯޓްކޮށްފިއެވެ.

ޗައިނާގެ ހޫބޭ ޕްރޮވިންސްގެ ވޫހާން ސިޓީން ފުރަތަމަ ފެނުނު ނޮވެލް ކޮރޯނާ ވައިރަސް ޗައިނާގެ ހުރިހާ ސިޓީއަކަށް ފެތުރި ދުނިޔޭގެ 24 ގައުމަކުން މި ވައިރަސް ޖެހިފައިވާ މީހުން ވަނީ ފެނިފައެވެ.

އާދިއްތަ ދުވަހާ ހަމައަށް ޗައިނާގައި އެކަނި ކޮރޯނާ ވައިރަސް ޖެހިގެން 361 މީހަކު މަރުވެފައިވާކަމަށް ކަމާބެހޭ ފަރާތްތަކުން ހާމަކޮށްފައިވާ އިރު، ސާސް ރޯގާއާއި ގުޅިގެން ޗައިނާއިން މަރުވެފައިވަނީ 349 މީހުންނެވެ. ކޮރޯނާވައިރަސް 17200 މީހުން މިހާތަނަށް ޖެހިފައިވާކަން ކަށަވަރުކުރެވިފައިވާ އިރު، މިއީ 2003 ވަނަ އަހަރު ސާސް ރޯގާ ފެތުރުނު އިރު އެ ބަލި ޖެހުނު މީހުންނަށްވުރެ އިތުރު އަދަދެއްކަމަށް ކަމާބެހޭ އިދާރާތަކުން ވަނީ ހާމަކޮށްފައެވެ.

މިހާތަނަށް 361 މީހަކު ކޮރޯނާވައިރަސްގައި މަރުވެފައިވާ އިރު، ޗައިނާއިން ހާމަކޮށްފައިވަނީ މި ވައިރަސް ޖެހުނު 480 މީހަކު ރަނގަޅުވެފައިވާ ކަމަށެވެ. ޗައިނާގެ ކަމާބެހޭ އިދާރާތަކުން ބުނެފައިވަނީ ކޮރޯނާވައިރަސްގެ ނުރައްކާ ކުޑަ ކަމަށާއި، މި ވައިރަސް ޖެހުނު މީހުންގެ 6 އިންސައްތަ މީހުން މަރުވި ނަމަވެސް، އެ ހާލަތު މިހާރު ބަދަލުވެގެން އަންނަ ކަމަށެވެ.

މުޅި ޗައިނާއަށް މި ވައިރަސް ފެތުރިފައިވާ އިރު، ވައިރަސްގެ އަސަރު ހުރި މީހުން 24 ގައުމަކުން ވަނީ ފެނިފައެވެ. މި ވައިރަސްއާ ދެކޮޅަށް ޗައިނާއިން ވަރުގަދަ މަސައްކަތްތަކެއް ކުރަމުންއަންނަ އިރު، ވައިރަސް އިތުރަށް ފެތުރުނަ ނުދިނުމަށްޓަކައި މި ވައިރަސް އެންމެ ފުރަތަމަ ފެނުނު ވޫހާން ސިޓީ ވަނީ ބަންދުކޮށް އެ ސިޓީން ބޭރަށް ދިއުމާއި ވަނުން ވެސް މަނާކޮށްފައެވެ. މީގެ އިތުރުން މި ވައިރަސް އަށް ހާއްސަކޮށްގެން ހޮސްޕިޓަލް ވެސް ވަނީ އަޅާފައެވެ.

މިދިޔަ ހޮނިހިރު ދުވަހު ޗައިނާގެ ނެޝަނަލް ހެލްތް ކޮމިޝަނާއި، ސިވިލްއޭވިއޭޝަން އަދި ޕަބްލިކް ސެކިއުރިޓީ މިނިސްޓްރީން ވަނީ ކޮރޯނާވައިރަސްގައި މަރުވާ މީހުން ވަޅުލުމަށް ޖަނާޒާ ނުބާއްވާ ވީހާވެސް އަވަހަކަށް ހަށިގަނޑު އަންދާލުމަށް ގައިޑްލައިނެއް ނެރެފައެވެ.

މި ވައިރަސްގައި ޗައިނާއިން ބޭރު ގައުމެއްގައި މީހަކު މަރުވެފައިވަނީ ފިލިޕީންސްގައެވެ. އަދި ޑަބްލިއުއެޗްއޯ އިން ވަނީ ކޮރޯނާވައިރަސް އަކީ ބައިނަކްއަގުވާމީ ސިއްހީ ކާރިސާއެއްކަމަށް ކަނޑައަޅާ ހޮނިހިރު ދުވަހު އިއުލާންކޮށްފައެވެ.