20 އަހަރުން ދަށުގެ ވޯލްޑްކަޕް: 51 އަހަރު ފަހުން އިންގްލޭންޑަށް ބޮޑު ތަށްޓެއް
އިންގްލޭންޑުން ފައިނަލްގައި ވެނެޒުއޭލާ ބަލިކުރީ 0-1 ގެ ނަތީޖާއަކުން
އިންގްލޭންޑުން 20 އަހަރުންދަށުގެ ވޯލްޑްކަޕް އުފުލާލަނީ
ފީފާ 20 އަހަރުން ދަށުގެ ވޯލްޑްކަޕްގައި ވެނެޒުއޭލާ ބަލިކުރުމަށްފަހު، އިންގްލޭންޑުން މުބާރާތުގެ ޗެމްޕިއަންކަން ހޯދައިފި އެވެ.
އާދީއްތަ ދުވަހުގެ ރޭ ކުޅުނު ފައިނަލް މެޗު ވެނެޒުއޭލާއާ ވާދަކޮށް އިންގްލޭންޑުން ކާމިޔާބުކުރީ 0-1 ގެ ނަތީޖާއަކުންނެވެ.
ސައުތު ކޮރެއާގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، މެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފްގައި އިންގްލޭންޑަށް ކާމިޔާބުކޮށްދިނީ އެވަޓަން އަށް ކުޅެމުން އަންނަ ފޯވާޑް ޑޮމިނިކް ކަލްވާޓް ލެވިންސް އެވެ.
މިއީ ފާއިތުވެދިޔަ 51 އަހަރު ތެރޭގައި އިންގްލޭންޑުން ކާމިޔާބުކުރި ފުރަތަމަ ބައިނަލްއަގުވާމީ ބޮޑު ތަށްޓެވެ. މީގެއިތުރުން މިއީ އެޓީމު މިފަދަ މުބާރާތެއްގެ ފައިނަލަށްވެސް އިންގްލޭންޑް ދަތުރުކޮށްފައިވަނީ 51 އަހަރު ފަހުންނެވެ.
20 އަހަރުން ދަށުގެ ވޯލްޑްކަޕް އިންގްލޭންޑުން ކާމިޔާބުކޮށްފައިވާއިރު، މުބާރާތުގެ ގޯލްޑެން ބޯލް ހޯދާފައިވަނީ ދާދި ފަހުން ޗެލްސީން ލިވަޕޫލަށް ބަދަލުވި ޑޮމިނިކް ސޮލަންކޭ އެވެ. މީގެކުރިން މި އެވޯޑް ލިއޮނެލް މެސީ، ޕައުލް ޕޮގްބާ، ސާޖިއޯ އަގުއެރޯ އަދި ޑިއެގޯ މެރެޑޯނާ ފަދަ ކުޅުންތެރިން ވަނީ ހޯދާފައެވެ.
މުބާރާތުގެ އެންމެ މޮޅު ގޯލްކީޕަރަކަށް ހޮވުނީ އިންގްލޭންޑްގެ ފްރެޑީ ވުޑްމެންއެވެ. އޭނާ ވަނީ ފައިނަލު މެޗުގައި ޕެނަލްޓީއެއްވެސް ދިފާއުކޮށްފައެވެ.
މެޗަށްފަހު ވާހަކަދައްކަމުން ކަލްވާޓް ލެވިން ބުނީ ވޯލްޑްކަޕް ފައިނަލެއްގައި ލަނޑު ޖެހި އިންގްލޭންޑް ތިން ކުޅުންތެރިންގެ ތެރޭގައި އޭނާގެ ނަން ހިމެނުމުން ވަރަށް އުފާވާ ކަމަށެވެ.
