#މަށަށް އެނގިއްޖެ، ދެން އޮތީ #މަގޭ ޒިންމާ!
23 ޖެނުއަރީ 2020 | ބުރާސްފަތި 09:172019 ވަނަ އަހަރު ފުލުހުން ބޭނުންކުރީ "މަށަށް އެނގިއްޖެ" ހޭޝްޓެގް
މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން ހޭލުންތެރިވުމަށް ހިންގުނު ކެމްޕޭނެއްގެ ތެރެއިން
މަގުމަތީގެ ރައްކާތެރިކަމާ ގުޅޭގޮތުން "މަށަށް އެނގިއްޖެ" ނަމުގައި ފުލުހުން ބޭނުން ކުރަމުންދިޔަ ހޭޝްޓެގް ބަދަލުކޮށް، "މަގޭ ޒިންމާ" ނަމުގައި އައު ހޭޝްޓެގެއް ތަޢާރަފްކޮށްފިއެވެ.
ބުރާސްފަތި ދުވަހު އިސްކަންދަރު ކޮށީގައި ބޭއްވި ރަސްމިއްޔާތެއްގައި ފުލުހުންގެ ފަރާތުން ކަމާބެހޭ މަސްއޫލުވެރިންނާ މި ހޭޝްޓެގް ޙަވާލުކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އިސްމާޢީލް ނަވީނެވެ. އެގޮތުން ފުލުހުންގެ ފަރާތުން ވަނީ ޓްރާންސްޕޯރޓް މިނިސްޓްރީއާއި، ސިޓީ ކައުންސިލާއި، ހެލްތު ޕްރޮޓެކްޝަން އޭޖެންސީއާއި، އެލައިޑް އިންޝުއަރެންސްގެ އިތުރުން މީޑިއާތަކަށްވެސް މި ހޭޝްޓެގް ހަވާލުކޮށްފައެވެ.
ހޭޝްޓެގް ހަވާލު ކުރެއްވުމަށްފަހު ނަވީން ވިދާޅުވީ، މީގެ ހަފުތާއެއް ކުރިން ފުލުހުން މި ހޭޝްޓެގް ތަޢާރަފުކޮށްފައިވާ ކަމަށާއި، މި ކަމަކީ މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން ޢާންމުން ހޭލުންތެރި ކުރުވުމަށް ކުރާ ކަމެއް ކަމަށެވެ. އަދި ފުލުހުންގެ ޓްރެފިކް ޑިޕާރޓްމަންޓުގެ ޢަމާޒަކީ މި އަހަރު މަގުމަތީގެ އެކްސިޑެންޓު ތަކުގައި މީހެއްގެ ފުރާނަ ނުދިއުން ކަމަށްވެސް ނޫސްވެރިންނާއި ބައްދަލު ކުރައްވައި ނަވީން ވިދާޅުވިއެވެ.
ނިމިދިޔަ އަހަރު ފުލުހުން ބޭނުންކޮށްފައިވާ ހޭޝްޓެގަކީ "މަށަށް އެނގިއްޖެ" އެވެ. އެގޮތުން ފުލުހުން ބުނީ، ނިމިދިޔަ އަހަރު މަގުމަތީގެ ރައްކާތެރިކަމާ ގުޅޭގޮތުން ޢާންމުން ހޭލުންތެރި ކުރުވައި، ޓްރެފިކް ޤާނޫނުތަކާއި ޤަވާއިދުތަކަށް ޢާންމުން އަހުލުވެރި ކުރުމަށް މަސައްކަތްތަކެއް ކޮށްފައިވާނެ ކަމަށެވެ. އަދި މިއަހަރުގެ ހޭޝްޓެގްގެ މަޤްސަދަކީ އެ ފޯރުކޮށްދެވުނު މައުލޫމާތު ތަކުގެ އަލީގައި މަގުމައްޗަކީ އަމާން ތަނަކަށް ހެދުމަށް އާންމުންނާއި ކަމާބެހޭ ފަރާތްތަކުންވެސް އަދާކުރަންޖެހޭ ޒިންމާތައް އެންމެ ފުރިހަމައަށް އަދާކުރުން ކަމަށެވެ.
ފުލުހުންގެ ޓްރެފިކް ޑިޕާޓްމަންޓުން މީސްމީޑިއާގެ ޕްލެޓްފޯމްތައް ބޭނުންކުރަން ފަށާފައިވަނީ 2018 ވަނަ އަހަރުއެވެ.
މިއަހަރު މަގުމަތީގެ އެކްސިޑެންޓު ތަކުގައި މީހެއްގެ ފުރާނަ ނުދިއުމަކީ ޢަމާޒެއް ކަމުގައި ފުލުހުން ބުނެފައިވާއިރު، 2019 ވަނަ އަހަރު ޓްރެފިކް އެކްސިޑެންޓުތަކުގައި 5 މީހަކު މަރުވެފައިވެއެވެ. އޭގެތެރޭގައި 13 އަހަރުގެ ކުއްޖަކާއި، 17 އަހަރުގެ ކުއްޖަކާއި، 31 އަހަރުގެ ދެމީހުންނާއި، 36 އަހަރުގެ މީހަކު ހިމެނެއެވެ.
