މޫސުމީ ބަދަލުތަކާއި ދެކޮޅަށް ޗައިނާއިން ކުރާ މަސައްކަތަށް ޝާހިދުގެ ތައުރީފް
ތައުރީފް ހައްގުކަމަށް ވިދާޅުވި
ފޮރިން މިނިސްޓަރު ޝާހިދު ޗައިނާ އަށް ކުރެއްވި ދަތުރުފުޅުގެ ތެރެއިން
މޫސުމީ ބަދަލުތަކާއި ދެކޮޅަށް ޗައިނާއިންކުރާ މަސައްކަތަށް ތައުރީފް ހައްގު ކަމަށާއި، އެގައުމުން މިސާލު ނަގަން ޖެހޭ ކަަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރުކަމާއި ހަވާލުވެވަޑައިގަތުމަށްފަހު ޗައިނާއަށް ކުރެއްވި ރަސްމީ ދަތުރުފުޅުގައި އެގައުމުގެ ޒިންހުއާ ނޫހަށް ދެއްވި އިންޓަވިއުއެއްގައި ޝާހިދު ވިދާޅުވީ، އަށް އަހަރު ފަހުން ވެރިރަށް ބެއިޖިން އަށް ވަޑައިގެންނެވި އިރު ފެންނަނީ ސާފު ވައި އާއި ފެހިކަން ކަމަށެވެ. އަވިން ހަކަތަ އުފެއްދުމަށް ޗައިނާއިން ނެގި އިސްނެގުމަށް ތައުރީފް ކުރައްވަމުން ޝާހިދު ވިދާޅުވީ، މޫސުމާއި ދެކޮޅަށް ޗައިނާއިން ގެންގުޅޭ ސިޔާސަތަކީ ބައިނަލްއަގްވާމީ މުޖުތަމައު އިން މިސާލު ނަގަން ޖެހޭ ސިޔާސަތެއް ކަމަށެވެ.
ރާއްޖެއަކީ ދުނިޔޭގެ އެންމެ ތިރި ގައުމަކަށްވާއިރު، ކަނޑުގެ ލޮނުގަނޑު އުފުލިގެން ދިޔުމުގެ ބިރުވެރިކަން ރާއްޖެއަށް އަބަދުވެސް އޮންނަ ކަމަށާއި، ގައުމުގެ ރައްޔިތުން ދިރިއުޅެމުންދަނީ އެ ބިރުވެރިކަމުގައިކަން އެމަނިކުފާނު ފާހަގަ ކުރެއްވިއެވެ.
ކުދި އަދި ބޮޑެތި ގައުމުތަކުން ގުޅިގެން އެފަދަ ބޮޑެތި ކާރިސާތަކުން މުޅި އިންސާނިއްޔަތު ސަލާމަތް ކުރަން ޝާހިދު ވަނީ ގޮވައިލާފައެވެ.
