ޖުދާންގެ އަމާޒް ވޯލްޑްކަޕް އަށް!
އޭނާގެ ފުރަތަމަ މަސައްކަތަކީ ގައުމީ ޓީމަށް ކޯޗެއް ހޯދުން
ޖުދާން
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޓެކްނިކަލް ޑިރެކްޓަރގެ މަގާމަށް ދާދިފަހުން ހަވާލުވި އިނގިރޭސިވިލާތުގެ ޖުދާން އަލީގެ އަމާޒަކީ ވެސް ގަތަރުގައި އޮންނަ ވޯލްޑްކަޕަށް ދިވެހިރާއްޖެ ކޮލިފައިވުން ކަމަށް އޭނާ ބުނެފިއެވެ،
އިނގިރޭސިވިލާތުގެ ނޫހަކަށް ދިން އިންޓަވިއުއެއްގައި ޖުދާން ބުނީ ވޯލްޑްކަޕް ކޮލިފައިންގައި ޗައިނާ، ސީރިއާ އަދި ފިލިޕީންސް މެޗު ކާމިޔާބުކޮށްގެން ރާއްޖެއަށް ވޯލްޑްކަޕް އަށް ކޮލިފައިވާނެ ކަމަށާއި އެއީ އާދަޔާ ހިލާފު ފެށުމަކަށް ވާނެ ކަމަށެވެ. އަދި އެއީ ނުވާނެ ކަމެއް ނޫން ކަމަށް އޭނާ ބުންޏެވެ.
މީގެ އިތުރުން ޖުދާން ބުނީ އޭނާގެ ފުރަތަމަ މަސައްކަތަކީ ގައުމީ ޓީމަށް ކޯޗެއް ހޯދުން ކަމަށާއި އެއީ މިހާރުގެ ކޯޗު (ކޯޗު ކަމުން ވަކިކުރި ޕީޓާ ސެގާޓް) ކޮންޓްރެކްޓް މާޗު މަހަށް ހަމަވާތީ ކަމަށާއި މިދިޔަ ހަތަރު ފަސް އަހަރު ތެރޭގައި އޭނާ ރާއްޖޭގެ ކުޅުންތެރިންގެ ކުޅުން މޮނީޓާކުރި ކަމަށާއި ޓެކްނިކަލީ ރާއްޖެ ކުޅުންތެރިންގެ ހުނަރު ހުރީ ސްޕެނިޝް ސްޓައިލްއެއް ކަމަށް ޖުދާން ވިދާޅުވިއެވެ.
ޖުދާން ވިދާޅުވީ އޭނާ ބްރެޒިލްގެ ކުރީގެ ކުޅުންތެރިޔާ ރިވާލްޑޯ އާއި، މެންޗެސްޓާ ސިޓީގެ ކުރީގެ ކޯޗު ޕީޓާ ރިޑާއިއާވެސް ވާހަކަ ދެއްކިއްޖެ ކަމަށާއި އޭނާގެ މޭޒަށް ގާތްގަނޑަކަށް 150 ސީވީ އައިސްފައިވާ ކަމަށާއި ނަމަވެސް ގައުމީ ކޯޗަކީ ޗުއްޓީއަށް ވިއްކާލާނެ މަގާމެއް ނޫން ކަމަށާއި އެ މަގާމަށް ނަގާނީ ގާބިލު ކޯޗެއް ކަމަށެވެ.
ރާއްޖެއިން ޗައިނާ، ފިލިޕީންސް އަދި ސީރިއާ ބަލިކޮށް ވޯލްޑްކަޕަށްދާ ވާހަކަ ޖުދާން ދެއްކިއިރު ރާއްޖެއަށް މިހާތަނަށް މޮޅުވެވުނީ ހަމައެކަނި ގުއާމް އަތުންނެވެ.
