އައިޕީޔޫގެ ސްޕީކަރުންގެ ބައްދަލުވުން: ނަޝީދު ވާހަކަދައްކަވަނީ މޫސުމަށް އަންނަ ބަދަލުތަކާއި ގުޅިގެން މަޖިލިސްތަކަށް ކުރެވިދާނެ ކަންކަމާއި ގުޅޭގޮތުން
މިބައްދަލުވުން އޮންނާނީ އޮގަސްޓް 19ން 20ށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
އިންޓަރނޭޝަނަލް ޕާލަމަންޓްރީ ޔޫނިއަން (އައިޕީޔޫ) ނުވަތަ ދުނިޔޭގެ ޤާނޫނު ހަދާ މަޖިލީސްތަކުގެ ރައީސުންގެ 5 ވަނަ ބައްދަލުވުމުގައި އެމަނިކުފާނު އަލިއަޅުވާލައްވާނީ މޫސުމަށް އަންނަ ބަދަލުތަކާއި ގުޅިގެން މަޖިލިސްތަކުން ކަންކުރެވިދާނެ ގޮތްތަކަކާ ގުޅޭގޮތުން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އަންގާރަ ދުވަހުގެ ޖަލްސާގައި މި ބައްދަލުވުމާއި ގުޅޭގޮތުން ވާހަކަ ދައްކަވަމުން ރައީސް ނަޝީދު ވިދާޅުވީ މި ބައްދަލުވުމުގައި ސެޝަންތަކުގައި މަޝްވަރާ ކުރުމަށް ހަމަޖެހިފައިވާ މައުޟޫގެ ތެރޭގައި ސިއްހަތާއި އިގްތިޞާދު އަދި މޫސުމަށް އަންނަ ނޭދެވޭ ބަދަލުތަކާއި ގުޅޭ މައުޟޫތައް ހިމެނޭ ކަމަށެވެ. އަދި ބައްދަލުވުމުގައި ރާއްޖޭގެ ރައްޔިތުންގެ މަޖިލީހުގެ ރައީސްގެ ހައިސިއްޔަތުން އެމަނިކުފާނު ބައިވެރިވެ ވަޑައިގަންނަވާއިރު ވާހަކަދައްކަވާ މައުޟޫ އަކީ "ސްޓެޕިންގ އަޕް ޕާލަމަންޓްރީ އެކްޝަން، ދަ ކްލައިމެޓް ޗޭންޖް އިމަރޖެންސީ" ކަމަށެވެ. އަދި މި ބައްދަލުވުމުގައި އެމަނިކުފާނާއެކު މަޖިލީހުގައި ހިމެނޭ ސިޔާސީ ޕާޓީތަކުގެ ލީޑަރުންނަށް ދައުވަތު އަރުވާފައިވާ ކަމަށް ރައީސް ނަޝީދު ވިދާޅުވިއެވެ. އަދި ބުދަ ދުވަހުގެ ރޭ 7 ޖަހާއިރު މަޖިލީހުގެ އިދާރާގައި ބައްދަލުވުން އޮންނާނެ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މޫސުމަށް އަންނަ ބަދަލުތަކުގެ ކަންތަކުގައި ރާއްޖޭގެ ރައްޔިތުންގެ މަޖިލީހުން ހަރުދަނާ ފިޔަވަޅުތަކެއް އަޅުއްވަން ފައްޓަވާފައިވާ ކަމަށް ދެކެވަޑައިގަންނަވާ ކަމަށެވެ.
ރައީސް ނަޝީދު ވިދާޅުވީ ރައްޔިތުންގެ މަޖިލީހުގައި މިހާރު އޮތް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ އަކީ މިސާލެއްގެ ގޮތުގައި ދުނިޔޭގެ ގައުމުތަކަށް ނެގޭނެ ކޮމިޓީއެއް ކަމަށެވެ. އަދި މި މަޖިލީހަކީ މަޖިލީހެއްގައި ތިމާވެއްޓާ ގުޅޭ މިފަދަ ކޮމިޓީއެއް އޮންނަ ހަމައެކަނި މަޖިލީސް ކަމަށް ރައީސް ނަޝީދު ވިދާޅުވިއެވެ.
އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީއަކީ 19 ވަނަ ރައްޔިތުންގެ މަޖިލީސް އައުމަށްފަހު އުފެއްދި ކޮމިޓީއެކެވެ. އޭގެ ކުރީގެ މަޖިލީސް ތަކުގައި މިނަމުގައި ކޮމިޓީއެއްގެ މަސައްކަތްތައް ކުރިޔަށް ގެންގޮސްފައެއް ނުވެއެވެ.
ދުނިޔޭގެ ގައުމުތަކުގެ ޤާނޫނު ހަދާ މަޖިލީސްތަކުގެ ރައީސުން ބައިވެރިވެވަޑައިގަންނަވާ ބައްދަލުވުމަކީ ކޮންމެ ފަސް އަހަރަކުން އެއް އަހަރު ބާއްވާ ބައްދަލުވުމެކެވެ. މިފަހަރުގެ ބައްދަލުވުން އިންތިޒާމުކޮށްފައިވަނީ އިންޓަރޕާލަމަންޓްރީ ޔޫނިއަންއާއި އޮސްޓްރިއާގެ ޤާނޫނު ހަދާ މަޖިލީހާ ގުޅިގެންނެވެ. މިފަހަރުގެ ބައްދަލުވުމަށް އޮސްޓްރިއާގެ ޤާނޫނު ހަދާ މަޖިލީހުން 250ށް ވުރެން ގިނަ ސްޕީކަރުންނަށް ވަނީ ދައުވަތު ދީފައެވެ. މި ބައްދަލުވުމުގެ މިފަހަރުގެ ތީމަކީ ޕާލަމަންޓްރީ ލީޑަރޝިޕް ފޮރ މޯރ އިފެކްޓިވް މަލްޓިރިއަލިޒަމް ދެޓް ޑެލިވަރސް ޕީސް އެންޑް ސަސްޓެއިނަބްލް ޑިވެލޮޕްމަންޓް ފޯރ ދަ ޕީޕަލް އެންޑް ޕްލެނެޓް އެވެ.
މި ފަހަރުގެ ބައްދަލުވުން އޮންނާނީ އޮގަސްޓް މަހުގެ 19ން 20އަށެވެ.
