އެމެރިކާއަށް ކަޅު ދުވަހެއް އަންނާނެ ކަމުގެ އިންޒާރު ސުލައިމާނީގެ ދަރިކަނބަލުން ދެއްވައިފި
6 ޖެނުއަރީ 2020 | ހޯމަ 07:54ޒައިނަބް ވަނީ ބައްޕަ ޝަހީދު ކޮށްލެވުމުން ހުރިހާ ކަމެއް ނިމުނީކަމަށް ހީނުކުރުމަށް އެމެރިކާއަށް ގޮވާލާފައި
ސުލައިމާނީގެ ޖަނާޒާއަށް ތެހެރާނަށް އެއްވެފައިވާ މީހުން
އެމެރިކާއަށް ކަޅު ދުވަހެއް އަންނާނެ ކަމުގެ އިންޒާރު އެމެރިކާއިން އަވަހާރަކޮށްލާފައިވާ އިރާނުގެ ސަލާމަތީ ބާރުތަކުގެ އެންމެ މަތީވެރިޔާ ޤާސިމް ސުލައިމާނީގެ ދަރިކަނބަލުން ޒައިނަބް ސުލައިމާނީ ދެއްވައިފި އެވެ.
އިރާނުގެ ވެރިރަށް ތެހެރާނަށް އެއްވެފައި ތިބި މީހުންނާ މުޚާތަބު ކުރައްވާ ވާހަކަ ދައްކަވަމުން ޒައިނަބް ވަނީ ބައްޕަ ޝަހީދުކޮށްލެވުމުން ހުރިހާ ކަމެއް ނިމުނީ ކަމަށް ހީނުކުރުމަށްބުނެ އެމެރިކާއަށް އިންޒާރެއް ދެއްވާފައެވެ.
އެމެރިކާއިން ދިން ޙަމަލާތަކެއްގައި ސުލައިމާނީ އަވަހާރަކޮށްލުމާއި ގުޅިގެން އިރާނުން ވަނީ އެކަމުގެ ބަދަލު ހިފާނެ ކަމުގެ އިންޒާރު ދީފައެވެ. އަދި ސުލައިމާނީ އަވަހާރަކޮށްލުމާއި ގުޅިގެން އިރާނުގެ އެތައް ހާސް ރައްޔިތުންނެއް އަންނަނީ މަގުތަކަށް ނިކުމެ ހިތާމަ ފާޅުކުރަމުންނެވެ.
ސުލައިމާނީގެ ޖަނާޒާ ބޭއްވުމަށް ހަމަޖެހިފައިވަނީ އަންގާރަ ދުވަހު އޭނާ އުފަންވެވަޑައިގެންނެވި ކަރްމަންގައެވެ.
ސުލައިމާނީގެ ޢާއިލާގެ މެމްބަރުންނާ ބައްދަލުކުރައްވާ އިރާނުގެ ރައީސް ޙަސަން ރޫޙާނީ ވިދާޅުވެފައިވަނީ ސުލައިމާނީގެ ލޭގެ ބަދަލު ހިފާނީ މުޅި ޞަރަޙައްދުން އެމެރިކާގެ ވަސް ފޮހެލައިގެންކަމަށެވެ. އަދި އެމެރިކާއިން ސުލައިމާނީ އަވަހާރަކޮށްލުމުން އެކުރެވުނީ ކިހާވަރެއްގެ ކަމެއްކަން އެމީހުންނަށް އިޙުސާސް ނުކުރެވޭކަމަށް ރޫހާނީ ވަނީ ވިދާޅުވެފަ އެވެ.
އިރާނުން އެމެރިކާއަށް ޙަމަލާދޭނެކަމުގެ ބިރާއެކު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ، އިރާނުން އެމެރިކާއަށް އެއްވެސް ވަރެއްގެ ގެއްލުމެއް ދީފިނަމަ، އިރާނުގެ 52 ޞަރަޙައްދަކަށް އަމާޒުކޮށް އެމެރިކާއިން ހަމަލާދޭނެ ކަަމަށެވެ. އެސަރަހައްދުތައް މިހާރު ކަނޑައަޅާފައި ވާކަމަށްވެސް ޓްރަމްޕް ވަނީ ވިދާޅުވެފަ އެވެ. އަދި އެމެރިކާގެ އިން މިފަހަރު ދޭނީ އީރާނުން ހީވެސް ނުކުރާކަހަލ ނުރައްކާތެރި ކުއްލި ޙަމަލާއެއްކަމަށް ޓްރަމްޕް ވިދާޅުވެފައިވެއެވެ.
