ހެލިކޮޕްޓަރ އެކްސިޑެންޓެއްގައި ބާސްކެޓްބޯޅަ ލެޖެންޑް ކޯބީ ބްރަޔަންޓް, 41, ހޯމާ ދުވަހު މަރުވެފައިވާއިރު، ފޭނުން އަދިވެސް ދަނީ ހިތާމަފާޅު ކުރަމުންނެވެ.
މި ހާދިސާގައި ހެލިކޮޕްޓަރުން ދަތުރުކުރި އެންމެން މަރުވެފައިވާއިރު، އޭގެތެރޭގައި ކޯބީގެ 13 އަހަރުގެ ދަރިފުޅު، ޖިއާނާ އާއި އިތުރު ހަތް މީހަކު ހިމެނެއެވެ.
އުމުރުން އެންމެ 18 އަހަރުގައި އެމެރިކާގެ ނެޝަނަލް ބާސްކެޓްބޯލާ އެސޯސިއޭޝަން (އެންބީއޭ)އަށް ޑްރާފްޓްވި ކޯބީ 38 އަހަރުގައި ރިޓަޔަރ ކުރިއިރު، އޭނާގެ މުޅި ބާސްކެޓްބޯޅަ ހަޔާތް ހޭދަކޮށްފައިވަނީ އެލްއޭ (ލޮން އެންޖަލިސް) ލޭކަރސްއާއެކުއެވެ. އަދި އޭނާގެ އެހީތެރިކަމާއެކު ލޭކަރސްއިން ފަސް ޗެމްޕިއަންޝިޕް ކާމިޔާބުކޮށްފައިވާއިރު، އޭނާ ވަނީ ދެ ފަހަރު މަތިން އެންބީއޭ ފައިނަލްސްގެ އެމްވީޕީކަމަށް ހޮވިފައެވެ. އަދި 2008 ވަނަ އަހަރުގެ މުޅު އެންބީއޭގެ އެމްވީޕީއަށް އޭނާ ހޮވުނެވެ.
ކޯބީ މަރުވުމަށްފަހު އޮތް ފުރަތަމަ ގޭމް ލޭކަރސްއިން ފަސްކޮށްފައިވާއިރު، ޕޯޓްލޭންޑް ޓްރެއިލް ބްލޭޒަރސްއާ ދެކޮޅަށް އެ ޓީމުން ވަނީ ހުކުރު ދުވަހު ނިކުމެފައެވެ. މި މެޗް ބްލޭޒަރސް އިން ކާމިޔާބުކުރީ، 127 – 119 ގެ ނަތީޖާއަކުންނެވެ.
އަދި މިއީ ކޯބީގެ މަރަށްފަހު ލޭކަރސްއިން ކުޅުނު ފުރަތަމަ މެޗަށްވާއިރު، މެޗްގެ ކުރިން އޭނާއަށް ގިނަ ޓްރިބިއުޓްތަކެއްވެސް ދީފައިވެއެވެ.
އެގޮތުން، އެލްއޭ ލޭކަރސްގެ މިހާރުގެ އެމްވީޕީ އަދި ކޯބީ މަރުވުމުގެ އެއް ދުވަސް ކުރިން އޭނާގެ ސްކޯގެ ރިކޯޑް މުގުރާލި ލެބްރޯން ޖޯންސްވަނީ ކޯބީ ހަނދާނުގައި ވާހަކަދައްކާފައެވެ.
ކޯބީ އަކީ އަހަރަމެން އެންމެންނަށް ވަރުގަދަ ހިތްވަރެއް. އަހަރަމެން ހަމަ މި އޭނާގެ ލީޑް ފޮލޯ ކުރަނީލެބްރޯން ޖޭމްސް![]()
ލެބްރޯންގެ ވާހަކައަށްފަހު 24.2 (24 – ކޯބީގެ ޖަރޒީ ނަންބަރު އަދި 2- ޖިއާނާގެ ޖަރޒީ ނަންބަރު) ސިކުންތުގެ ސުކޫތެއް ނަގާފައިވެއެވެ. އަދި ލަވކިޔުންތެރިޔާ އަޝަރ ވަނީ ކޯބީގެ ހަނދާނުގައު "އެމޭޒިންގ ގެރޭސް" ކިޔާފައެވެ.
ކޯބީއާއި ޖިއާނާ ލޭކަރސްގެ ގިނަ މެޗްތައް ބަލަން ސްޓޭޑިއަމްއަށް ގޮސްފައިވާއިރު، ދެ މީހުން އެންމެ ފަހުން ދިޔަ މެޗްގައި އިށީނދެ ތިބި ގޮނޑީގައި މާތަކެއް އަތުރާފައު ހުއްޓެވެ. ދެ މީހުންގެ ޖަރޒީ ނަންބަރާ އެކުއެވެ.
![](https://dyncz33htw1ec.cloudfront.net/posts/wplVXTNjRihcnUBE4gdA.jpg)
ޖިއާނާ އަކީ ބައްޕަގޮތަށް ބާސްކެޓްބޯޅައަށް ލޯބިޖެހިފައިވާ ކުއްޖަކަށްވާއިރު، ކޯބީ ލެގަސީ ކުރިއަށް ގެންދާނީ އޭނާކަމަށް ކޯބީ އިންޓަވިއުތަކުގައި ބުނެފައިވެއެވެ.
ހުކުރު ދުވަހުގެ މެޗް ބަލަން 20،000 މީހުން ވަނީ ސްޓޭޕަލްސް ސެންޓަރު ފުރާލާފައެވެ.
ހެލިކޮޕްޓަރ އެކްސިޑެންޓެއްގައި ކޯބީ މަރުވި ހަބަރާއެކު، އޭނާއާއި އަންހެނުން ވެނެއްސާ އެކީގައި ހެލިކޮޕްޓަރުގައި ދަތުރު ނުކުރުމަށް އެއްބަސްވެފައިވާކަމުގެ ރިޕޯޓްތައް ފެތުރުނެވެ. ނަމަވެސް، ކޯބީގެ އާއިލާއިން ވަނީ މިވާހަކަ ދޮގުކޮށް ބަޔާނެއް ނެރެފައެވެ. ކޯބީ އާއި ވެނެއްސާގެ އިތުރު ތިން ކުދިން ތިބެއެވެ. އެއީ، ނަތާލިއާ، ބިއަންކާ އަދި ކެޕްރި ކޯބީ ބްރަޔަންޓްއެވެ.
ވެނެއްސާވެސް ވަނޫ ސްޓޭޕަލްސް ސެންޓަރގެ ފޮޓޯއެއް އިންސްޓަގްރާމް މެދުވެރިކޮށް ޝެއާކޮށްފައެވެ. އަދި ކެޕްޝަންގައި ޖަހާފައިވަނީ "2 ނަންބަރު ނުލާ 24 އެއް ނުވާނެ" ކަމަށެވެ.