އޮސްޓްރޭލިޔާގަ އަދަމުންދާ އަލިފާންގަނޑާއި މޫސުމީ ބަދަލުތަކާއި ގުޅުމެއް ނެތް ކަމަށް ބުނާނީ މޮޔައެއް: ނަޝީދު
5 ޖެނުއަރީ 2020 | އާދީއްތަ 03:00ހުރިހާ ގައުމުތައް އެކަތިގަޑަކަށްވެގެން މަސައްކަތް ކުރަން ޖެހޭ: ނަޝީދު
ރައީސް ނަޝީދު
އޮސްޓްރޭލިޔާގެ އެކި ހިސާބުތަކުގައި އަދަމުންދަ އަލިފާންގަނޑާއި މޫސުމީ ބަދަލުތަކާއި ގުޅުމެއް ނެތް ކަމަށް ބުނާނީ މޮޔައެއް ކަމަށް ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ނަޝީދު އެހެން ވިދާޅުވީ ކުރެއްވި ޓްވީޓެއްގައެވެ. އެމަނިކުފާނު ވިދާޅުވީ، މޫސުމަށް އަންނަމުންދާ ބަދަލުތައް ހުއްޓުވުމަށް ހުރިހާ ޤައުމުތަކަކުން އަވަސް ގޮތެއްގައި ޖައްވަށް ދޫކުރާ ގޭސްތައް މަދު ކުރަން ޖެހޭ ކަމަށެވެ. އަދި އެކަމާއި ދެކޮޅު ހަދާ ޤައުމުތައް ބާކީކޮށް، އެއްކޮށް މަސައްކަތް ކުރަން ބޭނުންވާ ޤައުމުތަކުން ކޯލިޝަނެއް ހަދައިގެން ކުރިޔަށްދާން ޖެހޭ ކަމަށެވެ.
އޮސްޓްރޭލިޔާގަ އަނދަމުންދާ އަލިފާންގަނޑާއި، މޫސުމީ ބަދަލުތަކާއި ގުޅުމެއް ނެތް ކަމަށް ބުނާނީ މޮޔައެއް ކަމަށް ނަޝީދު ވިދާޅުވެފައިވާއިރު، މިދިޔަ އަހަރުގެ ސެޕްޓެންބަރު މަހުން ފެށިގެން އޮސްޓްރޭލިއާގެ އެކި ޞަރަޙައްދުތަކުގައި ރޯވާންފެށި އަލިފާން ކޮންޓްރޯލް ނުވެ ވަނީ ބޮޑު ޞަރަޙައްދަކަށް ފެތުރިފައެވެ. އަލިފާނުގެ ސަބަބުން 1300 އަށްވުރެ ގިނަ މީހުންގެ ގެދޮރު ހަލާކުވެ 5 މިލިއަން އޭކަރަށްވުރެ ބޮޑު ޖަންގަލީގެ ޞަރަޙައްދެއް ވަނީ އަނދާ ހުލިވެފައެވެ.
އޭގެ ސަބަބުން ފަސް މިލިއަނަށްވުރެ ގިނަ ޖަނަވާރު މަރުވެފައިވާއިރު، ގަދަ ވަޔާއި ހޫނުގެ ސަބަބުން އަލިފާނުގެ ނުރައްކާތެރިކަން މިވަނީ އެތައް ގުނައަކަށް އިތުރުވެފައެވެ.
ބީބީސީގަ ރިޕޯޓު ކޮށްފައިވާގޮތުން މި އަލިފާންގަނޑާއި މޫސުމަށް އަންނަ ބަދަލުތަކާއި ހުރި ގުޅުމާއި ބެހޭގޮތުން އެ ޤައުމުގެ ބޮޑުވަޒީރު ސްކޮޓް މޮރިސަންއާއި ސުވާލު ކުރުމުން އެމަނިކުފާނު ވަނީ އެ މައުޟޫ އޮއްބާލާފައެވެ. އަދި އެކަމާ ގުޅިގެން ގިނަ ބައެއްގެ ފާޑުކިއުން އޭނާއަށް ވަނީ ޢަމާޒުވެފައެވެ.
