ސިޔާސީ ކުރިމަގު ފެނިފައިވަނީ ޕްރައިމަރީން ބަލިވިނަމަވެސް، ނިންމުން ބަލައިގަންނަ މެންބަރުންނަށް: ނިޔާޒް
31 ޖެނުއަރީ 2020 | ހުކުރު 08:03ޕާޓީ އާއި ދެކޮޅަށް މަސައްކަތް ކޮށްގެން ސިޔާސީ ހަޔާތަށްވި ފައިދާއެއް ނެތް ކަމަށް ވިދާޅުވި
ހުޅުމާލެ ދާއިރާގެ މެންބަރު އަދި އެމްޑީޕީގެ ޗެއަރޕާރސަންގެ ނައިބް އިދާރީ ނިޔާޒް
ސިޔާސީ ކުރިމަގު ފެނިފައިވަނީ އިންތިޚާބުތަކުގައި ބާއްވާ ޕްރައިމަރީތަކުން ބަލިވިނަމަވެސް ޕާޓީގެ މެންބަރުންގެ ނިންމުން ބަލައިގެންފައިވާ މެންބަރުންނަށްކަމަށް ހުޅުމާލެ ދާއިރާގެ މެންބަރު އަދި އެމްޑީޕީގެ ޗެއަރޕާރސަންގެ ނައިބް އިދާރީ އަލީ ނިޔާޒް ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަދައްކަމުން ނިޔާޒް ވިދާޅުވީ ޕްރއިމަރީގައި ބަލިވެގެން އެމްޑީޕީ އާ އިދިކޮޅަށް ނިކުމެ މަސައްކަތް ކުރި ފަރާތްތަކުން އެދޭފަދަ ގޮތަކަށް އެބޭފުޅުންގެ ސިޔާސީ ކަންކަން މިހާތަނަށް ގޮސްފައި ހުރި ކަމަކަށް ގަބޫލު ނުކުރެވޭ ކަމަށެވެ. ފަހުގެ ތާރީޚެއްގައި ވަކިން ޚާއްސަކޮށް، އެމްޑީޕީގެ ޕްރައިމަރީގައި ފެއިލްވެގެން އަދި އެމްޑީޕީއާއި ދެކޮޅަށް ނިކުމެ މަސައްކަތް ކޮށްގެން ކާމިޔާބުވި ތަން ފެންނަން ނެތްކަން ފާހަގަކުރެއްވި އެވެ.
ނިޔާޒް ވިދާޅުވީ އެވަގުތެއްގައި މެންބަރަކު ހުރި ހިތްހަމަ ނުޖެހުމެއްގެ ސަބަބުން ޕާޓީއާއި ދެކޮޅަށް ނިކުމެދާނެ ކަމަށާއި ނަމަވެސް އޭގެ ސަބަބުން އޭނާގެ ސިޔާސީ ހަޔާތަށްވީ ފައިދާއެއް މިހާތަނަށް ފެންނަންނެތް ކަމަށެވެ. އަދި ކުރެވުނު ކަންކަމަށް ފަހުން މަޢާފަށްއެދި، އިތުރު އިންތިޚާބެއްގައި ވާދަ ކުރިނަމަވެސް ކާމިޔާބު ލިބިފައިނުވާކަންވެސް ނިޔާޒް ފާހަގަކުރެއްވި އެވެ.
ސިޔާސީ ކުރިމަގު ފެނިފައިވަނީ ޕްރައިމަރީން ބަލިވިނަމަވެސް ނަތީޖާ ގަބޫލުކޮށް ޕާޓީގެ މެންބަރެއްގެ ގޮތުގައި މަސައްކަތް ކޮށްގެންކަމަށް ނިޔާޒް ވިދާޅުވިއެވެ.
