ކުރިއަށް އޮތް ފަސް އަހަރު ތެރޭގައި ދިވެހި ރާއްޖެ އަލުން ކާބަން ނިއުޓްރަލް ގައުމަކަށްވުން 'މޫސުމަށް އަންނަ ބަދަލުތަކާބެހޭ ބިލު'ގައި ހިމެނުމަށް ގޮވާލައިފިއެވެ.

ބުދަ ދުވަހުގެ ޖަލްސާގައި މޫސުމަށް އަންނަ ބަދަލުތަކާބެހޭ ބިލަށް ބަހުސް ކުރައްވަމުން މިގޮތަށް ގޮވާލެއްވީ ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރުކަން ވެސް ކުރައްވާ ހޯރަފުށި ދާއިރާގެ މެމްބަރު އަހުމަދު ސަލީމްއެވެ.

ކުރިއަށް އޮތް ފަސްއަހަރު ތެރޭގައި ދިވެހި ރާއްޖެ އަލުން ކާބަން ނިއުޓްރަލް ގައުމަކަށްވުން ބިލުގައި ހިމެނުމަށް ގޮވާލާ، މެމްބަރު ވިދާޅުވީ އެކަން ނުކުރެވެންވީ އެއްވެސް ސަބަބެއް ނެތް ކަމަށެވެ. އެގޮތުން ރާއްޖެއިން ޖައްވަށް ގްރީންހައުސް ގޭސް އެންމެ ގިނައިން ބޭރުކުރާ ދާއިރާތަކާއި ބޭރުކުރާ މިންވަރުތައް އެނގެން އޮތް ކަމަށް ސަލީމް ފާހަގަކުރެއްވިއެވެ.

ރާއްޖެއިން ޖައްވަށް ގްރީންހައުސް ގޭސް އެންމެ ގިނައިން ބޭރުކުރާ ދާއިރާތަކަށް ބަލާލާއިރު އޭގެ 67 އިންސައްތަ ހިއްސާކުރަނީ ކަރަންޓު އުފެއްދުމަށް ކަމަށް މެމްބަރު ވިދާޅުވިއެވެ. އަދި އޭގެ 47 އިންސައްތަ އަކީ ރިސޯޓު ދާއިރާއިން އުފައްދާ ކަރަންޓުގެ ސަބަބުން ބޭރުވާ ގޭސް ކަމަށެވެ. މެމްބަރު ވިދާޅުވީ ހަމައެކަނި ކަރަންޓު އުފެއްދުމަށް އަމާޒުކުރި ކަމުގައި ވީނަމަވެސް، އިޔާދަކުރަނިވި ހަކަތައަށްދާން ނިންމިކަމުގައި ވީނަމަވެސް، ކާބަން ނިއުޓްރަލް ވުމަށް އެއްވެސް ހުރަހެއް ނެތް ކަމަށެވެ.

ރާއްޖެ އަކީ އިރުގެ ދޯދި އެންމެ ތަނަވަސްކޮށް ލިބޭ އެއް ގައުމުކަން ފާހަގަކުރައްވާ ސަލީމް ވިދާޅުވީ އެއްވެސް ހުއްޓުމެއްނެތި، ހަކަތަ އުފައްދާ ޖެނެރޭޓަރުތައް ހިންގޭނެ ކަމަށެވެ. އަދި އެހެން ގައުމުތަކަށް ތެލަށް ބަރޯސާވުން ހުއްޓާލުމުން ރާއްޖެއަށް ފުރިހަމަ މިނިވަންކަމެއް ލިބޭނެ ކަމަށެވެ.

މެމްބަރު ވިދާޅުވީ ރާއްޖޭގައި އުފެދުނު ފުރަތަމަ ޑިމޮކްރެޓިކް ވެރިކަން ބަޣާވާތަކުން ވައްޓާލުމާއި ގުޅިގެން ދިވެހި ރާއްޖެއަށް ތަފާތު އެކި ރޮނގުތަކުން ގެއްލުން ލިބުނު ކަމަށެވެ. އިގްތިސާދީ ގޮތުންނާއި އިޖްތިމާއީ ގޮތުންނާއި އެކި ގޮތްގޮތުން ގެއްލުން ލިބުނު ކަމަށެވެ. ނަމަވެސް އޭގެތެރެއިން ފާހަގަކުރެވޭ އެންމެ ބޮޑު އެއް ގެއްލުމަކީ ތިމާވެއްޓަށް ލިބުނު ގެއްލުންކަން ސަލީމް ފާހަގަކުރެއްވިއެވެ.

މީގެ 6 ވަރަކަށް އަހަރު ކުރިން ސަރުކާރުގެ ކަމާބެހޭ ފަރާތްތަކާއި އަމިއްލަ ތަޖުރިބާ ކާރުންނާއި ރާއްޖެއާއި ރާއްޖެއިން ބޭރުގެ މީހުންގެ އެހީގައި ދިވެހިރާއްޖޭގައި ކާބަން ނިއުޓްރަލް ޕްލޭނެއް ހެދުމަށް މަސައްކަތް ކުރިކަން ފާހަގަ ކުރައްވާ ސަލީމް ވިދާޅުވީ އޭރު ކާބަން ނިއުޓްރަލްވުމަށް ދިވެހިރާއްޖެ އަމާޒު ހިފިކަން، އޭރުގެ ރައިސުލްޖުމްހޫރިއްޔާ މުހައްމަދު ނަޝީދު އިއުލާނު ކުރެއްވުމުން އެކަން ގަބޫލު ކުރީ ވަރަށް މަދު ބައެއް ކަމަށެވެ. އޭގެ އެތައް އަހަރެއް ފަހުން މޫސުމަށް އަންނަ ބަދަލުތަކާއި ގުޅޭ މައުލޫއަށް އެނބުރި އަންނަ އިރު ދުނިޔެ އުޅެނީ މާ ކުރީގައި ކަމަށް މެމްބަރު ވިދާޅުވިއެވެ.

ސަލީމް ވިދާޅުވީ މިހާރު މަސައްކަތް ކުރަމުންދަނީ ރާއްޖެ، އޭރު އޮތް މަގާމަށް އެނބުރި ދެވޭތޯ ކަމަށެވެ.

ކުރީގެ ރައީސް މުހައްމަދު ނަޝީދުގެ ވެރިކަމުގައި 2020 ވަނަ އަހަރު ދިވެހިރާއްޖެ ކާބަން ނިއުޓްރަލް ޤައުމަކަށް ވާނެކަން އިއުލާނު ކުރެއްވިއެވެ. ރައީސް ނަޝީދު ރާއްޖޭގައި 3 އަހަރާއި ދުވަސްކޮޅަކަށް ވެރިކަން ކުރެއްވިއިރު ތިމާވެށްޓާއި ގުޅިގެން ދުނިޔޭގެ އެކި ޕްލެޓްފޯމްތަކުގައި ވާހަކަދައްކަވާފައިވެއެވެ.