ބޭނުމީ އިންޑިއާ އެކު މޫސުމީ ބަދަލުތަކާއި ދެކޮޅަށް މަސައްކަތް ކުރަން: މަޖިލީސް ރައީސް
އިންޑިއާ ކަނޑަށް ދިމާވެފައިވަނީ މައިގަނޑު ތިން މައްސަލައެއް ކަމަށް ވިދާޅުވި
ރައީސް ނަޝީދު އާއި އިންޑިއާގެ ފޮރިން މިނިސްޓަރު ޑރ. ޖައިޝަންކަރު
މޫސުމަށް އަންނަ ބަދަލުތަކާއި ދެކޮޅަށް ރާއްޖެއިން ކުރާ މަސައްކަތުގައި އިންޑިއާ ކަހަލަ ދުނިޔޭގެ ބޮޑު ބާރަކާއި އެކު މަސައްކަތްކުރަން ބޭނުންވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
މޫސުމީ ބަދަލުތަކާއި ދެކޮޅަށް ކުރާ މަސައްކަތުގައި އިންޑިއާ އެކު މަސައްކަތް ކުރަން ބޭނުންވާ ކަމުގެ ޝައުގުވެރިކަން ރައީސް ނަޝީދު ފާޅުކުރެއްވީ، އިންޑިއާގެ ފޮރިން މިނިސްޓަރު ޑރ. ޖައިޝަންކަރު ލިޔުއްވި ''އިންޑިއާ ވޭ:ސްޓްރެޓެޖީސް ފޯ އޭން އަންސާޓެއިން ވޯލްޑް'' ފޮތާއި ގުޅޭ ގޮތުން ވީޑީއޯ ކޯލް މެދުވެރިކޮށް ދެއްވި މެސެޖެއްގައެވެ.
އެ ފޮތާއި ބެހޭ ގޮތުން ވާހަކަފުޅު ދައްކަވަމުން ނަޝީދު ވިދާޅުވީ، ޑރ. ޝަންކަރުގެ ފޮތުގައި އެންމެ މުހިއްމު ބައެއްގެ ގޮތުގައި ފާހަގަކުރެވުނީ، ''ޕެސިފިކް އިންޑިއާ'' އާ ގުޅޭ ގޮތުން ލިޔުއްވާފައިވާ ވާހަކަތައް ކަމަށެވެ. އެގޮތުން މޫސުމަށް އަންނަ ބަދަލުތަކާއި ގުޅޭ ގޮތުގެ އިތުރުން ރާއްޖެއަށް މުހިއްމު ކަންތައްތަކަށް އަލިއަޅުވާލާފައިވާ ކަމަށް ވިދާޅުވިއެވެ.
މޫސުމީ ބަދަލުތަކުގެ ސަބަބުން ދިމާވާ ގޮންޖެހުންތަކާއި ކަނޑުލޮނުގަނޑު އުފުލުމުގެ ކަންތައްތަކަށް ކަންބޮޑުވުން ފާޅުކުރައްވާ ނަޝީދު ވިދާޅުވީ، އިންޑިއާ އިން މޫސުމީ ބަދަލުތަކާއި ދެކޮޅަށް ގެންގުޅޭ ސިޔާސަތުތަކަކީ ރާއްޖެއިން ވަރަށް ބޮޑަށް ތާއިދުކުރާ ސިޔާސަތުތަކެއް ކަމަށެވެ. ވަކިން ހާއްސަކޮށް ނަރެންދްރަ މޯދީގެ ސަރުކާރުން ގެންގުޅުއްވާ ސިޔާސަތުތަކަށް ތާއިދުކުރައްވާ ކަމަށް ވިދާޅުވިއެވެ.
ނަޝީދު ވިދާޅުވީ، މޫސުމާއި ދެކޮޅަށް ކުރެވޭ މަޝްވަރާތަކުގައި ރާއްޖެ އެކަނި އަޑު އުފުލުމުގެ ބަދަލުގައި އިންޑިއާއެކު އެ މަސައްކަތް ކުރުން މާ މުހިއްމު ކަމަށެވެ.
އޭގެ އިތުރުންވެސް ދެ ގައުމު ގުޅިގެން މަސައްކަތް ކުރެވިދާނެ އިތުރު ދިމާތައް އެބަހުރިކަން އެމަނިކުފާނުި ފާހަގަކުރެއްވިއެވެ. އެގޮތުން މަހުގެ ވިޔަފާރީގެ އިތުރުން ދެ ގައުމު ދޭތެރޭގައި އެއާ ޓްރެވެލް ބަބުލް ހިމެނޭ ކަމަށް ވިދާޅުވިއެވެ.
ނަޝީދު ވިދާޅުވީ، އިންޑިއާ ކަނޑުގެ ސަރަހައްދަށް ކުރިމަތިވެފައިވަނީ މައިގަނޑު ތިން ކަމެއް ކަމަށެވެ. އެއީ ޗައިނާގެ ދަރަނި ދަންތުރަ އާއި، ދީނީ ހަރުކަށި ފިކުރުތަކުގެ އިތުރުން ކަނޑުގެ ލޮނުގަނޑު އުުުފުލުން ކަމަށެވެ.
