ޓްރަމްޕް ''އަވަހާރަ'' ކޮށްލާ މީހަކަށް ތިން މިލިއަން ޑޮލަރު

އެމެރިކާގެ ރައީސް ޑޮނަލްޑް ޓްރަމްޕް ''އަވަހާރަ'' ކޮށްލާ މީހަކަށް ތިން މިލިއަން ޑޮލަރު ދެއްވާނެ ކަމަށް އިރާނުގެ ގާނޫނު ހަދާ މަޖިލީހުގެ މެމްބަރު އަހުމަދު ހަމްޒެހް އިއުލާން ކުރައްވައިފިއެެވެ.

ހަމްޒެހް އަކީ އިރާނުގެ ކަރމަން ޕްރޮވިންސްގެ ކަހްނުޖް ސިޓީއަށް ނިސްބަތްވެ ވަޑައިގަންނަވާ ގާނޫނު ހަދާ މަޖިލީހުގެ މެމްބަރެކެވެ. ޓްރަމްޕް އަވަހާރަކޮށްލި މީހަކަށް ތިން މިލިއަން ޑޮލަރު ދެއްވާނެ ކަމަށް ހަމްޒެހް ވިދާޅުވެފައިވަނީ މަޖިލީހުގައި ވާހަކަ ދައްކަވަމުންނެވެ.

ކަރމަން އަކީ، އެމެރިކާއިން އަވަހާރަކޮށްލި އިރާނުގެ އަސްކަރިއްޔާގެ އިސްވެރިޔާ ގާސިމް ސުލައިމާނީގެ އުފަން އަވަށެެވެ. އެމެރިކާއިން އިން ދިން ޑްރޯން ހަމަލާއެއްގައި ސުލައިމަނީ އަވަހާރަ ކޮށްލާފައިވަނީ މި ހިނގާ މަހުގެ ތިން ވަނަ ދުވަހުއެވެ.

ގާނޫނު ހަދާ މަޖިލީހުގެ މެމްބަރު ވަނީ އެމެރިކާގެ ފައުޖުތައް މެދުއިރުމަތީގެ ސަރަހައްދުން ފޭބުމަށް އިންޒާރު ދީފައެވެ. ހަމްޒެހު ވިދާޅުވީ، އެމެރިކާއިން ސުލައިމާނީ ''ޝަހީދު'' ކޮށްލަން ދިން ހަމަލާއަށްވުރެ އިރާނުން ދޭ ހަމަލާތައް ވަރުގަދަވާނެ ކަމަށެވެ.

ގާސިމް ސުލައިމާނީ އަވަހާރަކޮށްލި މައްސަލާގައި އެމެރިކާ އާއި އިރާނާ ދެ ގައުމުގެ ގުޅުންވަނީ ވަރަށް ބޮޑަށް ގޯސްވެފައެވެ.